Read gen Èhàwo 105 Bible Online

Èhàwo 105 - gen bible

Èhàwo 105

¹Mì do àkpe na Tɔhonɔ̀, mì nɔ yɔ yebe nyikɔ. Mì ɖè yebe ènujɔ̀asuwo fiɔ lè dùkɔ̃wo dòmè.

²Mì jì èhà na ɛ̀, mì jì èhà viviwo na ɛ̀. Mì pò nupo so yebe ŋùdãdɔwo kpata ŋuti.

³Mì nɔ go lè yebe nyikɔ kɔ̀kɔ̀ɛa mè, mì àmè kèwo le ji Tɔhonɔ̀a, mì jɔ̀jì.

⁴Mì trɔ va ji Tɔhonɔ̀ ŋusɛ̃kpatatɔa, mì nɔ ji yebe ŋùmè tɛ̀gbɛ̀.

⁵Mì ɖoŋù yebe ŋùdãdɔ kèwo be wɔ̀a, mì nɔ ɖoŋù yebe ŋùdãdɔ ku ènyàmèsòsowo.

⁶Mìa Tɔhonɔ̀ be sumɔ̃vi Abràham be jìjimèviwo, mìa Yakɔb, yebe àmècãcã be viwo.

⁷Tɔhonɔ̀ ye nyi miabe Mawu; e ye le kplɔ̀ ànyigbã kpata.

⁸E ɖonaŋù yebe èzòɖùɖua ji tɛ̀gbɛ̀, ku ègbè kè e na, sɔ na àkɔwo kpata kpata.

⁹Èzòɖùɖu kè e wɔ̀ kudo Abràham, eye e kã yebe àtãŋu na Izàk.

¹⁰E ɖokpe e ji na Yakɔb to èse ji, ekèa ye le nyi zòɖùɖu mà-vɔ na Izràɛl.

¹¹Kè e gblɔ̃ be: “Mù la sɔ Kanàn be ànyigbã a na wò, e la nyi àpo ècrɔ̃nu.”

¹²Mia tɔgbewo mu sùgbɔ wàlɛbɛ ŋuã ò. Àmè viɖe kpò wo nyi lè àmèjro-nyigbã ŋuã ji.

¹³Wo sã lè ànyigbã ɖe ji yì èbu ji, so èfìɔdu ɖe mè yì èfìɔdu bu mè.

¹⁴Vɔ̀a, Tɔhonɔ̀ mu na èmɔ̃ àmè ɖe ne tɛ̃ŋùkuvi do wo ò. Ɛ̃ɛ e dɔ̃ èto na èfìɔwo ɖo woa ta.

¹⁵E gblɔ̃ be: “Mì mu gbà tɔ àsi àpe àmè ɖèɖovòwo ò, mì mu gbà wɔ̀ ènu bàɖà ɖekpe ku àpe gblɔ̃ɖɛtɔwo ò.

¹⁶E na àdɔ̀ to lè ànyigbã ji eye ènuɖùɖu dɛ̃ keŋu-keŋu.

¹⁷Vɔ̀a, e dɔ̃ àmè ɖe jè ŋùkɔ̀ na wo: e kè le nyi Yosɛ̀f, àmè kè wo sà sìgbè kluvi nènea.

¹⁸Wo do àmèviga àfɔ̀wo na ɛ̀, eye wo sɔ ɛ̀ yì dogà,

¹⁹kaka sɔ na gbè kè gbè yebe ènyà va va e mè, eye Tɔhonɔ̀ ɖè kunù na ɛ̀.

²⁰Ejiptè be èfìɔa ɖègbè be woa ɖè àsi lè e ŋuti, dùkɔ̃wojiɖùtɔa ɖè è to lè ègàkpaa mè.

²¹E sɔ ɛ̀ ɖo àpetɔ ɖo yebe àxuea nu, eye e le kpɔ yebe ènunɔ̀amèsiwo keŋu ji.

