Read gen Èhàwo 115 Bible Online

Èhàwo 115 - gen bible

Èhàwo 115

¹Mu nyi miawo ò Tɔhonɔ̀, mu nyi miawo ye wo la na gogo ò, vɔ̀a èwò ye, ɖo àpo lɔ̃lɔ̃ kudo ègbèjinɔ̀nɔa ŋuti.

²Nukɛ ŋuti ye dùkɔ̃wo le biɔ sè be: “Fikɛ gɔ̃ woabe Mawu a lè ò?”

³Miabe Mawu a lè jiŋùkusi. E wɔ̀nà ènu ɖekpekpe kè e jro a.

⁴Wo wɔ̀ woabe vòduwo ku klòsalò kudo sìka. Wo nyi àgbètɔ be àlɔ̀nudɔ wɔ̀wɔwo.

⁵Wo wɔ̀ ènu na wo, vɔ̀a wo mu pònà nupo ò. Wo wɔ̀ ŋùkuvi na wo, vɔ̀a wo mu kpɔnanu ò.

⁶Wo wɔ̀ èto na wo, vɔ̀a wo mu sènànu ò. Wo wɔ̀ ŋɔ̀ti na wo, vɔ̀a wo mu sènà ènu be huɛ̃huɛ̃ ò.

⁷Wo wɔ̀ àlɔ̀ na wo, vɔ̀a wo mu teŋu lenanu ò. Wo wɔ̀ àfɔ̀ na wo, vɔ̀a wo mu teŋu zɔ̃nà ò. Nène a ke ènyà ɖekpe mu tona so woabe èhlò mè ò.

⁸Àmè kèwo wɔ̀ wo kudo àmè kèwo kpata donajì ɖo woa ŋuti cã lè sìgbè vòdu kèawo ke nène.

⁹Izràɛl be kɔ̀tawo, mì kã ɖo Tɔhonɔ̀ ji. E ye nyi woabe àlɔ̀do ku woabe àkpoxɔ̀nu.

¹⁰Arɔ̀n be àxuedo, mì kã ɖo Tɔhonɔ̀ ji E ye nyi woabe àlɔ̀do ku woabe àkpoxɔ̀nu.

¹¹Mì àmè kèwo dona bùbu Tɔhonɔ̀ ŋutia, mì kã ɖo Tɔhonɔ̀ ji. E ye nyi woabe àlɔ̀do ku woabe àkpoxɔ̀nu.

¹²Tɔhonɔ̀ ɖona ŋùku mia ji. E la tu sì na mi: E la tu sì na Izràɛl, e la tu sì na Arɔ̀n be àxuea.

¹³E la tu sì na àmè kèwo dona bùbu e ŋutia, so vifɛ̃wo ji yì àmègãxowo ji.

¹⁴Tɔhonɔ̀ ne na mìa jì ɖo ji, mìa kudo mìabe èviwo.

¹⁵Tɔhonɔ̀ kè ɖo jiŋùkusi kudo ànyigbã a ne tu sì na mì.

¹⁶Jiŋùkusi nyi Tɔhonɔ̀ tɔ̀, vɔ̀a, e sɔ ànyigbã na àgbètɔwo

¹⁷Àmè kɛwo ye la kafu Mawu? Oò, àmè kukuwo mu jìnà kaf-hà na Mawu ò! Ɖo wo ɖiɖi ɖo èyɔ̀ mè vɔ̀.

¹⁸Sĩ vɔ̀a, miawo ye la nɔ doàkpe na Tɔhonɔ̀ so fifì kaka sɔ yì. Mì jì kafu-ha na Tɔhonɔ̀!