Read gen Yɔb 7 Bible Online

Yɔb 7 - gen bible

Yɔb 7

¹Yɔb gbà gblɔ̃ be: Nyàwo ye, àgbèa sɛ̃sɛ̃ lè ànyigbã kèa ji. E lè sìgbè àgbãtèsɔtɔ be àgbè nène.

²Sìgbè kluvi le ji jɛ̃gbɔ̃pe nène àlo sìgbè àgbãtèsɔtɔ kè le tɔtè kpɔ yebe fɛ̃tua nène.

³Ènu ɖèka kpò wo nyi na mù! Àgbè nyèa trɔ zũ ènu gbalo so kaka wètri ɖewo kèa. Ŋùkèkè nyèwo trɔ àyàɖùɖu na mù.

⁴Ne mù mlɔ̃ ànyi a, mù trɔna lè àba ji, gblɔ̃nà be gàkɛ mè ye èŋù la kè ò.

⁵Àvlɔkuiwo ye le ɖìsà lè ŋutilã nyèa ŋuti eye àgbàze nyèa fo kpàcà-kpàcà sìgbè ànyigbã nène. Àgbàze nyè le fɛ̃, eye àpe àbìwo le sìɔ̃sì.

⁶Àgbè nyè a va yì kaba sìgbè àvɔlɔ̃tɔ be àbuyɛ nène. E la nɔ̀tè ne ŋùɖo be èkà kpɔ̀tɛa gbe vɔ̀ kpòa.

⁷Ɖoŋùku eji, Oò Mawu: àgbè nyèa, àya gbɔ̃gbɔ̃ kpò be nyi. Àpe ŋùkuwo mu la gbà kpɔ nyɔna kpɔ ò.

⁸Èwò kè le kpɔ mù a, wò mu la gbà kè ɖo ŋuti nyè ɖe ò. Wàlɛbɛ kè wò la ji mù a, wò mu la gbà kpɔ mù ò.

⁹Àmè kè tùtà èkuwodea, lè sìgbè lili kè le yì kaka, la bua nène.

¹⁰Mu gbà va zena ke ò. Mu gbà trɔna va yebe àxomè ò eye àmè kèwo jèsi ìa, wo ŋlɔ̀nàbe è.

¹¹Ekèa ŋuti ye nyè mu la teŋu bɔ̀nu ò, èhlò mè tu na mù, eŋuã mù ɖo la pò nupo. E wɔ̀ mù bàɖà eye mù gbɔjɔ, eŋuã mù la jèhùɛ.

¹²Nukɛ ŋuti ye wò le ɖia mù nène ò? Mù vejè kpàa sìgbè àpù nène loo àlo mù nyrãku sìgbè àpù mè be blòsò nène ye à?

¹³Ne mù mlɔ̃ ànyi a, mù gblɔ̃nà be: “Àlɔ̃ la na mù la ɖì domè, èzã la ɖè vevesèse nyèa kpɔ̀tɔ̀”

¹⁴Vɔ̀, wò le do vɔ̃vɔ̃ na mù kudo èdrɔ̃ bàɖàwo kuku, ènu kèwo wò le ɖèfiɔ mù a, nana mù hũhũna.

¹⁵Mù jro be wòa le ève na mù ne ma ku! Ne mù kua, e nyɔ wu be ma kpɔ̀tɔ̀ nɔ ɖù àyà!

¹⁶E tìkɔ̀ na mù! Nyè mu la nɔ̀ àgbèa kaka yì ò. Àgbè nyèa, àya gbɔ̃gbɔ̃ kpò be nyi. Nène a, tàsi mù ne ma yì kpò!

¹⁷Àsìxɔ̀xɔ kɛ ye lè àgbètɔ xòmè si kaka ye wò bù ye ŋuti kpɔ ò? Nukɛ be ŋùku ye wò le le ɖo ŋuti leke ò?

¹⁸Wò biɔna ɛ̀ àkɔ̃ŋùta ŋùdekɛ̃nyɛ siasìa, wò lena ŋùku ɖo yebe àsìxɔ̀xɔ ŋuti gà sia gàmè.

¹⁹Gà kɛ mè ye wò la jìjɔ àpe àmètia kpɔkpɔ ò? Tàsi mù ne ma mì ètã viɖe tètè jro!

²⁰Mù wɔ̀ èvuɛ̃ ɖe a? Eye nukɛ eŋuã la wɔ̀ na wò, èwò kè le ɖia àgbètɔ xòmèa veku-vekua? Nyè ɖèka ŋuti kpò wò le pò àmèwo ɖo. Nukɛ ŋuti be lè nène ò? Àgbã mù nyi lè èkɔ̀ ji na wòa?

²¹Wò mu la teŋu dojì xɔ̀ àpe nuvuɛ̃wo, la sɔ àgɔ̀jèje nyèwo sɔ kèa? Mù la ku zãɖe yà, la trɔ yì ànyigbã mè. Wàlɛbɛ kè wò la ji mù a, nyè mu la gbà nɔ̀ ànyi ò.