Read gen Yɔb 9 Bible Online

Yɔb 9 - gen bible

Yɔb 9

¹Yɔb ɖo e ŋuti be:

²Ɛ̃ɛ, mù nya be nyàwo ye wò le to. Àgbètɔ be ènyà la teŋu jɔ̀ lè Mawu be ŋùkɔ̀a?

³Ne wo ji la hɛ̃ ènyà kudo èa, Mawu mu la ɖo ènyà ɖèka tètè ŋuti ò!

⁴Yebe nunya gòglò eye yebe ŋusɛ̃a trì àkɔ. Àmè kɛ ye la teŋu nɔ̀tè lè ŋùkɔ̀ na ɛ̀ eye mu la kpɔ e mè sonu ò?

⁵E ɖènà ètowo jo lè àɖàbà pòpo ɖèka mè eye e kãkãnà wo kudo àdɔ̀mèze.

⁶E nana ànyigbã hũhũna, e hũhũna sɔti kèwo ji ànyigbã a nɔ̀ ànyi ɖoa.

⁷E teŋu na dɔ̃ŋùkusu mu la to ò, eye e teŋu xe èmɔ̃ na wètriviwo ne wo mu gbà klɛ̃ ò.

⁸E ɖèka pɛɛ ye vlũ jiŋùkusiwo sìgbè àvɔ nène, eye e zɔ̃nà lè àpù srɔ̀kewo ji.

⁹E bɔ̀ wètriviwo vòvòvò: Sisiblìsi gã, wètrivi ènè kɔ̀ ceŋu-ceŋu, wètrivi adrɛ̃awo (kòklo-èvinɔ̀) kudo àpùgo be wètriviwo

¹⁰E wɔ̀ ŋùdãnu kèwo mè àmè ɖe mu la teŋu sè òa. Àmè ɖe cã mu la teŋu hlɛ̃ yebe wɔ̀na jɔ̀ àsuwo ò.

¹¹E to àhàda mè na mù va yì, vɔ̀, nyè mu kpɔ ɛ̀ ò. E le yì cã, nyè mu teŋu kpɔ ŋùgbedòmè na ɛ̀ ò.

¹²Àmè kɛ ye la hlùɛ̃ ènu kè be sɔ ŋusɛ̃ xɔ̀a lè e si ò? Àmè kɛ ye la teŋu dojì gblɔ̃ na ɛ̀ be: “Nukɛ ye wò le wɔ̀ ò?”

¹³Mawu mu tɔnatè yebe àdɔ̀mèze ò. Àpù mè be èlã bàɖàwo, màmiwàta kudo yebe àgbàsìviwo do ènu gũ lè yebe àfɔ̀wo gbɔ.

¹⁴Ènu kèa ŋuti ye nyè mu la teŋu ɖo ènyà ŋuti na Mawu ò. Nyè mu ɖo ènyà ɖe la gblɔ̃ so e ŋuti ò.

¹⁵Ne àpe ènyà gbà jɔ̀ cã a, nukɛ ŋuti mù la hlùɛ̃ ɖokoe nyè ta ɖo ò? Mù la teŋu biɔ kòjoɖotɔ nyèa kpò be ne kpɔ ɖo e mè na mù.

¹⁶Ne e gbà ɖo àpe yɔyɔ ŋuti cã, nyè mu kã ɖo e ji be e le sè àpe kuefã ò.

¹⁷E le tɛ mù ɖo ànyi gbalo, e kpɔ̀tɔ̀ le do mù àbì gɔ̃mèsèse mà-ɖo.

¹⁸Mu nana mù èmɔ̃ ne ma gbɔ̃ viɖe tètè ò, vɔ̀ e le ɖɔ èjì nyèa kudo vève kaɖi kaɖi.

¹⁹E hiã be ma wɔ̀ àvũ kudo Mawu a? E ɖo ŋusɛ̃ wu mù fuu! E hiã be ma yɔ kòjoa? Vɔ̀ àmè kɛ ye la yɔ mù ne ma hlùɛ̃ ɖokoe nyè ta ò?

²⁰Ne àpe ènyà gbà jɔ̀ cã a, nupo nyèwo la do mù àgɔ̀jètɔ. Ne mù nyi ɖemànyatɔ cã a, e la be mù jè àgɔ̀.

²¹Vɔ̀, ɖemànyatɔ ye mù nyi nyàwoa? Nyè mu gbà nya ò. Àgbèa tìkɔ̀ na mù!

²²Tɔ̀ nyè gomèa, ɖemànyatɔ àlo àgɔ̀jètɔa, ènu ɖèka ye wo nyi. Ekèa ŋuti ye mù dojì gblɔ̃ be: “Mawu wùnà ɖemànyatɔ sìgbè àgɔ̀jètɔ ke nène.

²³Ne jɔ̀gbèvuɛ̃ ɖe va gblenu lè àgbètɔ xòmèa ŋutia, Mawu mu sɔna èɖe lè e mè na ɖemànyatɔ kèwo kua ò.

²⁴Ne èdù ɖe jè àglajòtɔ ɖe sia, Mawu miɔ̃na ŋùku na kòjoɖotɔwo! Ne e nyi be mu nyi e ye ŋutɔ ye le wɔ̀ ɛ̀ òa ɖe, eŋuã àmè kɛ ye ò?

²⁵Àgbèzã nyèwo va le yì sìgbè èdùputɔ nène, wo si va le yì ma ɖɔ nyɔna ɖe kpɔ.

²⁶Wo si piãŋu va yì sìgbè keti be àklo nène, sìgbè àlekè èhɔ̃ zrò va jènà ègbɔvi jia nène.

²⁷Mù gblɔ̃ na ɖokoe nyè be: “Ŋlɔ̀be àpo tamèbùbuwo, ŋùmè ne vlũ na wò ne wòa kpɔ jìjɔɛ.”

²⁸Vɔ̀ àyàɖùɖu nyè le do vɔ̃vɔ̃ na mù. Nyàwo ye be èwò Mawu ya wò mu xɔ̀ ɛ̀ sè be mù nyi ɖemànyatɔ ò.

²⁹Lè gbɔ wòa, mù ɖo la nyi àgɔ̀jètɔ! Nène a, nukɛ ŋuti ye wò gbà ɖèfũ na mù gbalo ɖo ò?

³⁰Ne mù gbà lè àɖi ŋutɔ cã a, ne mù gbà sɔ àkãŋù klɔ àsi ŋutɔ cã a,

³¹wò la zĩ mù ɖo ègbeɖiɖɔɛ mè, àpe àwùwo ŋutɔ cã la gbe mù.

³²Nyàwo, Mawu mu nyi àgbètɔ sìgbè ènyè ke nène ò. Nyè mu la teŋu ɖo ènyà ŋuti na ɛ̀ ò, eye mi mu la teŋu yì kòjoɖope cã ò.

³³Ènyàmèsòtɔ ɖe cã mu lè mia dòmè ne bèa sò ènyà na mi ò.

³⁴Ne ènyàmèsòtɔ ɖe lèa, e la xe èmɔ̃ na Mawu ne mu gbà pò mù ò. Eye vɔ̃vɔ̃ mu la gbà ɖo mù kaka be ma ku ò;

³⁵Mù la teŋu pò nupo kudo è àdìka mà so. Vɔ̀ mu nyi nène ò, nyè ɖèka pɛɛ kpò ye lè kudo àpe wudowo.