Read gen Yɔb 40 Bible Online

Yɔb 40 - gen bible

Yɔb 40

¹Tɔhonɔ̀ pò nupo na Yɔb. E gblɔ̃ na ɛ̀ be:

²Kè wò le sitè ɖo Ŋusɛ̃kpatatɔa ŋutia ɖe, wò la teŋu hɛ̃ ènyà kudo èa? Kè wò le dɔ̃ ènyà kudo Mawu a, wò la teŋu ɖo ènyà ŋutia?

³Nène a ye Yɔb ɖo e ŋuti na Tɔhonɔ̀ gblɔ̃ be:

⁴“Nyè mu sù na ènu ɖekpe ò. Nukɛ mù la teŋu sɔ ɖo e ŋuti ò? Mù le ènu nyè kpoo!

⁵Mù pò nupo fuu, mù la ɖo ènutè. Mù gblɔ̃ ènyà sùgbɔ va yì, fifìa mù bɔ̀nu kpoo.”

⁶Lè àya sɛ̃sɛ̃ ɖe mèa, Tɔhonɔ̀ biɔ ènyà Yɔb. E gblɔ̃ na ɛ̀ be:

⁷Bla àkpà ne wòa jrà ɖokoe wò ɖo ne ma biɔ wò ènyà, eye wòa na mù ɖoŋuti.

⁸Wò le ji la gblɔ̃ be nyè mu lè jɔ̀jɔɛ òa? Wò le ji la gblɔ̃ be yèbe ènyà jɔ̀ eye ènyè ye jè àgɔ̀a?

⁹Wò ɖo ŋusɛ̃ sìgbè ènyè ke nènea? Eye wò cã àpo ègbè ɖìnà sìgbè èji be ègbè ɖèɖe nènea?

¹⁰Ne e lè nènea, eŋuã kpɔ jìjɔɛ ne wòa kɔ ɖokoe wò yì ji, do bùbu tɔ̀hɛ ɖokoe wò ŋuti ne wòa jràɖo.

¹¹Na ne àdɔ̀mèze wòa ne gbãgo. Ɖè ŋùku kpò, ne wòa ɖiɖi ègòyitɔwo va ànyi.

¹²Ɛ̃ɛ, kpɔ ɛ̀ ne àdɔ̃ bèa jègũ na wo! Ɖiki àmè bàɖàwo lè tèpe ɖèka.

¹³Na ne woa kpata woa ɖo ègũ, tu wo ɖo èku be gàkpa mè;

¹⁴Nène a, mù la kafu wò. Ɛ̃ɛ, àpo ŋusɛ̃ kpò ye la na wò jiɖùɖu.

¹⁵Kpɔ ɖɛ̀gbo ɖa, ènyè ke ɖo è sìgbè àlekè mù ɖo wò cã a nène. E ɖùnà ègbe sìgbè ènyì ke nène.

¹⁶Vɔ̀ kpɔ yebe ŋusɛ̃ lè àlìmè na ɛ̀, yebe pòdo trì nyuɛ̃ ɖe ŋutɔ!

¹⁷Yebe àsike sɛ̃ŋu sìgbè sedàti nène, èkã sɛ̃ŋuwo ye lè yebe àtawo mè.

¹⁸Yebe èpuwo lè sìgbè gàjɛ̃ be gàkpo kèwo mè èdo toa nène, yebe àhàdaputiwo lè sìgbè gàja nène.

¹⁹E nyi èlã xɔ̀asì wu lè ènuɖoɖo nyèwo kpata dòmè. Ènyè, ɖotɔ a ŋutɔ ɖèka kpò ye ɖo ŋusɛ̃ ɖo e ji.

²⁰Ètowo mè be kpɔna ègbe kè be la ɖùawo lè, fikè ye èlãwɔ̀adãwo gblena lè.

²¹Vɔ̀ e yì mlɔ̃na àtiwo be fàfagbè, e yì wlana ɖo ètãkuwo mè lè èkowo dòmè.

²²Àti kèwo lè ètɔ̀toa be vɔ̃vɔ̃lì trɔna do è gòdòo.

²³Èsì ɖɔɖɔ mu wɔ̀nà ènu ɖe na ɛ̀ ò. E nɔ̀nà kpoo ne èsìa gbà ɖɔ kaka va ènu gbɔ na ɛ̀ cã a.

²⁴Àmè kɛ la teŋu le è ne yebe ŋùkuwo lè hũhũ ò? Àmè kɛ ye la teŋu sɔ èhuã sɔ ŋɔ ŋɔ̀ti na ɛ̀ ò?

²⁵Wò la teŋu yì le dràgɔ̃nà èlã-jiŋɔa sìgbè àkpàvi nènea? Wò la teŋu sɔ àkpoŋù sɔ kù yebe àɖea?

²⁶Wò la teŋu do àti ŋɔ̀ti mè na ɛ̀, la sɔ ènu kù yebe àglãa?

²⁷E la ɖèkuku na wò be wòa ɖè yè ègàa? E la teŋu pò nupo na wò kudo ègbè bɔ̀bɔɛa?

²⁸E la ɖùzò kudo wò ne bèa nɔ sumɔ wò kaka na yebe èkua?

²⁹Wò la teŋu gble kudo è sìgbè xèvi nènea? Àlo wò la do è èkà sìgbè àvũvi nène na èvi nyɔ̃nùvi wòwo be gbegblea?

³⁰Èɖɔdàtɔwo la teŋu bɔ̀ ɖo èdu sɔ sà èlã-jiŋɔa? Wo la teŋu ma ɛ̀ sà do àmèwoa?

³¹Wò la teŋu sɔ àŋùtiwo trɔ̃ yebe àgbàze eye wò la sɔ èhuã ŋɔ èta na ɛ̀a?

³²Ne wò yì ji ènyà lè e ŋutia, wò la kpɔ ɛ̀. Wò la nɔ ɖoŋù yebe wɔ̀na eye èsɔ̀ ŋùkèa, wò la kɔ̀ ɛ̀ ɖɛ!