Read gen Yɔb 39 Bible Online

Yɔb 39 - gen bible

Yɔb 39

¹Wò nya hùenu kè ye àvũgbɛwo jìnà èvia? Wò kpɔ èsewo be èvijìpe kpɔa?

²Wò nya wètri nenè kè wo hɛ̃nà woabe èviwo va sùa? Wò nya hùenu kè wo jìnà èvia?

³Woa nɔ̀wo yì jrànà woa ɖokoewo ɖo na èvi jìji eye èvi jìji be vève sèsea jona lè woa ji.

⁴Èseviawo sĩnà lè vòvo mè, ɖona ŋusɛ̃. Eye gbè ɖèka ne wo joa, wo mu gbà trɔna va woa nɔ̀awo gbɔ gbèɖe ò.

⁵Àmè kɛ ye na vòvo ègbesɔàkɛtɛ ò? Àmè kɛ ye tu èkà na ɛ̀ ò?

⁶Mù na zògbè trɔ zũ yebe nɔ̀pe ànyigbã vejè e ji ye be sò kɔpe ɖo.

⁷Fikè hũnyà-hũnyà lèa, ɖìnà ènu kòkoe na ɛ̀ ɖo e jina ètomè fàfa. Àpetɔ ɖe mu dona àpa ɖo e ta ò.

⁸E ɖìnàsà lè ètowo ji, fikè be kpɔna gbè sia gbè be ènuɖùɖu lè. Ènu kè do àmà ye jɔ̀nàjì na ɛ̀.

⁹Ètò la teŋu sɔ ye ɖokoe wɔ̀ sumɔ̃vi na wòa? E la teŋu dɔ̃ àpo àxomèa èzã ɖèkaa?

¹⁰Wò la teŋu bla ɛ̀ ɖo àgblèdànu ŋuti ne bèa ŋlɔ̀ àgblè mè na wòa? Wò la teŋu nɔ̀ ŋùkɔ̀ na ɛ̀ ne bèa dɔ̃ èmɔ̃ kè jrànà ànyigbã ji ɖoa?

¹¹Wò la dojì ɖo yebe ŋusɛ̃ tɔ̀hɛa ŋuti, kaka la tàsi èdɔ wòa na ɛ̀a?

¹²Eye wò la tàsi ènukuyàya wòa ne bèa bɔ̀ wo ɖo àvà ji na wòa?

¹³Tatabòli be àwàwo pònà nyuɛ̃ ɖe vɔ̀ mu la teŋu zrò sìgbè èglò nène ò.

¹⁴E ɖona yebe àzìwo ɖo ànyigbã eye woa ŋutɔwo pònà woa ɖokoewo lè èkɔ mè.

¹⁵E ŋlɔ̀nàbe be wo la teŋu ɖo àfɔ̀ woa ji, be ègbemèlã ɖe teŋu va gbã wo.

¹⁶Woa nɔ̀ sɛ̃na èta mè ɖo woa ŋuti ŋutɔ sìgbè wo mu nyi yebe èviwo ò nène. Èvi jìji mu wɔ̀ ènu ɖe na ɛ̀ ò.

¹⁷Ɖo Mawu mu na ɛ̀ ènunya ò, mu na ɛ̀ susu tɔ̀hɛ cã ò.

¹⁸Vɔ̀, ne e sitè eye be tɔ èdù pupua, èsɔ kè èsɔdotɔ le kùa cã mu teŋu kpena e ji ò.

¹⁹Èwò ye na ŋusɛ̃ èsɔa, èwò ye sɔ èfu lɔ̀bɔ̀ lɔ̀bɔ̀wo sɔ do èkɔ̀ mè na ɛ̀ trɔdoa?

²⁰Èwò ye na be zrònà sìgbè tìkpo-tìkpo nènea? Yebe gbɔ̃gbɔ̃ be àya ɖona vɔ̃vɔ̃ ŋutɔ.

²¹E sɔna yebe àfɔ̀ kpàbàwo pònà ànyigbã ne e le pu dù lè bàlìwo mèa. Kudo yebe ŋusɛ̃ ye be sɔ jènà ŋùkɔ̀ na àhùakɔ̃wo.

²²Vɔ̃vɔ̃ mu ɖona ɛ̀ kaka ye àdìka la sò è ò, mu yìnà ŋùgbe lè èwui ɖe be ŋùkɔ̀ ò.

²³E kpɔna gbà sènà àhùawɔ̀nu vòvòvòwo be ègbè: èwuiwo, èhuãwo kudo àŋùtiwo be zòzro.

²⁴Lè àmè ɖokoe ji màɖu mèa, e zrònà làlàlà kudo èdù. Ne àhùakpɛ̃a ɖìa, mu gbà teŋu lena ye ɖokoe ò.

²⁵E gbɔ̃nà sɛ̃sɛ̃ɖe na àhùa be yìyi ne e sè àhùakpɛ̃a ɖìa. E sènà àhùa be èzĩtɔ̀tɔ ɖoɖa, àhùagawo be ègbèɖèɖe kudo àhùawɔ̀tɔwo be àpa dodowo.

²⁶Àmlãkoe kènà yebe àwàwo ɖoɖa àpùgo lɔ̀ge ne zòzo bèa na ne èfu ye yèwo woa to na ɛ̀. Èwò ye na ɛ̀ ènunya kè be sɔ le wɔ̀ ekèa?

²⁷Èwò ye ɖè susu na èhɔ̃ gã eye be yì wɔ̀nà àtɔ̃ ɖo ètowo mèa?

²⁸E nɔ̀nà àkpãdowo mè, e dɔ̃na àkpãwo be èta mè, funu ye yebe ŋusɛ̃a lè.

²⁹So kaka funua ke ye be dànà àdè lè, eye yebe ŋùkuwo kpɔna kaka dìdìpewo ɖoɖa.

³⁰Èviawo nùnà èhũ. Fikè ènukuku bɔ lèa, èhɔ̃ gã nɔ̀nà funu.