Read gen Yɔb 34 Bible Online

Yɔb 34 - gen bible

Yɔb 34

¹Èlìhu yì e ji gblɔ̃ na Yɔb be:

²Mì àmè kèwo nyi ènunyatɔa, mì ɖoto mù. Mì hũ mìabe ètowo, mì àɖàŋùɖètɔwo.

³Ɛ̃ɛ, èto ɖɔna ènyà sè sìgbè lekè ènu ɖɔna nuɖùɖu kpɔa nène.

⁴Mi ji ènu kè lè jɔ̀jɔɛa ɖodu, mi le ŋùku ɖo ènu kè nyɔa ŋuti ɖodu.

⁵Yɔb gblɔ̃ be: “Mù nyi ɖemànyatɔ, vɔ̀ Mawu mu sònà jɔ̀jɔɛ na mù ò.

⁶Mù la ɖàjè ɖo jɔ̀jɔɛ nyinyi nyèa jia? Nyè mu wɔ̀ èvuɛ̃ ò, vɔ̀ co e do èku-bi ŋuti nyè.”

⁷Àmè kɛ ŋutɔ ye nyi Yɔb kèa? Àmè kè le zũ Mawu sìgbè lekè wo nùnà èsìa nène.

⁸E le yì kudo ènu bàɖàwɔ̀tɔwo, e nɔ̀nà àmèdrãwo be àhàda mè.

⁹Nyàwo e gblɔ̃ be: “Àlè ɖekpe mu lè ne wo jè àgbàgba sɔ jè Mawu be ŋùmè ò.”

¹⁰Mì àmè kèwo àyè sɔ̀gbè na a, mì ɖoto mù! Mawu mu ɖona ènu bàɖà wɔ̀nà ò, Ŋusɛ̃kpatatɔa mu la teŋu nyi màjɔ̀ màjɔwɔ̀tɔ ò!

¹¹Vɔ̀ e nana ènu kè jè na àmèa, e kplɔ̀nà àmè sɔ zɔ̃ ɖo yebe àgbènɔ̀nɔ ji.

¹²Ɛ̃ɛ nyàwo! Mawu mu wɔ̀nà bàɖà gbèɖe ò, Ŋusɛ̃kpatatɔa mu dànà lè jɔ̀jɔɛ ji ò.

¹³Ne e lè nènea, àmè kɛ ye la kè sɔ ànyigbã do àsi na ɛ̀ ò? Vɔ̀ e ye ɖèka kpò ye le kpɔ xixea keŋu ji.

¹⁴Ne Mawu kè le bù ye ŋutɔ kpò be èta mèa, ne e trɔ xɔ̀ yebe àgbè gbɔ̃gbɔ̃a,

¹⁵ènu àgbèagbèwo kpata la ku zè ɖèka, eye àgbètɔwo la trɔ zũ ɖiɖɔɛ.

¹⁶Yɔb, ɖoto, ne wò nyi ènunyatɔa, le ŋùku ɖo ènyà nyèawo ŋuti.

¹⁷Mawu la teŋu kplɔ̀ xixea ne e nyi be mu lɔ̃ jɔ̀jɔɛ òa? E la jro wò be wòa gblehùɛ do àmè ɖèka pɛɛ kè ɖo ŋusɛ̃ gbà lè jɔ̀jɔɛa?

¹⁸E ye ɖèka kpò ye teŋu kpɔ èfìɔ ɖe be mu gbà nyɔ na ènu ɖe ò, ye ɖèka ke la teŋu gblɔ̃ na àmègãwo be: “Mì nyi gbevũwo.”

¹⁹Mu dona èha kudo àmègãwo ò, mu wɔ̀nà kudo ècitɔ nyuɛ̃ ɖe wu wɔ̀amènɔ̀ ò. Nyàwoa, e ye ɖo wo àmè èvèa kpata.

²⁰Àmè gãwo kuna kpàtà lè èzã mè: dùkɔ̃a tɔ̀nàzi eye wo wùnà kplɔ̀tɔwo. Àmè nyrãkuwo crɔ̃na àgbàgba ɖe màje.

²¹Ɛ̃ɛ, Mawu ɖiana àmèwo be wɔ̀na, e kpɔna ènu kèwo keŋu wo le wɔ̀a.

²²Èzã ɖe àlo vìvìti klìko ɖe mu lè ne woa sɔ wla àmè bàɖàwo ò.

²³Mawu mu hiã la kplɔ̀ àmè ɖe yì kòjo mè ò.

²⁴E ɖiɖina ŋusɛ̃tɔwo kè mu yì jina ènu ɖe gɔ̃mè kpɔ ò eye e sɔna àmè bu dà ɖo woa tèpe,

²⁵ɖo e nya ènu kè wo le wɔ̀a. E ɖènà wo jo èzã-èzã eye wo mu gbà ɖìnà ènu ɖe ò.

²⁶E pònà wo lè àgũdòmè sìgbè èhlɔ̃dãtɔwo nène.

²⁷Àmè kèawo mu jro la jè Mawu yomè ò, wo mu sè yebe ènufiɔfiɔa gɔ̃mè ò.

²⁸Nène a, wo na wɔ̀amènɔ̀wo do àpa yɔ Mawu. Eye Mawu sè ènuwɔ̀donɔ̀wo be àpadodowo!

²⁹Lè ègo bu mèa, ne Mawu mu kè ènu òa, àmè kɛ ye la gblehùɛ do è ò? Ne e wla yebe ŋùmèa, àmè kɛ ye la teŋu jè àgbàgba la kpɔ ɛ̀ ò? Co, e lenabè na àmè sia àmè lè ànyigbã ji.

³⁰Mu sɔna àmè bàɖà sɔ ɖona kplɔ̀tɔ ò, àmè kè la blè dùkɔ̃a.

³¹Mi sɔ ɛ̀ kpò be àmè ɖe gblɔ̃ na Mawu be: “Mù jè àgɔ̀, nyè mu la gbà wɔ̀ ènu bàɖà ke ò.

³²Na ma kè ɖo àgɔ̀jèje nyè wawlawo ŋuti. Ne mù wɔ̀ bàɖàa, nyè mu la gbà wɔ̀ ɖe ò.”

³³Lè gbɔ wòa, Mawu ɖo la dɔ̃to na ɛ̀a? Mù nya be e le ɖì kòkoe na wò. Kè e nyi be èwò ye le ɖè ègbè ɖo tèpe nyèa, gblɔ̃ ènu kè wò nyaa na mù.

³⁴Àmè kèwo susu sɔ̀gbè na kudo ènunyatɔ kèwo ɖoto mù a, la gblɔ̃ na mù be:

³⁵“Yɔb le pò nupo sìgbè àmè mànya ènu nène. Yebe ènyàwo mu jègà ò.

³⁶E le pò nupo sìgbè àmè bàɖà nène, eŋuã, wo ɖo la le ŋùku ɖo yebe ènyà ŋuti nyuɛ̃ ɖe.

³⁷Nyàwoa, to e gbɔ be e wɔ̀ èvuɛ̃ coa, wu ekèa, àmè jèagla ye be trɔ zũ. Kè be kpɔ̀tɔ̀ le ji ènyà lè Mawu ŋutia, e do tìtɔ̀ titɔ mia dòmè.”