Read gen Èhàwo 109 Bible Online

Èhàwo 109 - gen bible

Èhàwo 109

¹David be Èhà kè wo ɖè lè hàsìnɔ̀ gã be xoma mèa. Mù lòlò àpo nyikɔ, Oò Mawu, mù gbà bɔ̀ ènu ò.

²Àmè nyrãku kudo àmè flùtɔwo kè woabe ènuwo ɖo ŋuti nyè. Wo le gblɔ̃ àjèɖànyàwo ɖo ŋuti nyè.

³Wo sɔ èkɛ̃-do-àmè be ènyàwo sɔ pòxla do mù, eye wo sitè ɖo ŋuti nyè àgɔ̀ ɖe màjè.

⁴Wo do mù èkɛ̃ ɖo àpe àdɔ̀mè nyuɛ̃ wɔ̀wɔ ŋuti, co mù le fãkue ɖo woa ta.

⁵Wo sɔ èvuɛ̃ ɖo nyuɛ̃ tèpe na mù, eye wo crì mù ɖo àpe èjro nyuɛ̃ wɔ̀wɔ ŋuti.

⁶Wo gblɔ̃nà so ŋuti nyè be: “Mi dà àmènyrãku ɖe ɖo e ŋuti ne bèa yì xa ɛ̀, ne hùɛdotɔ ɖe ne nɔ̀ yebe ɖùsi mè.

⁷Ne e yì kòjo mèa, yebe ènyà ne gble. Eye yebe kuefã ŋutɔ cã ne nyi bùsu nya!

⁸Na yebe àgbènɔ̀zãwo nu ne ci; eye wòa na àmè bu ne xɔ̀ yebe èdɔa.

⁹Èviawo ne trɔ zũ ètɔcɔɛviwo eye èsrɔ̃a ne zũ àsukusi.

¹⁰Na yebe èviwo woa nɔ dã, nɔ yì mà-kpɔ jèpe ɖe. Woa nɔ biɔ ènu tɛ̀gbɛ̀, lè tèpe kèwo dìdì boo lè woabe nɔ̀pewo.

¹¹Na ègàjìgatɔa ne hlà ènu kèwo kpata lè e sia; eye àmèjrowo nɔ xɔ̀ ènu kèwo e wɔ̀ èdɔ sɔ kpɔa.

¹²Na àmè ɖekpe mu gbà wɔ̀ nyuɛ̃ na ɛ̀ ò, nèneake, àmè ɖe mu gbà nɔ ku ŋuzĩzĩ na yebe cɔɛviwo ò.

¹³Na yebe jìjimèviwo ne crɔ̃; eye woabe nyikɔ ne gũ lè àmèha dòmè sɔ̀sɔɛɖe.

¹⁴Na woa ɖoŋù ètɔawo be ènu màɣe wɔ̀wɔwo ji na Tɔhonɔ̀. Ènu ɖekpe mu gbà tutu ènɔa be àgɔ̀jèjewo ò.

¹⁵Tɔhonɔ̀ ne ɖoŋù woabe àgɔ̀jèjewo tɛ̀gbɛ̀dò eye bèa ɖè woabe nyikɔwo jo lè ànyigbã ji.

¹⁶Ɛ̃ɛ, àmè kèa mu ɖoŋùku ɖàgbè wɔ̀wɔ ji ò. E do àyà na wɔ̀amènɔ̀wo kaka yì èku mè E gbã èjì na hiãnɔ̀wo kudo àmè kèwo hiã àlɔ̀doa.

¹⁷Kè e tɔ̀ be kpɛ̃sɛ̃sɛ̃ jɔ̀nàjì na ɛ̀a, kpɛ̃sɛ̃ ne va e ji. Eye kè e nyi be sìtunya mu jɔ̀nàjì na ɛ̀ òa, sìtu ne na ɛ̀ àsà.

¹⁸E sɔ kpɛ̃sɛ̃ tà sìgbè àvɔ nène. E ɖo lãmè na ɛ̀ sìgbè èsì nène, gbà ɖo yebe èpuwo mè sìgbè àmì nène.

¹⁹Na ne kpɛ̃sɛ̃a ne nyi àwù na ɛ̀ bèa nɔ do, gbà nyi ègojiblanu kè e la sɔ nɔ bla ègoji tɛ̀gbɛ̀a.”

²⁰Bòhũa, na ekèa Tɔhonɔ̀ ne nyi àmè kèwo le dohùɛ do mù kudo àmè kèwo le gblɔ̃ ènyà màɣe ɖo ŋuti nyèwo be fɛ̃tu.

²¹Eye èwò Tɔhonɔ̀ Mawu, wɔ̀ na mù ɖo àpo nyikɔa ŋuti; sɔ zɔ̃ ɖo àpo lɔ̃lɔ̃ kudo àpo nyɔnawo jia, hlùɛ̃ mù.

²²Ɖo wɔ̀amènɔ̀ kudo hiãnɔ̀ mù nyi eye àpe èjì xɔ̀ àbì lè àdɔ̀mè na mù.

²³Àgbè nyèa lè sìgbè vɔ̃vɔ̃lì kè le ɖo èxɔ̀a nène. Eye wo ɖè mù ɖo ènu sìgbè hùesuvi nène.

²⁴Mù blanu xɔ̀ àzã fuu, eye àmèti nyèa gbɔjɔ. Eye kù ɖo ènumàɖu ŋutia, èpu ɖèɖe kpò mù trɔ zũ.

²⁵Mù zũ kòkoe na wo. Kè wo kpɔ mù a, wo hũhũ èta.

²⁶Do mù àlɔ̀, Tɔhonɔ̀ Mawu nyè. Hlùɛ̃ mù gã sɔ zɔ̃ ɖo àpo lɔ̃lɔ̃ a ŋuti

²⁷Ne woa nya be àpo àlɔ̀ ye nyi ekèa, be èwò Tɔhonɔ̀ ye wɔ̀ ɛ̀.

²⁸Wo le sɛ̃kpɛ̃ vivivò, vɔ̀a, èwò ya, tu sì fàa. Ne wo sitè ɖo ŋuti nyèa, na èŋù ne kpɛ̃ wo eye ne àpo sumɔ̃via ne kpɔ jìjɔɛ.

²⁹Na kɛ̃tɔ nyèwo mu gbà kpɔ bùbu xɔ̀ ò, ŋùkpɛ̃ ne cɔ̃ wo sìgbè àvɔ nène.

³⁰Mù la nɔ kafu Tɔhonɔ̀ ku ègbè lelele; ɛ̃ɛ, mù la jì kafu-ha na ɛ̀ lè àgũ dòmè.

³¹Ɖo e nɔ̀tè lè wɔ̀amènɔ̀a be ɖùsi mè, ne bèa hlùɛ̃ è lè yebe kòjoɖotɔwo simè.