Read gen Yɔb 35 Bible Online

Yɔb 35 - gen bible

Yɔb 35

¹Èlìhu yì nupoa ji gblɔ̃ be:

²Wò susu be yebe ènyà jɔ̀ a, wò kãɖoji be yè la teŋu ɖè kunù na yè ɖokoe lè Mawu be ŋùkɔ̀a?

³Wàlɛbɛ kè wò le gblɔ̃ be: “Nukɛ ye èvuɛ̃ mà-wɔ̀ la hɛ̃ va na mù ò, nukɛ ye la so e mè na mù ò?”

⁴Mù la ɖo ènyà ŋuti na wò kpòeɖe, eye mù la ɖo èxlɔ̃ wòwo cã tɔ̀ ŋuti zè ɖèka.

⁵Le ŋùku ɖo jiŋùkusi ŋuti, kpɔ lilikpowo ɖa: wo lè àyamè boo na wò!

⁶Ne wò le wɔ̀ bàɖàa, wò dona àbì Mawu ŋutia? Ne wò kpɔ̀tɔ̀ le jèaglaa, nukɛ be la teŋu wɔ̀ na ɛ̀ ò? Kpao!

⁷Eye ne wò le sètonu na ɛ̀a, àlè kɛ be la kpɔ ò, nukɛ be la xɔ̀ so gbɔ wò ò?

⁸Àgbètɔ kè lè sìgbè èwò nènea ŋuti kpò ye ènu kè wò le wɔ̀a le do àbì, àgbètɔwo kpò ye le kpɔ ègomè lè ènyuɛ̃ kè wò le wɔ̀a mè.

⁹Ne màjɔ̀ màjɔ tɛ àmèwo ɖotoa, wo jènàhùɛ, wo dona àpa sɔ jina àlɔ̀do ɖo ŋusɛ̃tɔwo be ènu drã wɔ̀wɔ ŋuti.

¹⁰Vɔ̀ àmè ɖe mu biɔna sè be: “Mawu kè ɖo mù a ɖe ò?” Fikɛ be lè ò, e ye kè nana wo kpànà èhà lè èzãa,

¹¹e ye kè fiɔna mi ènu to ègbemèlãwo jia, kè ɖènà ènunya na mi to àyamè xèviwo jia?”

¹²Àmè sia àmè ye le do àpa le biɔ àlɔ̀do ɖo àmè bàɖàwo be ègòyiyi ŋuti vɔ̀, Mawu mu le kè ènu do e mè ò.

¹³Aò, Mawu Ŋusɛ̃kpatatɔ mu le ɖoto woabe ènyà mà-ɖo ètùa ò, yebe susu cã mu lè e ji ò.

¹⁴Mu le ɖoto èwò Yɔb cã ò, ne wò le gblɔ̃ be: “Nyè mu le kpɔ Mawu ò, e nya àpe ènyàa, eye mù kpɔ̀tɔ̀ le kpɔ yebe àsinu kòkòkò”.

¹⁵Nyàwoa, Mawu mu ɖènà yebe àdɔ̀mèze fiɔ ò, e wɔ̀nà sìgbè àmè kè ŋlɔ̀be àgbètɔ be àglajèje nène.

¹⁶Ènu kè ŋutia, ye nyi be Yɔb kè ènu le pò nupo ɖo àyamè, e le pò nupo yùu, sìgbè àmè kè mu le nya ènu òa nène.