Read gen Yɔb 42 Bible Online

Yɔb 42 - gen bible

Yɔb 42

¹Nène a, Yɔb ɖo e ŋuti na Tɔhonɔ̀ gblɔ̃ be:

²“Mù nya be ènu ɖekpe mu glo wò ò, wò sɔ̀gbè la wɔ̀ ènu kè wò jro a.

³Wò gblɔ̃ ɛ̀ be: Mù hɛ̃ tìtɔ̀ titɔ va àpo ɖoɖowo mè wàlɛbɛ kè mù le pò nupo sìgbè sùkunɔ̀ nènea. Ɛ̃ɛ, mù do è jèsi be: Mù gblɔ̃ ènu ɖìnyi kèwo wu gã mù a, eye nyè mu nya wo sã ò.

⁴Wò gblɔ̃ na mù be: “Ɖoto ne ma pò nupo. Mù la biɔ wò ènyà eye wò la na mù ènu-mè ɖèɖewo.”

⁵Kaka na fifìa, mù nya wò to ènu kèwo àpe èto sènàa ji kpò. Vɔ̀ fifìa, mù kpɔ wò àgbãŋùgbà.

⁶Ekèa ŋuti mù le ɖèkuku ɖo ènu kè mù gblɔ̃a ta. Mù le blìbɔ̀ eye mù do jèsi àpe dàdaa.”

⁷Tɔhonɔ̀ gblɔ̃ ènyà kèawo kpata na Yɔb. E yomè a, e gblɔ̃ na Elifaz so Temàn be: “Wò na àdɔ̀mèze nyèa le bì ɖo èwò kudo èxlɔ̃ wò èvè kpɔ̀tɛawo ŋuti. Nyàwo a, mì mu to nyàwo so ŋuti nyè sìgbè lekè sumɔ̃vi nyè Yɔb wɔ̀ ɛ̀a nène ò.

⁸Eye fifìa mì sɔ ènyì-su adrɛ̃ kudo àgbò adrɛ̃, eye mì yì sumɔ̃vi nyè Yɔb gbɔ. Mì la yì wɔ̀ ènumème vɔsa ku èlã kèawo na mìa ɖokoe. Wàlɛbɛ ŋua, Yɔb la fãkue ɖo mìa ta, eye mù la xɔ̀ yebe kuefãa. Nène a, nyè mu la do mì ŋùkpɛ̃ ò. Co mì mu to nyàwo so ŋuti nyè sìgbè sumɔ̃vi nyè Yɔb nène ò.”

⁹Elifaz so Temàn, Bildàd so Cuhà kudo Sofàr so Naamà, wo yì wɔ̀ ènu kè Tɔhonɔ̀ gblɔ̃ na woa. Eye Tɔhonɔ̀ lɔ̃ xɔ̀ Yɔb be kuefãa.

¹⁰Wàlɛbɛ kè Yɔb le fãkue ɖo èxlɔ̃awo taa, Tɔhonɔ̀ trɔ sɔ yebe àdɔ̀kùnuwo na ɛ̀. E gbà na ɛ̀ wu sãa, zè gbɔ̀ zè èvè.

¹¹Eye Yɔb be nɔ̀vi ŋusùwo, nɔ̀vi nyɔ̃nùwo, àmè kèwo keŋu jèsi ì sã va yìa, wo va ji ì kpɔ. Wo ɖùnu kudo è, ɖè woabe lɔ̃lɔ̃ fiɔ ɛ̀ eye wo do bàbà na ɛ̀ ɖo jɔ̀gbèvuɛ̃ kè kpe èa ta. Àmè sia àmè na ɛ̀ ègà kudo sìka lɔ̀gàvi.

¹²Tɔhonɔ̀ ɖùɖù sìtu kɔ̀ ɖo Yɔb ji lè yebe àgbènɔ̀-zã kpɔ̀tɛawo mè. Nyàwoa, Yɔb ɖo ègbɔ sù hotu adrɛ̃, èsɔ èkpotɔnɔ̀ sù hotu ètɔ̃, ènyì kèwo dànà àgblèa hotu ɖèka kudo èsɔ àkɛtɛ hotu mamã mè.

¹³E gbà jì èvi ŋusù adrɛ̃ buwo kudo nyɔ̃nùvi ètɔ̃.

¹⁴E ɖo nyikɔ na nyɔ̃nùvi cucugbã tɔ̀a be “Àhɔ̃ne”, èvègɔ̃a be “Kanèl be sepòpo” eye ètɔ̃gɔ̃a be “Ŋùkuvi be vɔ̃vɔ̃lì”

¹⁵Lè èdùa kpata mèa, nyɔ̃nù ɖe mu lè kè jètùgbɛ̀jɛ sɔ̀ kudo Yɔb be èvi nyɔ̃nùawo ò. Woa tɔ Yɔb na wo ècrɔ̃nu sìgbè ŋusùviawo ke nène.

¹⁶Lè eŋuã yomè a, Yɔb gbà nɔ̀ àgbè èpè èkà ètɔ̃ takpo. E teŋu kpɔ èviawo kudo woabe tɔgbe tɔ̀gbè yɔviwo kaka xɔ̀ jìjimè ènè sɔ̃ŋu.

¹⁷E yomè a, e ku lè sĩsĩ mè, wàlɛbɛ kè be nɔ̀ àgbè dìdi ɖe a.