Read gen Èhàwo 107 Bible Online

Èhàwo 107 - gen bible

Èhàwo 107

¹Mì do àkpe na Tɔhonɔ̀, ɖo e nyi àdɔ̀mèfàtɔ gbà nyɔ. Eye yebe lɔ̃lɔ̃ a lè tɛ̀gbɛ̀.

²Na àmè kèwo Tɔhonɔ̀ ɖè èkà wo ne nɔ gblɔ̃ nènea ke, àmè kèwo be jo lè kɛ̃tɔa sia,

³àmè kèwo be bɔ̀ so ànyigbãwo kpata jia, so èwèzɛ̃pe ku èwèɖoxɔ̀pe, so èvègo ku àpùgo.

⁴Àmè ɖewo bu ci zògbè pupuia ji kè wo mu teŋu kè ɖo èdù kè mè àmèwo lèa be èmɔ̃a ŋuti ò.

⁵Àdɔ̀ wù wo eye sìkɔ tì wo, eye wo gbɔjɔ.

⁶Wo do àpa yɔ Tɔhonɔ̀ lè woabe gbledo gàmè eye Tɔhonɔ̀ ɖè wo to lè woabe èfũwo mè.

⁷E kplɔ̀ wo ɖɔ̀ɖɔ̀ yì èdù kè mè àmèwo lèa mè.

⁸Wo ne doàkpe na Tɔhonɔ̀ ɖo yebe lɔ̃lɔ̃ ŋuti, ɖo yebe ŋùdãdɔwo lè àgbètɔwo dòmè ŋuti.

⁹Ɛ̃ɛ, e na èsì àmè kèwo sìkɔ le tìa nù, be sù wo. E na ènuɖùɖu àmè kèwo le ku àdɔ̀kua fà.

¹⁰Àmè buwo nɔ̀ gàkpa mè lè èku be vɔ̃vɔ̃lì mè. Wo ɖù àyà ŋutɔ eye wo do wo kɔ̀sɔ̀kɔsɔ.

¹¹Ɖo wo sitè ɖo Mawu be ɖoɖowo ŋuti. Wo crì Mawu kè lè èji hũia be àɖàŋùɖoɖowo.

¹²Mawu sɔ àyàɖùɖu sɔ pò wo. Wo jè ànyi eye àmè ɖe mu do wo àlɔ̀ ò.

¹³Wo do àpa yɔ Tɔhonɔ̀ lè woabe gbledo be gàmè, eye Tɔhonɔ̀ ɖè wo to lè woabe èfũwo mè.

¹⁴E ɖè wo to lè woabe èku be vɔ̃vɔ̃lì mè. E sò kɔ̀sɔ̀kɔsɔawo na wo.

¹⁵Wo ne doàkpe na Tɔhonɔ̀ ɖo yebe lɔ̃lɔ̃ ŋuti, ɖo yebe ŋùdãdɔwo lè àgbètɔwo dòmè ŋuti.

¹⁶Nyàwo e gbã gàjɛ̃ be àgbowo, e ŋɛ̃ gàyìbɔ be àgboglatiwo.

¹⁷Àmè ɖewo trɔ zũ sùkunɔ̀wo, wo le wɔ̀ ènu màɣe màɣewo. Woabe àgɔ̀jèjewo hɛ̃ gbledo va woa ji.

¹⁸Ènu ɖe be ɖùɖu be ŋusɛ̃ mu gbà lè woa ŋuti ò. Wo ɖo èku donu vɔ̀ xoxo.

¹⁹Wo do àpa yɔ Tɔhonɔ̀ lè woabe gbledo be gàmè eye Tɔhonɔ̀ ɖè wo to lè woabe èfũwo mè.

²⁰E ɖè ègbè eye wo dà èdɔ̀ na wo wo ɖè wo to lè yɔ̀do mè.

²¹Wo ne doàkpe na Tɔhonɔ̀ ɖo yebe lɔ̃lɔ̃ ŋuti, ɖo yebe ŋùdãdɔwo lè àgbètɔwo dòmè ŋuti.

