Read gen Yɔb 6 Bible Online

Yɔb 6 - gen bible

Yɔb 6

¹Yɔb ɖo e ŋuti gblɔ̃ be:

²Oò! Mù ji be woa dà vevesèse nyèa kpɔ, ne wo la teŋu dà gbledo nyèa kpɔa, e la nyɔ!

³Ɛ̃ɛ, e kpɛ̃ wu àpùta-kɔ, ènu kèa ŋuti ye mù le gblɔ̃ ènyà kè mu jè òa.

⁴Ŋusɛ̃kpatatɔa ŋɔ mù kudo yebe àŋùtiwo, eye woabe àɖia ɖɔ mù keŋu. Mawu be ŋusɛ̃ jiŋɔwo sitè ɖo ŋuti nyè.

⁵Èsɔ àkɛtɛ dona àpa lè ègbe mumu gbɔa? Ènyì mu trɔna ŋùgbe do ègbe ò.

⁶Wo la teŋu ɖù ènu kè mu vivi òa, èjè màdoa? Àzì mumu be ɣe cã vivinaa?

⁷Nyè mu le ji la ɖù ènuɖùɖu ŋua ò. Àyàɖùɖu nyèa ye nyi ènuɖùɖu kè tìkɔ̀ na mù a.

⁸Mù jro be àmè ɖe ne ɖo biɔbiɔ nyèa ŋuti, Mawu ne na mù ènu kè mù le jia.

⁹Ne e jro fifìa be yèa tùkù mù a, eŋuã ne kɔ yebe àbɔ sɛ̃ŋua yì ji, ne bèa crɔ̃ mù!

¹⁰Mù la ɖuwè lè vevesèse sɛ̃sɛ̃wo be dòdòmè, ɖo mù ɖo àsiɖoàkɔ-nya ɖe: Nyè mu ŋlɔ̀ Mawu kɔ̀kɔ̀ɛa be ènyàwo be ò.

¹¹Vɔ̀, ŋusɛ̃ mu gbà lè ŋuti nyè ne ma dojì ò: àlè kɛ ye gbà lè àgbèa mè ò? Ŋùɖo mu gbà lè àsi nyè ò.

¹²Èkpe ye mù nyi ne ma dojì lè ènu ɖekpekpe be ŋùkɔ̀a? Gàjɛ̃ ye nyi àmèti nyèa?

¹³Ènu ɖekpe mu gbà lè ènyè mè la do mù àlɔ̀ ò, àlɔ̀do vitukuia cã hùe do mù.

¹⁴Àmè kè gbɔjɔa, hiã ŋusɛ̃ dodo so ye havi gbɔ, ne mu gbà ɖo bùbu na Ŋusɛ̃kpatatɔa cã òa.

¹⁵Èxlɔ̃ nyèwo be ènu to lè ŋùmè na mù kpakpla sìgbè ètɔ̀ sàsra kè pua nène, sìgbè ètɔ̀ kè mu ɖo èsì òa nène.

¹⁶Ne fàfa hùenu be vɔ̀vɔnu ɖo, èsìkpewo srènà eye ètɔ̀ sàsrawo ɖɔna kaka gbãnàgo.

¹⁷Vɔ̀, lè èkuɖìɖi hùenua, wo puna kpakpla. Zòzo hùenua, èsì mu gbà nɔ̀nà woa mè ò.

¹⁸Èmɔzɔ̃tɔwo mu gbà va tona e gbɔ tètè ò, wo jina èmɔ̃ lè zògbèa ji kaka yì kuna.

¹⁹Temà kudo Sebà be èmɔ̃zɔ̃tɔwo le ji èsì sàsra ŋuawo, wo sɔ woabe ŋùɖo dà ɖo woa ji.

²⁰Wo xɔ̀sè be èsì lè woa mè, vɔ̀ e yomè a, wo sè vève: kè wo va ɖo funua, e wɔ̀ wo bàɖàa.

²¹Nène a ye mì lè na mìa xlɔ̃a. Kè mì kpɔ gbledo nyèa, vɔ̃vɔ̃ ɖo mì.

²²Mù biɔ mì ènu ɖe a? Mù gblɔ̃ na mì be: mì yì sɔ mìabe àdɔ̀kùnuwo be àkpa ɖe va na mù a?

²³Mì hlùɛ̃ mù lè kɛ̃tɔa sia? Mì xɔ̀ mù plè lè àmè vuɛ̃ a sia?

²⁴Mì kɔ̀ susu mè na mù eye mù la bɔ̀nu, mì ɖè àgɔ̀jèje nyèwo mè na mù.

²⁵Nyàwototo gbɔ̀nà àgbè àmè. Vɔ̀, ènu kɛ be ènyà mì le hɛ̃ kudo mù ò?

²⁶Ènyà kèwo mù gblɔ̃awo ye à? Vɔ̀, àmè kè bu ŋùɖoa be ènyà vàvlà ɖo àya mè ye!

²⁷Mì le ji la dà àkɔ̀ na cɔɛvi ye à! Mì le ji la yì sà mìa xlɔ̃a cã a!

²⁸E nyɔ̃, mì kpɔ mù nyuɛ̃ ɖe: mù le ɖà àjè a?

²⁹Mì trɔ va, mì mu gbà wɔ̀ màjɔ̀ màjɔ ò. Mì kpɔ ɛ̀ be nyè mu nya èɖe lè e mè ò.

³⁰Àgɔ̀jèje ɖe mu lè ènyè mè ò. Eye nyè mu teŋu do jèsi èvuɛ̃a?