Read gen Èhàwo 106 Bible Online

Èhàwo 106 - gen bible

Èhàwo 106

¹Mì kafu Tɔhonɔ̀! Mì do àkpe na Tɔhonɔ̀ ɖo e nyi àdɔ̀mèfàtɔ, eye yebe lɔ̃lɔ̃ a lè tɛ̀gbɛ̀.

²Àmè kɛ la teŋu pò nupo so Tɔhonɔ̀ be kãlìnu wɔ̀wɔwo ŋuti, eye e la gbà ɖè yebe kafu bliboa fiɔ ò?

³Sìtuɖèɖe ye la nyi na àmè kèwo le do bùbu èsewo ŋuti eye wo le wɔ̀ ènu kè jè gbà sɔ̀gbèa.

⁴Ɖoŋùku mia ji Tɔhonɔ̀, èwò dùkɔ̃a be àdɔ̀mè nyuɛ̃wɔ̀tɔ. Va ji mi kpɔ, miabe hlùɛ̃tɔ.

⁵Eŋuã mi la kpɔ àpo àmè cãcãwo be nyɔna, èjì la jɔ̀ mi lè àpo dùkɔ̃a be jìjɔɛ mè, ne mia go ɖo àpo àmèwo ŋuti.

⁶Mi ku mia tɔgbewo, mi wɔ̀ ènuvuɛ̃; mi wɔ̀ ènumàye, ènu nyànyrã sɔ jè àgɔ̀.

⁷Mia tɔgbewo mu le ŋùkuvi ɖo Mawu be ènujɔ̀asuwo ŋuti lè Ejiptè sɔ nyanu ò. Wo ŋlɔ̀be yebe nyɔna gbogboawo, eye wo jèagla lè plãŋùpòfɛ̃ be àpùa to.

⁸Co gãke ne Tɔhonɔ̀ bèa sɔ ɖè yebe ŋusɛ̃ tɔ̀xɛa fiɔa, e hlùɛ̃ wo gã ɖo yebe gogo nyikɔa ŋuti.

⁹E wo do àpùa cã ye e pu trolo. Eye e kplɔ̀ wo to ègũ mè be èmɔ̃ ŋuã ji sìgbè zògbè pupu ji wo le to nène.

¹⁰E hlùɛ̃ wo lè àmè kèwo le crì woa simè, gbà jo wo lè woabe kɛ̃tɔwo si.

¹¹E na èsìa ŋɛ̃ gbã ble èta na wo, woa dòmètɔ ɖekpe mu kpɔ̀tɔ̀ ò.

¹²Wàlɛbɛ ŋuã ye wo xɔ̀ yebe nyàwoa ji sè eye wo jì kafu-hawo na ɛ̀.

¹³Wo ŋlɔ̀be yebe wɔ̀wɔwo kaba, wo mu nɔ̀tè kpɔ yebe àɖàŋùɖoɖowo be zɔ̃zɔ̃ sui ò.

¹⁴Lè zògbèa jia, wo bìaŋù ènu kè dɛ̃ do woa, eye wo tè Mawu kpɔ lè èkuɖì-nyigbã ji.

¹⁵E wɔ̀ ɖo woabe jojro ji eye e nyì wo kaka to gbɔ̃gblɔ̃ ŋuti[16].

¹⁶Lè bɔ̀bɔa mèa, Mosè cã ku Arɔ̀n kè nyi Tɔhonɔ̀ be àmè kɔ̀kɔ̀ɛa be ènu le ve woa ŋuti.

¹⁷Ekèa na be ànyigbã hũ eye e mì Datàn, eye e gbà bu ŋùkumè na Abiràm be àhùakɔ̃a.

¹⁸Èzò fiɔ̃ wo, èzò be àɖe vàvlàwo fiɔ̃ àmè nyrãkuwo.

¹⁹Wo wɔ̀ ènyìvi lè hòrɛb-toa ji, wo do ènu gũ na gàkpo-tòlia.

²⁰Nène ye wo ɖɔ̀lì woabe gogo be Mawu a kudo ènyì, ènyì kè ɖùnà ègbea yeŋu.

²¹Eye wo ŋlɔ̀be Mawu kè hlùɛ̃ wo gã, e wɔ̀ ènu jɔ̀ àsuwo na wo lè Ejiptè.

²²Àmè kè wɔ̀ ŋùdãnuwo lè Cam be ànyigbã ji, gbà wɔ̀ ènu jɔ̀ àsuwo lè plãŋùpòfɛ̃ be àpù toa.

²³Eye e gblɔ̃ be yè la crɔ̃ wo, vɔ̀ yebe àmè cãcã Mosè ye nɔ̀tè lè yebe ŋùmè, xɔ̀ àgɔ̀jèjea nu sɔ fa yebe èjìbibi-dã kè la crɔ̃ woa.

