Read gen Èhàwo 110 Bible Online

Èhàwo 110 - gen bible

Èhàwo 110

¹David be Èhà. Tɔhonɔ̀ gblɔ̃ na àpetɔ nyè be: “Va nɔ̀ ànyi lè àpe ɖùsi-lɔ mè kaka ma sɔ àpo kɛ̃tɔwo ɖo àfɔ̀ gɔ̃mè na wò.”

²Tɔhonɔ̀ la kèke àpo jiɖùɖua ɖo ji so kaka Ziɔ̀n be gòxɔa mè. Eye wò la ɖùfìɔ lè kɛ̃tɔwo dòmè.

³Dùkɔ̃ wòa la sɔ̀gbè ɖo ŋuti wò kaka kè wò la bɔ̀ àpo àhùakɔ̃a. Àpo ɖèkajɛwo la va gbɔ wò lè èto kɔ̀kɔ̀ɛawo ji sìgbè fɔ̃fɔ̃mè be àhũ jàja nène.

⁴Tɔhonɔ̀ ŋutɔ ye kã àtãŋu màtrɔ màtrɔ be: “Wò nyi hũbonɔ tɛ̀gbɛ̀dò sìgbè Mɛlkisedɛk ke nène.”

⁵Tɔhonɔ̀ lè àpo àhàdamè. E gbã èfìɔwo lè yebe àdɔ̀mèze-zãa gbè.

⁶E ɖo kòjo na dùkɔ̃wo, e gbã àgbònùglawo lè ànyigbã kpata ji. Ŋutilã kukuwo bɔ lè àfi sia àfi.

⁷Eye e la nù èsì lè ètɔ̀ kè srà so èto mèa mè lè èmɔ̃ to. Ekèa ŋutia, e la kɔ èta yì ji.