Read gen Yɔb 4 Bible Online

Yɔb 4 - gen bible

Yɔb 4

¹Nène a, Elifaz so Temàn sɔ ènyàa gblɔ̃ na Yɔb be:

²“Nyè mu ji la pò nupo na wò, ɖo mù kpɔ be wò dojì kaka be glo. Co nyè mu la teŋu bɔ̀ ènu ò.

³Èwò kè pònà èto ɖo na àmè fuu, eye wò nya àlekè wo dona àmè ŋusɛ̃ ɖoa.

⁴Àpo ènyàwo gbɔ̀nà àgbè àmè kèwo gbɔjɔa; wo jɔ̀nà àmè kèwo trã èmɔ̃a.

⁵Eye fifìa, èwò ŋutɔ ji be jè eye wò gbɔjɔ. Wàlɛbɛ kè gbledo le va ji wòa, vɔ̃vɔ̃ ɖo wò.

⁶Èwò kè nyi Mawu be èxlɔ̃a, wò mu la le èjì sɛ̃sɛ̃ɖe ne wòa dojì ɖo e ŋutia? Àpo àgbè nɔ̀nɔ nyuɛ̃a ne do ŋusɛ̃ wò tètè.

⁷Bù e ŋuti kpɔ: wò kpɔ gbledo jè èɖemànyatɔ àlo ànùkuamè ji kpɔa?

⁸Nyè ya, mù do jèsi ènu kèa be: àmè kè dànà ènu drã be àgblè gbà dona àyà na àmèa, yì ɖènà àyà kudo ènu drã.

⁹Ne Mawu gbɔ̃ ɖo e jia, e kuna; ne e do àdɔ̀mèzea, e crɔ̃na.

¹⁰Mawu nana ye jãŋùta be àdã kudo ègbese be àpawo nu cina. E ŋɛ̃na jãŋùtavi be àɖuwo.

¹¹Nène a, jãŋùta la ku, ɖo mu gbà ɖo ènu ɖekpe la ɖù ò, jãŋùtaviwo la kã tɔbu-nɔ̀bu.

¹²Mù sè ègbè wawla ɖe, èto nyè sè ènu hùãhuã ɖe.

¹³Ekèa jɔ̀ lè èzã mè, lè èdrɔ̃ kuku mè wàlɛbɛ kè àmèwo dɔ̃ àlɔ̃ ku bòbòa.

¹⁴Èta nyè lɔha eye fàfa le mù, eye mù le hũhũ tìtìtì.

¹⁵Ènu ɖe sìgbè àya puplu nène to ŋùkumè na mù va yì, vɔ̃vɔ̃ gbà jè e ji nyè kpe è.

¹⁶Àmè ɖe kè nyè mu kpɔ jèsi òa, tɔtè lè ŋùkɔ̀ na mù. Àmè be nɔ̀nɔmè ɖe lè ŋùku mè na mù. Èɖaɖo, e yomè a, mù sè ègbè ɖe gblɔ̃ be:

¹⁷“Àgbètɔ ɖe la teŋu nɔ̀ jɔ̀jɔɛ lè Mawu be ŋùmèa? Àmè ɖe la nɔ̀ kɔ̀kɔ̀ɛ lè ɖotɔ a be ŋùmèa?

¹⁸Kpɔɖa: Mawu mu kãna ɖo yebe àtikplɔtɔwo ji ò, e kãna ŋùmè na yebe sumɔ̃viwo so woabe àgɔ̀jèjewo ŋuti.

¹⁹Ne e lè nènea, leke be la teŋu dojì ɖo àgbètɔwo ŋuti ɖo ò? Nyàwoa, èkɔ ye wo sɔ wɔ̀ wo, eye woabe ŋutilã nyi hũhũ ɖèɖe. Wo la teŋu wù wo sìgbè tɔ̀bɔ̀su nène.

²⁰Wo la teŋu crɔ̃ wo lè hùenu viɖe kpò mè. Wo la bu gbidi, àmè ɖe mu la gbà ɖo ŋùku woa ji ke ò.

²¹Èkà kè le wo ɖo àgbèa, sò. Wo ku kè wo mu kpɔ ènunya xɔ̀ ò.”