²⁴E yomè a, wo dovlo ànyigbã nyuɛ̃a, wo mu gbà xɔ̀ Tɔhonɔ̀ be ènyà ji sè ò.

²⁵Wo lìlìhũi ɖo Tɔhonɔ̀ ŋuti lè woabe gòxowo mè, wo mu ɖo èto Tɔhonɔ̀ be ègbè ò.

²⁶Eye kè e kɔ àlɔ̀ yì jia, e fìã àjɔ̀gbè be yè la tàsi wo la crɔ̃ lè zògbèa ji.

²⁷E kã àtãŋu cã be yè la kãkã woabe jìjimèviwo ɖo ànyigbã keŋu ji eye yè la na, wo la ku ci àmèjrowo dòmè.

²⁸Wo sɔ woa ɖokoe savɔ na vòdu Bal lè Peɔ̀r eye wo ɖù èlã kè wo sɔ savɔ na kukuwoa.

²⁹Nène ye woabe wɔ̀wɔwo do àdɔ̀mèze na ɛ̀ eye èdɔ̀ vuɛ̃wo gbã cɔ̃ wo.

³⁰Vɔ̀a, Pinàs sitè gà ŋuã mè sɔ gbe ènyàa eye èdɔ̀ vuɛ̃ a ɖo àlɔ̀tè.

³¹Eye Tɔhonɔ̀ bù ì ɖo jɔ̀jɔɛ ji so jìjimè yì jìjimè kaka sɔ yì.

³²Wo do àdɔ̀mèze na Tɔhonɔ̀ lè Meribà be èsìa[17] gbɔ, ekèa hɛ̃ gbledo va Mosè ji ɖo woa ŋuti.

³³Ɖo wo na Mosè bijì kaka mu gbà va nɔ̀ ye ɖokoe mè ò eye ènyà gɛ̃ lè ènu na ɛ̀ tàflà.

³⁴Wo mu crɔ̃ Kanàn dùkɔ̃wo sìgbè àlekè Tɔhonɔ̀ biɔ so woa si nènea ò.

³⁵Vɔ̀a, wo wɔ̀ ɖèka kudo àmè mànya Mawu kèawo, kaka wo yì le pò woabe kòɖowo.

³⁶Wo yì sumɔ woabe vòduwo, ekèa trɔ zũ èmɔ̃ tetre na wo.

³⁷Nyàwo, wo sɔ woabe èvi ŋusù ku nyɔ̃nùwo savɔ na legba.

³⁸Eye wo kɔ̀ kunùmewo be èhũ ɖɛ, woa ŋutɔwo be ŋusùviwo ku nyɔ̃nùviwo, ye wo sɔ savɔ na Kanàn be vòduwo. Eye woabe èhũa gble ànyigbã.

³⁹Wo trɔ zũ àmè pòɖiwo to woabe wɔ̀nawo ji, Wo gble woa ɖokoewo sìgbè àhasìwɔ̀tɔwo nène.

⁴⁰Nène a ye Tɔhonɔ̀ be jìbibi be àdãa jè yebe dùkɔ̃a ji. Kaka be ye ŋutɔ be ècrɔ̃nu gbeŋɔ na ɛ̀.

⁴¹E ɖè wo do àsi na àmèjroviwo: Woabe crìtɔwo va ɖù gaglasu ɖo woa ji.

⁴²Woabe kɛ̃tɔwo ɖiki wo, eye wo bɔ̀bɔ̀ wo ɖo woabe gɔ̃mè.

⁴³Tɔhonɔ̀ hlùɛ̃ wo zè naɖe, vɔ̀a, wo kpɔ̀tɔ̀ lìa woa ɖokoewo eye e nyrɔ̃ wo ɖo woabe dàdawo mè kpe è.

⁴⁴Co, kè e sè woabe àpa a, e ɖèŋùku kpɔ woabe àyàa.

⁴⁵E ɖoŋùku yebe zòɖùɖu kè e wɔ̀ kudo wo lè lɔ̃lɔ̃ mèa, eye e trɔ yebe ɖoɖo a.

⁴⁶Tɔhonɔ̀ na be wo ku ŋuzĩzĩ na wo lè woabe àhùale nyinyi mè.

⁴⁷Oò! Tɔhonɔ̀ miabe Mawu, hlùɛ̃ mi gã ne wòa cã mi bɔ̀ lè dùkɔ̃wo dòmè. Mi le mlã àpo nyikɔ kɔ̀kɔ̀ɛa. Eye mi le na wò gogo to kafuhawo mè.

⁴⁸Gogo na Tɔhonɔ̀, Izràɛl be Mawu a so mà-vɔ yì mà-vɔ. Eye dùkɔ̃a kpata ne gblɔ̃ be: “Àmèn! Mì kafu Tɔhonɔ̀!”