Read gen Èhàwo 103 Bible Online

Èhàwo 103 - gen bible

Èhàwo 103

¹David tɔ̀. Mù jro la do àkpe na Tɔhonɔ̀, mù jro la do àkpe na Mawu kɔ̀kɔea so kaka èjì mè ke.

²Ɛ̃ɛ, mù jro la do àkpe na Tɔhonɔ̀ eye nyè mu la ŋlɔ̀be yebe ɖàgbè wɔ̀wɔ ɖekpe ò.

³Àmè kè sɔna nuvuɛ̃ nyèwo kpata kènà eye e dànà èdɔ̀wo kpata na mù a.

⁴Àmè kè ɖè àpe àgbè to lè cɔ̃crɔ̃ mè eye e sɔ hòmèfà lɔ̃lɔ̃ kudo màje sɔ cɔ̃ èta na mù.

⁵E nana mù ènu nyuɛ̃wo mù ɖùnà ɖɔnapò. Ekèa nana àpe ɖèkajɛ mè gbìgbɔ̀ wɔ̀nà yeye sìgbè èhɔ̃ tɔ̀ nène.

⁶Tɔhonɔ̀ wɔ̀nà ànùkua gbà sònà jɔ̀jɔɛ na àmè mà-ɖo àmèwo.

⁷Tɔhonɔ̀ ɖè yebe èmɔ̃wo fiɔ Mosè gbà ɖè yebe wɔ̀nawo fiɔ Izràɛlviwo.

⁸Tɔhonɔ̀ nyi ŋuzĩzĩ ɖèɖe gbà nyi màje ɖèɖe, mu bina èjì veku-veku ò, e nyi hòmèfatɔ gã ɖe.

⁹Mu hɛ̃nà ènyà ku àmè gbè sia gbè ò, mu wlana yebe àdɔ̀mèze ɖo èjì mè kaka sɔ yì ò.

¹⁰Mu wɔ̀nà kudo mi ɖo miabe vuɛ̃wo nu ò, nènea ke mu dɔ̃nà èto na mi ɖo miabe àgɔ̀jèjewo ta ò.

¹¹Ɖo sìgbè àlekè jiŋùkusi lè boo lè ànyigbã gbɔa, nène sɔ̃ŋu yebe lɔ̃lɔ̃ lè na àmè kèwo dona bùbu e ŋutia.

¹²Sìgbè àlekè èwèzɛ̃pe dìdì lè èwèɖoxɔ̀pe gbɔa, nène e ɖènà miabe àgɔ̀jèjewo joa yeŋu.

¹³Sìgbè àlekè ètɔ kuna ŋuzĩzĩ na èviawoa, nène ye Tɔhonɔ̀ kuna ŋuzĩzĩ na àmè kèwo dona bùbu e ŋutia yeŋu.

¹⁴E nya miabe ɖoɖomè, e ɖonaŋù be èkɔ ye mi nyi.

¹⁵Àgbètɔ be àgbènɔ̀zã lè sìgbè ègbe nène; e kènà see sìgbè zògbèji be èsepòpo nène.

¹⁶Eye ne àya pò to e jia, mu gbà nɔ̀nà ànyi ò, eye wo mu gbà jènàsi yebe tèpea cã ò.

¹⁷Vɔ̀a, Tɔhonɔ̀ be àdɔ̀mè nyuɛ̃ lè sɔ yì mà-vɔ mè na àmè kèwo ɖo bùbu na ɛ̀a. E kpɔ̀tɔ̀ la nɔ wɔ̀ ànùkua kaka sɔ yì.

¹⁸Na àmè kèwo lenabè na yebe zòɖùɖua eye wo le wɔ̀ ɖo yebe èsewo jia.

¹⁹Tɔhonɔ̀ li yebe fìɔzìkpea ɖo jiŋùkusi, yebe fìɔɖùɖu ɖù ènuwo kpata ji.

²⁰Mìa Tɔhonɔ̀ be àtikplɔtɔwo, mì do àkpe na Tɔhonɔ̀. Mì wɔ̀nà ɖo yebe ègbèɖèɖewo ji ku ŋusɛ̃, eye mì sènà ètonu na ɛ̀.

²¹Mìa Tɔhonɔ̀ be àhùakɔ̃wo, mì do àkpe na ɛ̀. Mìa yebe sumɔ̃vi kèwo sumɔna ɛ̀a.

²²Mìa Tɔhonɔ̀ be àlɔ̀nudɔwo kpata, mì do àkpe na Tɔhonɔ̀ lè yebe jiɖùpewo kpata. Eye nyè cã mù la do àkpe na Tɔhonɔ̀.