²²Yosɛ̀f fiɔ yebe ɖoɖowo yebe èdùdɔnunɔ̀tɔwo e gbà fiɔ ènunya yebe ètopòɖotɔwo

²³E yomè a, Izràɛl cã va Ejiptè, eye Yakɔb trɔ zũ àmèjro lè Cam-nyigbã ji

²⁴Eye Tɔhonɔ̀ na yebe dùkɔ̃a jì èvi fuu e gbà na Izràɛlviwo ɖo ŋusɛ̃ wu woabe kɛ̃tɔwo.

²⁵E trɔ Ejiptèviwo be èjì, kaka wo crì Izràɛl. Eye wo xɔ̀nà èkpli na yebe dùkɔ̃a.

²⁶Nène a, e dɔ̃ yebe sumɔ̃vi Mosè kudo Arɔ̀n kè ye ŋutɔ cã a.

²⁷Mawu na wo wɔ̀ ŋùdãdɔwo lè Ejiptèviwo dòmè.

²⁸Mawu na ye vìvìti cɔ̃ wo ji sìgbè èzã nène eye àmè ɖekpe mu teŋu gbe yebe ègbè ò.

²⁹E na woabe ètɔ̀wo trɔ zũ èhũ, eye e na èlãvivo keŋu ku.

³⁰E na woabe ànyigbã ɖɔ ku àbìtowo kaka yì kɔ̀ ɖo woabe èfìɔa be àxuewo mè.

³¹Mawu ɖègbè eye tɔ̀bɔ̀su ɖù àmèwo ku èmuwo va cɔ̃ Ejiptè be èdùa kpata ji.

³²E na èsìkpe wuwli jà ɖo èji be tèpe, eye èzò vlàvlà kɔ̀ ɖo ànyigbã ji.

³³E gbà sò woabe vɛ̃kawo ku èvòtiwo pu ànyi, eye e ŋɛ̃ woabe àgbonu-tiwo.

³⁴E ɖègbè eye hùesuvi kudo èŋɔviwo va ɖo gbãŋu-gbãŋu.

³⁵Wo ɖù ègbekuiwo keŋu lè woabe ànyigbã ji, gbà ɖù àgblèmènukuwo kpata.

³⁶E gbà wù Ejiptètɔwo be ŋùkɔ̀gbevi ŋusùwo, woa tɔwo be àlìmè be ŋusɛ̃ cucugbã tɔ̀awo.

³⁷E yomè a, e kplɔ̀ mia tɔgbewo to lè Ejiptè ku klòsalò kudo sìka. Eye ɖɔ̀ɖɔɛnɔ̀ ɖekpe mu nɔ̀ woabe kɔ̀tawo mè ò.

³⁸Wàlɛbɛ kè wo joa, èjì jɔ̀ Ejiptèviwo ŋutɔ ɖo wo do vɔ̃vɔ̃ gã ɖe na wo.

³⁹Mawu vlũ lilikpo sɔ cɔ̃ woa ji ne kɛ̃tɔwo mu gbà kè ɖo woa ŋuti ò eye lè èzã mèa, e nana wo èzò kè kɔ̀nà woabe àfɔ̀topewo.

⁴⁰Vɔ̀a, wo biɔ ènuɖùɖu eye Mawu hlɛ̃ tèkliviwo ɖo woa ji eye wo cã kpɔ̃nɔ so èji[15].

⁴¹E hũ ènu lè àkpã nu, eye èsì ɖùɖù srà to zògbè nyigbã ji sìgbè ètɔ̀ nène.

⁴²Ɛ̃ɛ, Mawu ɖoŋùku yebe àjɔ̀gbè kɔ̀kɔ̀ɛ kè e fìã na Abràham, yebe sumɔ̃via ji.

⁴³Eye e kplɔ̀ yebe dùkɔ̃a to ku jìjɔɛ, yebe àmè cãcãwo le jì èhàgbè viviwo.

⁴⁴E yomè a, e sɔ dùkɔ̃ buwo be ànyigbã na wo eye wo kpɔ gomè lè èdɔ kè dùkɔ̃awo wɔ̀a mè.

⁴⁵Ekèa, ne woa teŋu le ŋùku ɖo yebe kɔ̀dowo ŋuti, gbà nɔ kpɔ yebe èseawo ji. Mì kafu Tɔhonɔ̀.