Read gen Yɔb 32 Bible Online

Yɔb 32 - gen bible

Yɔb 32

¹Elifaz ku Bildàd kudo Sofàr, wo nɔ̀tè ènu pòpo, ɖo wo susu be Yɔb nyi ɖemànyatɔ nyàwo.

²Ekèa do àdɔ̀mèze na Èlìhu kè nyi Bàràkɛl be èvi ŋusù so Buzè be kɔ̀ta mè lè Ramè be hɛ̃nu. E bijì do Yɔb, ɖo e le kpɔ be yè lè jɔ̀jɔɛ wu Mawu.

³E gbà bijì do èxlɔ̃ ètɔ̃awo. Ɖo wo mu teŋu ɖo ènyà ŋuti na Yɔb sìgbè lekè e jèa nène ò, eye wo sè e mè be Mawu be ènyà mu nyɔ ò.

⁴Èlìhu dojì kaka gbɔ̀xue, ɖo àmè kpɔ̀tɛawo sĩ wu ì.

⁵Vɔ̀ kè e kpɔ be wo mu gbà ɖo ɖoŋuti ɖe òa, e do àdɔ̀mèze ŋutɔ.

⁶Èlìhu, bàràkɛl be èvi ŋusù so Buzè be kɔ̀ta lè Ramè be hɛ̃nu, xɔ̀ ènyà gblɔ̃ be: “Mù kpɔ̀tɔ̀ lè ɖèkajɛ mè eye mìa ya mì sĩ. Ekèa ŋuti ye mù vɔ̃ ne ma gblɔ̃ ènu kè nyè cã mù kpɔ so ènyàa ŋutia na mì.

⁷Mù le gblɔ̃ be: “Àmè gã be ènyà ye, àmè sĩsĩwo ye la fiɔ ènunya.”

⁸Gbɔ̃gbɔ̃ kè nana àmè nyana ènua, Tɔhonɔ̀ gbɔ be sona.

⁹Mu nyi èpè fuu xɔ̀xɔ ye nana ènunya ò, nyagãkuku mu nana ne woa nya ènu kè lè jɔ̀jɔɛa ò.

¹⁰Ekèa ŋuti mù le biɔ so mìa gbɔ be mìa ɖoto mù: mù la gblɔ̃ ènu kè nyè cã mù nyaa na mì.

¹¹Mù ɖoto sè mìabe ènyàwo kaka na fifì, mù le ŋùku ɖo mìabe susuwo ŋuti wàlɛbɛ kè mì le jè àgbàgba le pò nupoa.

¹²Mù ɖoto mì pɛpɛpɛ. Eye àmè ɖekpe mu teŋu ɖo ènyà ŋuti na Yɔb tututu ò, àmè ɖekpe mu teŋu hɛ̃ ènyà kudo è ò.

¹³Mì mu gbà gblɔ̃ be: “Ɖoŋutia, ye nyi be: Mawu be ènyà ye la jɔ̀ lè e gbɔ, mu nyi mia tɔ̀ ye ò.”

¹⁴Mu nyi ènyè ye Yɔb le gblɔ̃ ènyà na ne ma ɖo e ŋuti na ɛ̀ sìgbè àlekè mì wɔ̀ ɛ̀a nène ò.

¹⁵Àgbɔ̃ kpe mì, mì mu gbà ɖo ènyà ɖe la gblɔ̃ ò, ɖo ènyà vɔ̀ do mì.

¹⁶Mù xɔ̀ jìgbɔ̃ɖɛ. Vɔ̀, kè e nyi be mì mu gbà ɖo ènyà ɖe la gblɔ̃ òa, kè ɖoŋuti vɔ̀ na mìa,

¹⁷mù la pò nupo lè ègo nyè mè.

¹⁸Mù ɖo ènyà sùgbɔ la gblɔ̃, ènu ɖe le tùtù mù be ma pò nupo.

¹⁹E le fìɔ lè mè nyè sìgbè vɛ̃ yeye kè le ji èmɔ̃ la to, ne bèa wo lãgbàzegò ye yèwo nène.

²⁰Mì tàsi mù ne ma pò nupo, e la na be àpe èjì la jè e mè. Ne mù kè ènua, mù la ɖo ènyà ŋuti.

²¹Nyè mu la dɔ̃ àmè ɖe ji ò eye nyè mu la kafu mìa dòmètɔ ɖe ò.

²²Ɛ̃ɛ, nyè mu nya lekè wo kanafu àmè cã ò, eye ne mù kè le wɔ̀ ɛ̀a, Ɖotɔ nyèa la kè crɔ̃ mù xoxo.”