Read gen Èhàwo 104 Bible Online

Èhàwo 104 - gen bible

Èhàwo 104

¹Do àkpe na Tɔhonɔ̀, Oò! Èkla nyè. Tɔhonɔ̀ Mawu nyè, wò lòlò ŋutɔ. Wò sɔ bùbu ku nyiɖìɖi sɔ wɔ̀ àwù do.

²Wò sɔ kɔ̀kɔ̀ɛ sɔ wɔ̀ àvɔ cɔ̃. Eye wò vlũ jiŋùkusi sìgbè èxɔ̀gbàdenu nène.

³Wò ɖo nɔ̀pe wòa ɖo lilikpowo be èta mè boo. Wò sɔ lilikpo sɔ wɔ̀ àhùakèkevi, eye wò sɔ àya sɔ wɔ̀ àwàda kèwo wò sɔ zrònà.

⁴Àyawo nyi àpo àmèdɔ̃dɔ̃wo, eye èzò be àɖewo nyi àpo sumɔ̃viwo.

⁵Wò li ànyigbã ɖo yebe dodoewo ji eye mu la hũhũ kpɔ ò.

⁶Wò sɔ èsì cɔ̃ e ji sìgbè àvɔ nène, eye èsìa yì ji wu ètowo cã.

⁷Vɔ̀ e sina lè àpo àmè jizĩzĩ be ŋùmèkãkã mè. E miɔ̃ hũi lè àpo èji be ègbèɖèɖe nu.

⁸Eye e lia ètowo, gbà ɖiɖi jè bàlìwo mè kaka yì kɔ̀ ɖo fikè wò ɖo be bèa yì nɔ̀a.

⁹Wò wɔ̀ lipò kè èsìwo mu la gbà fla gbèɖe òa na ɛ̀. Nène a, mu la gbà va gbã kaka la xɔ̀ ànyigbã ji ke ò.

¹⁰Wò ta èmɔ̃ na èsìwo so kaka woabe jɔ̀sope yì èsì sàsrawo mè. Eye wo srànà to ètowo dòmè.

¹¹Gbemèlãwo kpata kpɔna èsì nùnà lè woa mè. Ègbemè be èsɔ àkɛtɛwo be ètù fana lè woabe sìkɔtìamèwo nu.

¹²Woawo to ye àyamè xèviwo wɔ̀nà woabe àtɔ̃wo ɖo, nɔ jì èhà lè àti be àlɔ̀zɛ̃wo mè.

¹³So kaka jiŋùkusi ye wò na èsì jànà kɔ̀ ɖo ètowo ji. Wò lena ŋùku ɖo e ŋuti ne èsì bèa sù ànyigbã.

¹⁴Wò nana ègbe mìɔ̃ nà na èlãwo kudo gbekuiwo na àgbètɔ be zãzãwo. Nène a ye ànyigbã nana ènuɖùɖu vòvòvòwo.

¹⁵Vɛ̃ nana àgbètɔ be èjì hayana, eye yebe ŋùmè wɔ̀nà wɛwlɛ sìgbè àmì kè le sràa nène. Eye ènuɖùɖuwo ya nana ŋusɛ̃ àmè.

¹⁶Tɔhonɔ̀ be àtiwo ɖɔ kudo èsì vivi, Libàn be sedàti kèwo wò do a.

¹⁷Funu ye xèviwo wɔ̀nà àtɔ̃ ɖo, eye èglò sɔna èkpo be sedàtiwo mè wɔ̀nà nɔ̀pe.

¹⁸Èto gãgãwo nyi ègbɔ-dɔ̃-ètewo be tabèpe, eye àkpã totrowo nyi àgbògbò na wɛ̀tɛ̀klɛ̀wo.

¹⁹Tɔhonɔ̀ wɔ̀ wètri sɔ do mamã hùenuwo dòmè eye wò na èwè nya yebe èxɔ̀ɖoɖo be gàmè.

²⁰Wò ɖo vìvìti, e ye le nyi èzãdodo, kè mè gbemèlãwo kpata ɖìnàsà lè.

²¹Eye jãŋùtaviwo kpata gbona lè, sɔ jina ènu kè wo la lea. Wo biɔna woabe ɖùɖua so Mawu simè.

²²Eye ne èŋù kèa, wo bɔ̀nà woa nɔ̀nɔwo, yì mlɔ̃na ànyi lè woabe èdowo mè.

²³Àgbètɔwo to yìnà woabe èdɔwɔ̀wɔwo gbe, eye wo yì jènà àgbàgba kaka ɖo wètrɔ mè.

²⁴Tɔhonɔ̀, wò wɔ̀ èdɔ jiŋɔ sùgbɔ! Wò wɔ̀ woa kpata ku ènunya. Ànyigbã ji ɖɔ kudo àpo ènu nyuɛ̃ kèawo.

²⁵Àpùa cã yeŋuã. E kèkè gbàjà gbà wɔ̀ ègũ. Èlã wiwli ku gãgã èdòmàlè-ŋutiwo blìbɔ̀nà lè e mè.

²⁶Àpùjihũwo zɔ̃nà e ji yìnà, Blòsò kè wò ɖo, be bèa nɔ jròwoe lè e mèa, lè funu.

²⁷Ekèawo kpata le kpɔ àsi wò nu ne wòa na wo nuɖùɖu ɖo àmè hùenu.

²⁸Ne wò kè àpo àlɔ̀a, wò nana wo ènu nyuɛ̃wo eye wo ɖùnà, ɖɔnapò.

²⁹Ne wò wla àpo ŋùmè do woa, wo cina siayi; ne wò xɔ̀ gbɔ̃gbɔ̃a lè woa sia, wo kuna eye wo trɔna ɖiɖɔɛ, yìnà ànyigbã mè.

³⁰Ne wò trɔ na wo gbɔ̃gbɔ̃a, wo gbɔ̀nà àgbè; eye wò gbìgbɔ̀ wɔ̀nà ànyigbã be ŋùkumè yeye.

³¹Tɔhonɔ̀ be gogo ne nɔ̀ ànyi kaka sɔyì! Tɔhonɔ̀ ne jɔ̀jì ɖo yebe èdɔwo ŋuti.

³²Ne wò ɖèkɔ̀ kpɔ ànyigbã a, e hũhũna; eye ne wò tɔ àsi ètowo kpòa, wo tùnà àzìzɔ.

³³Mù la jì èhà na Tɔhonɔ̀ kaka kè mù lè àgbèa. Mù la jì kafu-ha na Mawu nyè, kè mù gbe lè àgbè kpòa.

³⁴Na ne àpe susuwo ne nɔ jè ŋùmè na wò, Tɔhonɔ̀. Mù le jɔ̀jì ɖo Mawu nyè ŋuti.

³⁵Na ne ènu bàɖàwɔ̀tɔwo ne crɔ̃ lè ànyigbã ji eye àmènyrãkuwo mu gbà nɔ̀ ànyi ɖe ò. Ɛ̃ɛ, mù le do àkpe na Tɔhonɔ̀. Mì kafu Tɔhonɔ̀!