Read gen Èhàwo 102 Bible Online

Èhàwo 102 - gen bible

Èhàwo 102

¹Ènuwɔ̀donɔ̀ kè ŋusɛ̃ vɔ̀ na a be kuefã. E sɔ yebe èhùɛjèje ɖo ŋùkumè na Tɔhonɔ̀.

²Tɔhonɔ̀, ɖo èto àpe kuefã, ne wòa na àpa dodo nyèa ne sù gbɔ wò.

³Mù gbà wla àpo ŋùkumè do mù lè èfũ zã nyèwo mè ò. Pu èto ànyi ɖo ŋuti nyè, tɔ̀ na mù kaba lè àzã kè gbè mù la fã yɔ wòa.

⁴Ɖo àzã nyèwo nu va le yì sìgbè àzìzɔ nène. Eye àpe èpuwo le fiɔ̃ sìgbè ènu kè èzò fiɔ̃a nène.

⁵Èjì nyè yrɔ̀, gbà pu sìgbè ègbe nène. Ekèa na be mù ŋlɔ̀nabe ènu ɖùɖu cã.

⁶Mù le ŋɛ̃ kaka be èpu nyèwo ku àgbàzea kpò ye kpɔ̀tɔ̀.

⁷Mù lè sìgbè àluge nène lè zògbè ji, mù gbà ɖì àzexe lè àxue kè gbãa mè.

⁸Mù ci ŋùzɔ̃, eye mù lè sìgbè xèvi kè ci àkòŋùgò lè èxɔ̀ taa nène.

⁹Àpe kɛ̃tɔwo le dovlo mù tɛ̀gbɛ̀. Wo sitè ɖo ŋuti nyè eye wo le sɛ̃kpɛ̃ na mù màjìjɔ.

¹⁰Hũhũ ye nyi àblo kè mù le ɖù, eye àɖàsì nyèa ye trɔ zũ èsì nùnu na mù.

¹¹Ɖo Tɔhonɔ̀, wò bijì do mù, àpo àdɔ̀mèzea dà mù ɖo àzɔ̀ge boo.

¹²Àgbè ŋùkèkè nyèwo le yì sìgbè vɔ̃vɔ̃lì kè le ɖo èxɔ̀a nène, eye mù jo pu sìgbè ègbe nène.

¹³Vɔ̀a, èwò Tɔhonɔ̀ ye nyi èfìɔ tɛ̀gbɛ̀ eye ŋùɖo wòa lè kaka sɔ yì.

¹⁴Ɛ̃ɛ wò la so, la ku ŋuzĩzĩ na Yèruzàlɛm, ɖo àzãa sù vɔ̀. Nyàwo, ɖàgbè kè wò la wɔ̀ na ɛ̀a be àzã sù.

¹⁵Ɖo àpo sumɔ̃viawo lɔ̃nà èkpewo. Woabe hũhũa ŋutɔ cã vena na wo.

¹⁶Eye Tɔhonɔ̀ be nyikɔ la ɖo vɔ̃vɔ̃ na dùkɔ̃wo eye èfìɔwo la ɖo sìsi na àpo gogoa.

¹⁷Ne Tɔhonɔ̀ gbìgbɔ̀ tù Ziɔ̀n be èdùa, e la ɖè yebe gogoa fiɔ.

¹⁸E la le ŋùku ɖo ènuwɔ̀donɔ̀ be kuefã ŋuti, eye mu la ɖèkɔ̀ lè yebe biɔbiɔwo ŋuti ò.

¹⁹Wo la ŋlɔ̀ ekèa dà ɖɛ na ŋùgbesitɔwo eye àmè kèwo la va jɔ̀ a la kafu Tɔhonɔ̀.

²⁰Ɖo e kpɔnu so yebe àxue kɔ̀kɔ̀ɛ be cicria mè; Tɔhonɔ̀ ɖèkɔ̀ kpɔ ànyigbã so jiŋùkusi.

²¹Sɔ sè gàmènɔ̀tɔwo be ŋɛ̃ŋɛ̃, ne bèa ɖè ègà àmè kèwo lè èku mèa.

²²Eye wo la kafu Tɔhonɔ̀ be nyikɔ lè Ziɔ̀n, wo la jì kafu-hawo lè Yèruzàlɛm.

²³Wàlɛbɛ ŋuã dùkɔ̃wo kudo fìɔduwo kpata la bɔ̀ ɖodu sɔ sɛ̃ Tɔhonɔ̀.

²⁴Tɔhonɔ̀ sòkà lè lãmè na mù lè àgbè mɔa ji; e ɖè àpe àgbèzãwo ji kpɔ̀tɔ̀.

²⁵Ekèa ŋuti ye mù gblɔ̃ be: “Mawu, mù gbà xɔ̀ àgbèa lè àsi nyè kaba ò; èwò kè lè na àkɔwo kpata kpataa!”

²⁶So blèmà blèmà ye wò li ànyigbã be dodoe, eye jiŋùkusi nyi àpo àlɔ̀nudɔ.

²⁷Wo la va yì, vɔ̀ èwò ya, wò la nɔ̀ ànyi tɛ̀gbɛ̀. Jiŋùkusi kudo ànyigbã la doxo sìgbè àvɔ nène. Wo la dɔ̀lì wo sìgbè àwù nène, eye wo mu la gbà nɔ̀ ànyi ò.

²⁸Sĩ vɔ̀a, lekè wò lèa kpò wò kpɔ̀tɔ̀ lè eye àpo àgbèa mu ɖo vɔ̀vɔnu ò.

²⁹Àpo sumɔ̃viwo be jìjimèwo la nɔ̀ ànyi, eye woabe nukuwo la likè goŋu lè àpo ŋùkumè.