Read gen Yɔb 37 Bible Online

Yɔb 37 - gen bible

Yɔb 37

¹Ènu kèa ŋuti ye èjì le pòhũ na mù ɖo, e le zrò lè ètù mè na mù.

²Mi ɖoto Mawu be ègbè sɛ̃sɛ̃, kè le to so yebe ènu mèa.

³E dànà yebe bìɖàwo ɖo àyamè lè jiŋùkusi, so àkɔ ɖe yìnà àkɔ bu.

⁴Eŋuã yomè a, Mawu be ègbè ɖì ku àdã, e ɖè ègbè kudo ŋusɛ̃ mànya gblɔ̃. Zè ɖèkaa, e dà yebe bìɖàwo ɖoɖa.

⁵Mawu na yebe ègbè ɖèɖe le ɖì, e wɔ̀ ŋùdã! Ɛ̃ɛ, Mawu na mi kpɔ ŋùdãnuwo, e le wɔ̀ ènu jɔ̀ àsu kèwo mi mu la teŋu wɔ̀ òa.

⁶E gblɔ̃ na èsìkpe wuwluiwo be woa jà so èji kɔ̀ ɖo ànyigbã ji. E nana èjisi gbɛ̀luwo jànà.

⁷Gà ŋua mèa, àmèwo mu la gbà teŋu wɔ̀ ènu ɖe ò. Wo la do jèsi ènu kè Mawu la wɔ̀a kpò.

⁸Èlãwo yìnà woabe nɔ̀pe eye wo yì mlɔ̃na woabe dɔ̃pewo.

⁹Àya sɛ̃sɛ̃ pònà so àpùgo, eye èvègo be àyawo hɛ̃nà àvìvɔ vana.

¹⁰To yebe àya-gbɔ̃gbɔ̃ mèa, Mawu wɔ̀nà èsìkpe, eye èsìa sɛ̃naŋu sìgbè èkpe nène.

¹¹E nana lilikpowo ɖɔna ku fàfa, e dona bìɖàwo woa mè eye e dànà wo ɖoɖa àfi sia àfi.

¹²E trɔna wo ɖo àgowo kpata ji sɔ zɔ̃ ɖo yebe ɖoɖowo ji. Nène a, wo wɔ̀nà ɖo yebe ègbèɖèɖewo ji lè xixea kpata mè.

¹³Mawu ɖona lilikpowo ɖoɖa ne bèa sɔ dɔ̃to na dùkɔ̃wo lè ànyigbã ji, àlo sɔ wua, ne bèa sɔ ɖè yebe àdɔ̀mèze fiɔ wo.

¹⁴Yɔb, le ŋùku ɖo ènu kèa ŋuti, eye bù Mawu be ŋùdãnuwo ŋuti kpɔ!

¹⁵Wò nya lekè Mawu le wɔ̀ wo ɖoa? Àlekè lilikpowo nana bìɖàwo klɛ̃na ɖoa?

¹⁶Wò sè lekè wo wɔ̀nà ɖìnàsà lè ànyigbã kudo jiŋùkusi dòmè gɔ̃mèa?

¹⁷Ne àpùgo be àya hɛ̃ zòzo va cɔ̃ ànyigbã a, fiɔ̃fiɔ̃ tena wò lè àpo àwùwo mè.

¹⁸E nyɔ, wò la teŋu kpe ɖo Mawu ŋuti ne bèa vlũ jiŋùkusi, ne bèa trɔ ɛ̀ wɔ̀ ègàkpo be àpùpuia?

¹⁹Fiɔ mù ènu kè mi la gblɔ̃ na Mawu a. Susu hùe do mi, eye mi lè vìvìti mè.

²⁰E hiã be woa sìa ɛ̀ gbɔ̀xue ma pò nupoa? Wo la gblɔ̃ na ɛ̀ be àmè ɖe pò nupo be yè ji la crɔ̃a?

²¹Troloa, mi mu gbà le kpɔ ènu nyuɛ̃ ɖe ò. Liliwo cɔ̃ dɔ̃ŋùkusua, e yomè a, àya sɔ eye be kplɔ̀ wo keŋu.

²²Àvego be kɔ̀kɔ̀ɛ kè ɖì sìka be kɔlàa so èvègo va, kɔ̀kɔ̀ɛ mànya gblɔ̃ ɖe trɔ do Mawu.

²³E ye nyi Ŋusɛ̃kpatatɔ, mi mu la teŋu dɔ̃ gogo è ò; Yebe ŋusɛ̃ lòlò eye yebe jɔ̀jɔɛ trìakɔ. Mu tɛna àmè jɔ̀jɔɛ ɖoto ò.

²⁴Ekèa ŋuti ye àgbètɔwo ɖona bùbu na ɛ̀, vɔ̀ mu kpɔna, àmè kèwo susuna be yèwo nyanua, gbɔ ò.