Read gen Yɔb 8 Bible Online

Yɔb 8 - gen bible

Yɔb 8

¹Nène a ye Bildàd so Cuhà xɔ̀ ènyàa gblɔ̃ na Yɔb be:

²Wò la kpɔ̀tɔ̀ nɔ gblɔ̃ ènyà ɖèka kaka na gà kɛ mè ò? Wò le bijì, le pò nupo sìgbè àya kè sɔa nène. Vɔ̀, kaka va na gà kɛ mè ò?

³Mawu trɔna èsea? Ŋusɛ̃kpatatɔa sɔna jɔ̀jɔɛ wɔ̀nà gɔ̃glɔ̃a?

⁴Ne èvi wòwo jè àgɔ̀ do Mawu a, wo tu ènugbegble kè wo wɔ̀a be èfɛ̃ na ɛ̀ vɔ̀.

⁵Vɔ̀, ne wò ya wò le ji Mawu, ne wò le fã yɔ Ŋusɛ̃kpatatɔa,

⁶Ne wò lè jɔ̀jɔɛ gbà wɔ̀nà ànùkua, e la kpɔ ji wò, la gbà ɖo tèpe kè jèa na wò.

⁷Ènu kè jɔ̀ ɖo ji wòa, mu la gbà ɖì ènu ɖe ò, ɖo èsɔ̀mè la nyɔ na wò fuu wu ekèa.

⁸Biɔ ènyà sè àmè kèwo nɔ̀ àgbèa jè ŋùkɔ̀ na mi va yìa, eye ɖoto woa tɔgbewo be àɖàŋùwo.

⁹Mia ya ɖèviwo ye mi nyi, eye mi mu nya ènuɖekpe ò. Miabe àgbè lè ànyigbã ji le sidù sìgbè vɔ̃vɔ̃lì nène.

¹⁰Vɔ̀ àmè kèwo kpɔ ànyigbã jè ŋùkɔ̀ na mia, la pò nupo na wò, eye wo la sɔ ènuhlùɛ̃ àmè nyà kèawo, lè woabe ènunyawo mè.

¹¹“Keti mu mìɔ̃ nà lè fikè ètãku mu lè ò, èko mu sĩnà lè fikè èsì mu lè ò.

¹²Ne èsì mu lè òa, e puna jè ŋùkɔ̀ na ègbe kpɔ̀tɛawo, wàlɛbɛ kè be kpɔ̀tɔ̀ lè yebe ekè ji eye wo mu kpɔ sò è òa!”

¹³Ènu kè jɔ̀nà ɖo àmè kèwo ye ŋlɔ̀be Mawu a, jia yeŋu. Nène ye àmè bàɖàwo be ŋùɖo buna yeŋu.

¹⁴Woabe kãkãɖoji buna woabe àkpoxɔ̀nu nɔ̀nà sìgbè èyeɖɔ nène.

¹⁵Wàlɛbɛ kè wo lè kã ɖo woabe àxue jia, mu nɔ̀nàtè ò ne wo le dojì ɖo e ŋutia, e mùnà gblò.

¹⁶Wo lè sìgbè àti kè ɖɔ kudo yebe èsì eye be le mìɔ̃ lè dɔ̃ŋùkusu gbèa nène, e vlũna yebe àlɔ̀zɛ̃ yeyewo ɖo àbɔ a ji.

¹⁷Yebe èkè kplìnyàwo mìɔ̃ nà lè èkpewo mè, àtia mìɔ̃ ɖo àkpã be gòglòpe.

¹⁸Vɔ̀, ne àmè ɖe hɔ̃ ɛ̀ lè fikè be lèa, ànyigbã la gblɔ̃ be yè mu kpɔ kpɔ ɛ̀ kpɔ ò.

¹⁹Nène ye àmè kèwo ŋlɔ̀be Mawu a, be nyɔna vɔ̀nà yeŋu! Eye àti bu mìɔ̃ nà ɖo woa tèpe.

²⁰Ào, Mawu mu crìnà àmè jɔ̀jɔɛ ò. Mu kpena ɖo àmè bàɖà ŋuti ò

²¹E la gbà do jìjɔɛ yeye àpo lãmè, E la na wò la gbà do jìjɔɛ be àpa.

²²Àpo kɛ̃tɔwo la ɖɔ kudo ŋùkpɛ̃, eye àmè bàɖàwo la crɔ̃.