Read gen Yɔb 38 Bible Online

Yɔb 38 - gen bible

Yɔb 38

¹So àya sɛ̃ŋu be dòdòmè ye Tɔhonɔ̀ ɖo ènyà ŋuti na Yɔb lè, gblɔ̃ be:

²“Àmè kɛ ye wò nyi le cɔ̃nu àpe ɖoɖowo ji, lè ènupòpo so ènu kè wò mu nya òa ŋuti ò?

³Jràɖo ɖɛ ne wòa nyi ŋusù! Mù la biɔ wò ènyà ne wòa na mù gɔ̃mè ɖèɖewo.”

⁴Fikɛ ye wò lè wàlɛbɛ kè mù le sɔ ànyigbã ɖo yebe dodoewo ji ò? Ne wò nya nyàwoa, to è na mù.

⁵Àmè kɛ ye na yebe jijewo ò, wò nya ɛ̀a? Àmè kɛ ye dàkà sɔ jije è ò?

⁶Nukɛ ji ye dodoeawo li ɖo ò? Àmè kɛ ye ɖo koŋùjikpe kpɔ̀tɛa,

⁷wàlɛbɛ kè ye jiŋùkusi dùkɔ̃wo le do jìjɔɛ be àpa eye ŋùdekɛ̃nyɛ wètriviwo le jì màmlã-hawo ò?

⁸Wàlɛbɛ kè àpùa wo so ànyigbã mèa, àmè kɛ ye tu èmɔ̃ do è, sɔ le è ɖo ànyigbã ji ò?

⁹Ènyè ye! Eye mù sɔ lilikpowo cɔ̃ e ji, mù cɔ̃ àvɔ-do-vìvìti ɖe na ɛ̀.

¹⁰Mu ɖo àsi yebe èdù pupua ji, mù do lipò na ɛ̀, kè mù tu èhɔ̃ ɖo e nu, dogà e mèa.

¹¹Mù gblɔ̃ na àpùa be: “Wò la va kaka fikèa! Wò mu ɖo la gbà yì wu nène ò! Ɛ̃ɛ, àpo ègòyiyi srɔ̀kewo be sɛ̃pewo ye yà!”

¹²So kaka gà kè mè wò jɔ̀ a, wò ɖè ègbè eye èŋù kè kpɔa? Eye wò sɔ fɔ̃fɔ̃mè be tèpe sɔ fiɔ ɛ̀:

¹³ne bèa le ànyigbã be ètowo mè, bèa hũhũ ì ne àmè bàɖàwo woa jè ànyi.

¹⁴Nène a, ànyigbã trɔna sìgbè ànyikɔ kè mè ye ènu be tata ɖè ɖo nène, eye xixea kpata lè sìgbè ènu kè wo do àwù na a nène.

¹⁵Vìvìtimènuwo ye jɔ̀nàjì na àmè bàɖàwo, co wo mu la teŋu kɔ àsi yì ji ɖo àmè ɖekpe ŋuti ò.

¹⁶Wò yì kè ɖo àpù be jɔ̀sope ŋuti vɔ̀a? Wò yì ɖìsà lè àpùwo be dòdòmèa?

¹⁷Wò kè ɖo èkuwode be èmɔ̃a ŋutia? Wò kpɔ yebe àgbo mɔnuawoa?

¹⁸Wò teŋu ɖè susu ɖe so ànyigbã be lipòwo ŋutia? Ne wò nya ekèawo kpataa, na ne ma nya!

¹⁹Fikɛ lɔ̀ge ye kɔ̀kɔ̀ɛ nɔ̀nà ò? Eye èzã be nɔ̀pe ɖe?

²⁰Wò la teŋu yì ji wo kpɔ lè woabe nɔ̀pewo eye wò la nya woabe àfɔ̀topewoa?

²¹Wò nya ɛ̀, èwò kè wo jì so gbèɖegbè kea!

²²Wò teŋu yì kaka èsìkpe wuwluiwo be wlapea? Wò yì kpɔ èsìkpe jàja be àvàa?

²³Mù wla wo na jɔ̀gbè vuɛ̃wo be ŋùkèkè, na àvũ kudo àhùa wɔ̀wɔ be ŋùkèkèwo.

²⁴Fikɛ ye kɔ̀kɔ̀ɛ so ò? Fikɛ ye èwèzɛ̃pe be àya sɔna, va pònà lè ànyigbã ji ò? Wò nya ekèa?

²⁵Àmè kɛ ye ta èmɔ̃ na èsì jàja ò? Àmè kɛ ye ɖè èmɔ̃ na bìɖà kudo hɛ̀bìɛsò ò?

²⁶Àmè kɛ ye nana èsì ɖùɖùnà kɔ̀ ɖo ànyigbã kè ji àmèwo mu lè òa ji ò? Zògbè nyigbã, fikè àmè ɖe mu lè ò.

²⁷Àmè kɛ ye nana èji jànà kɔ̀ ɖo ànyigbã pupui ji kaka be ɖona èsì eye e nana ègbe mìɔ̃ nà gbà jènà ò?

²⁸Ètɔ ɖe lè èjisi jàja sia? Àmè kɛ ye jì àhũ jàja ò?

²⁹Ènɔ̀ lè èsìkpe sia? Àmè kɛ ye jì èsìkpe wuwluiwo ò?

³⁰Wàlɛbɛ ŋua èsìa trɔna èsìkpe sɛ̃ŋu goŋu-goŋu, eye ye ji àlo yebe ŋuti nɔ̀nà ɖèka kpò.

³¹Kpɔ wètriviwo be èha sòsowo ɖa! Wò la teŋu bla wètrivi adrɛ̃awo ɖodu, eye wò la tu èkà na wètrivi ènè kɔ̀ ceŋu-ceŋuãwoa?

³²Wò la teŋu na ye wètriviwo la to ɖo àmè hùenu, la kplɔ̀ Sisiblìsi gã kudo vitukuia?

³³Wò nya èse kè le kplɔ̀ jiŋùkusia? Èwò ye lè ŋùkɔ̀ na jiŋùkusi be wɔ̀nawo, lè ànyigbã jia?

³⁴Wò ɖènàgbè ɖo lilikpowo ji ne woa na wò èjisi gbɛ̀lua?

³⁵Èwò ye ɖènàgbè na bìɖàwo ye wo zena lè xixea mèa? Wo sènàgbè na wòa?

³⁶Àmè kɛ ye sɔ ènunya do Ejiptè be ètɔ̀ gã, be xèvi ɖè ɖovòa mè ò? Àmè kɛ ye na susu sɔ̀gbè na kòklo ne bèa sɔ nya èji jàja be vava ò?

³⁷Àmè kɛ sù la teŋu hlɛ̃ lilikpowo eye be la kpà èsì lè jiŋùkusi ò?

³⁸Lè hùe ŋua nua, hũhũ la trɔ zũ bàba be ètɔ̀ sàsra, eye bàbakɔ̃wo la ca ɖodu lè àgblèwo mè.

³⁹Èwò ye jina èlã na jãŋùta-nɔa? Èwò ye jina nuɖùɖu na jãŋùta vi

⁴⁰kèwo lè woabe èdowo mè, àlo sɔ̀gbè la dà àdè sɔ le èlãa?

⁴¹Èwò ye ɖànànu na àvàkò, ne èviawo le do àpa yɔ Mawu, eye wo le ci jàjàjà, àdɔ̀ le wù woa?