²²Wo ne wɔ̀ àkpedo-vɔsawo, kudo jìjɔɛ, wo ne gblɔ̃ ènu kè Tɔhonɔ̀ wɔ̀ na woa

²³Àmè buwo ɖo àpùji-hũ jèmɔ̃ ne woa yì wɔ̀ èdɔ lè àpù dòmè.

²⁴Àmè kèawo kpɔ ènu kè Tɔhonɔ̀ wɔ̀a, yebe ŋùdãdɔwo lè àpùa ji.

²⁵E ɖègbè ɖèka kpò ye àya gblenu so eye e na àsrɔ̀kewo mlì ŋutɔ.

²⁶Wo kɔkɔna àpùji-hũa yì ji boo e yomè a, wo gbà ɖiɖina ɛ̀ jè àpùa mè zè ɖèka. Àmè kèwo lè àpùji-hũa mèa be èjì ci àya mè ɖo gbledo kè le pò àlì do woa ŋuti.

²⁷Wo mu gbà teŋu le nɔ̀tè ò, wo le zɔ̃ sìgbè àhànùmunɔ̀wo nène. Wo mu gbà nya ènu kè wo le wɔ̀ ò.

²⁸Wo do àpa yɔ Tɔhonɔ̀ lè woabe gbledo gàmè eye Tɔhonɔ̀ ɖè wo to lè woabe èfũwo mè.

²⁹E na àya vùdùa jè e mè, eye àpù srɔ̀kewo nu ɖoɖa see.

³⁰Kè wo kpɔ be àpùa jè e mèa, èjì jɔ̀ wo ŋutɔ. Eye Tɔhonɔ̀ kplɔ̀ wo yì fikè wo jro la lìɔ èhũa ɖoa.

³¹Wo ne doàkpe na Tɔhonɔ̀ ɖo yebe lɔ̃lɔ̃ ŋuti, ɖo yebe ŋùdãdɔwo lè àgbètɔwo dòmè ŋuti.

³²Wo ne lòlò yebe nyikɔ lè dùkɔ̃wo dòmè. Ne woa jì kafu-hawo lè àmèsĩsĩwo be habɔ̀bɔ mè.

³³Tɔhonɔ̀ teŋu trɔ ètɔ̀ gãwo wɔ̀ zògbè ji, eye èsìdowo la pu kpakpla.

³⁴Ànyigbã wɔ̀ nukua, la trɔ zũ ànyigbã mà sɛ̃ku, ne e jinɔ̀tɔwo nyi àmè vuɛ̃ a.

³⁵Vɔ̀a, Tɔhonɔ̀ teŋu gbà trɔ zògbè wɔ̀ tãku gã ɖe eye ànyigbã pu kpakpla la trɔ èsìdo.

³⁶Funu ye Tɔhonɔ̀ la sò nɔ̀pe ɖo na àmè kèwo àdɔ̀ le wùa eye wo la sò èdùa, la nɔ̀ e mè.

³⁷Wo la wu ènu ɖo àgblèwo mè, wo la dè vɛ̃-gblewo eye wo la yà èkusɛ̃sɛ̃awo.

³⁸Tɔhonɔ̀ tu èsì na wo eye wo jì fuu ɖo ji, woabe èlãhawo mu ɖènà kpɔ̀tɔ̀ gbèɖe ò.

³⁹Vɔ̀a, èfũ, àyà kudo ènuxàxa zĩ èɖewo ɖo ànyi eye wo ɖè kpɔ̀tɔ̀.

⁴⁰Tɔhonɔ̀ sɔ vlododo cɔ̃ cãmìwo, e ɖè àsi lè woa ŋuti eye wo yì bu ci zògbè ji fikè èmɔ̃ ɖekpe mu lè ò.

⁴¹Co e lìɔnà wɔ̀amènɔ̀wo to lè èfũ mè. E nana woabe xòmè kudo èlãwo jìnà ɖo ji drì.

⁴²Ne àmè kèwo ɖo jìmè kɔ̀kɔ̀ɛa wo kpɔ ekèa, èjì la jɔ̀ wo eye ɖoɖoe la zĩ lè ènudrãwɔ̀tɔwo nu.

⁴³Ne àmè ɖe jro la nya ènua, e ɖo la le ŋùku ɖo ènu kèawo ŋuti eye e la jèsi Tɔhonɔ̀ be lɔ̃lɔ̃.