Read gen Yɔb 33 Bible Online

Yɔb 33 - gen bible

Yɔb 33

¹Yɔb, mù trɔ va gbɔ wò, ɖoto mù.

²Kpɔɖa mù le kè ènu ne ma gblɔ̃ ènyà.

³Mù la gblɔ̃ ènyà na wò so kaka èjì mè ke, ɖoto ènu kè mù nyaa.

⁴Mawu ŋutɔ be gbɔ̃gbɔ̃ ye wɔ̀ mù eye Ŋusɛ̃kpatatɔa be àya puplu ye na mù àgbè.

⁵Ne wò teŋuã, ɖo ènyà ŋuti na mù fàa.

⁶Mù nyi àmè sìgbè èwò ke nène lè Mawu be ŋùmè, ànyikɔ ke wo sɔ wɔ̀ nyè cã.

⁷Vɔ̃vɔ̃ mu gbà ɖo wò klua ò. Mù gbà susu be mù ɖo ŋusɛ̃ sɔ zĩ yè ji ò.

⁸Ènyà kèwo wò gblɔ̃a, gbà le ɖì lè èto mè na mù kè wò le tɛgbè ɖo e ji be:

⁹“Mù kɔ̀ mà-ɖo xàxa ɖe. Mù nyi ɖemànyatɔ nyàwo.

¹⁰Vɔ̀, Mawu ji ènu kè be la sɔ dohùɛ do mù, ye be la sɔ mù sìgbè yebe kɛ̃tɔ nènea.

¹¹E do mù àmèviga, eye e le ɖia àpe àfɔ̀topewo.”

¹²Mù ɖo la gblɔ̃ ekèa na wò Yɔb be: Àpo ènyà mu jɔ̀ lè fikèa ò. Nyàwoa, Mawu wugã àgbètɔ.

¹³Eŋuã, nukɛ ŋuti ye wo la hɛ̃ ènyà kudo è ɖo ò, àlo kè mu le ɖo ènyà kèwo wò le biɔ ɛ̀a, ŋuti òa ye à?

¹⁴Co Mawu pònà nupo to wɔ̀na vòvòvòwo mè, vɔ̀ mi mu ŋɔnajè e mè kaba ò.

¹⁵Wàlɛbɛ kè àmèwo mlɔ̃ ànyi lè èzã mè, le dɔ̃ àlɔ̃ ku bòbò lè woabe dɔ̃bawo jia, Mawu pònà nupo to èdrɔ̃kuku kudo ŋùtègãwo mè.

¹⁶E hũnà èto na wo, e ɖona àfɔ̀ àfɔ̀ ji na wo cã ne

¹⁷bèa ɖè àmèwo to lè woabe ènudrãwo mè, eye woa na àsà ègòyiyi.

¹⁸Nène a, e la xɔ̀ woabe èkla lè èku si, e la ɖè wo to lè èkuwode be èmɔ̃a ji.

¹⁹Vɔ̀ Mawu dɔ̃nà èto na àmè to èdɔ̀lele mè wàlɛbɛ kè be le è pu àba jia. E hũhũna tìtìtì,

²⁰ènu mu nyana ɖùnà na ɛ̀ ò, kaka jè ènuɖùɖu kè jɔ̀nàjì na ɛ̀a cã ji.

²¹E ɖìnàkù kaka yebe èpuwo ŋutɔ cã zena klàyòo.

²²Yebe àfɔ̀ ɖèka ɖo èyɔ̀mè xoxo, yebe àgbè lè èku be àsi mè.

²³Vɔ̀ Mawu be àtikplɔtɔ àkpe àkpewo dòmètɔ ɖe teŋu nɔ̀ èdɔ̀nɔ̀ ŋua gbɔ, sɔ nɔ ɖoŋùku yebe èdɔ do àsiwo ji na ɛ̀.

²⁴Àtikplɔtɔa la ku ŋuzĩzĩ na ɛ̀ eye e la gblɔ̃ na Mawu be: “Mù gbà lɔ̃ ne bèa ɖota èyɔ̀ mè ò, mù kpɔ àjɔ̀ kè mù la sɔ hlùɛ̃ ɛ̀ gãa.”

²⁵Nène a, èdɔ̀nɔ̀a kpɔna ŋusɛ̃ yeye eye e trɔ gbɔ̀nà àgbè.

²⁶E la fã yɔ Mawu kè la sè yebe kuefãa kudo àdɔ̀mè nyuɛ̃. E la dɔ̃ gogo Mawu ku jìjɔɛ, ɖo e hlùɛ̃ ɛ̀ gã.

²⁷E la jì èhà lè àmèwo be ŋùkɔ̀ gblɔ̃ be: “Mù jè àgɔ̀ sã, nyè mu wɔ̀ ɖo èsea ji ò. Vɔ̀ Mawu mu dɔ̃ èto na mù sìgbè lekè e jèa nène ò.

²⁸E xɔ̀ mù lè èku simè, mù kpɔ àgbè eye mù gbà le kpɔ kɛ̃klɛ̃a.”

²⁹Ɛ̃ɛ, Mawu le wɔ̀ ekèawo kpata na àgbètɔ be nyɔna, eye mu gɔ̃ ɛ̀ mà-wɔ̀ gbèɖe ò.

³⁰E le ji kpò be yèa xɔ̀ wo lè èku si eye ne àgbè be kɛ̃klɛ̃a ne kɔ̀ na wo.

³¹Yɔb, ɖoto mù nyuɛ̃ ɖe! Bɔ̀ ènu, ènyà gbà lè àsi nyè ma gblɔ̃ na wò.

³²Ne wò ɖo ènyà ɖe la gblɔ̃a, pò nupo ɖo mù le ji la sò jɔ̀jɔɛ na wò.

³³Ne wò mu ɖo ènyà ɖekpe la gblɔ̃ òa, eŋuã ɖoto mù. Bɔ̀ ènu kpoo ne ma fiɔ wò ènunya.