Read gen Èhàwo 119 Bible Online

Èhàwo 119 - gen bible

Èhàwo 119

¹Sìtuɖèɖe ye e nyi na àmè kèwo be àzɔ̃lì mè ye ŋùmè kãkã ɖe mu lè òa, àmè kèwo le zɔ̃ ɖo Tɔhonɔ̀ be èsea jia.

²Sìtuɖèɖe ye e nyi na àmè kèwo le wɔ̀ ɖo yebe ègbèɖèɖeawo ji, kèwo le ji Tɔhonɔ̀ be ŋùmè ku èjì mè kɔ̀kɔ̀ɛa.

³Wo mu wɔ̀ èhlɔ̃dãnu ɖe ò; wo le nɔ̀ àgbè ɖo Tɔhonɔ̀ be jro a ji.

⁴Tɔhonɔ̀, wò biɔ so mia si be mia kpɔ àpo ègbè do àsiawo ji veveɖe.

⁵Oò, àpe àfɔ̀ɖèɖewo ne sɔ̀gbè ne ma nɔ wɔ̀ ɖo àpo kɔ̀dowo ji.

⁶Nène a, èŋù mu la kpɛ̃ mù, ne mù le le ŋùku ɖo àpo èseawo ŋuti ò.

⁷Mù la doàkpe na wò so èjì mè ke ne mù kpla àpo ɖoɖo jɔ̀jɔ̀ɛawo.

⁸Mù jro la wɔ̀ ɖo àpo kɔ̀dowo ji, mù gbà ɖèkɔ̀ lè ŋuti nyè ò.

⁹Àleke ɖèkajɛ la teŋu nɔ̀ àgbè jɔ̀jɔɛ ɖo? Ne e le àpo ènyà ɖo àsi sɛ̃sɛ̃ɖe kpòa, Tɔhonɔ̀.

¹⁰Mù ji wò kudo àpe èjì keŋu, mù gbà na ne ma bu lè àpo ègbè do àsiwo gbɔ boo ò.

¹¹Mù wla àpo nufiɔfiɔwo ɖo èjì mè ne nyè mu gbà wɔ̀ èvuɛ̃ ɖe do wò ò.

¹²Àkpe na Tɔhonɔ̀, fiɔ mù àpo èjrowo.

¹³Àpe nuyiwo hlɛ̃ kɔ̀do kèwo keŋu wò do a.

¹⁴Àpo ɖoɖowo ji kpɔkpɔ dona jìjɔɛ na mù sìgbè mù ɖo ànyigbã ji be ènunɔ̀amèsiwo kpata nène.

¹⁵Mù jro la nɔ bùtamè so àpo gbè do àsiwo ŋuti eye ma le ŋùku ɖo èmɔ̃ kè wò ta na mù a ŋuti kpò.

¹⁶Àpo èjrowo dona jìjɔɛ na mù, nyè mu la ŋlɔ̀be àpo ènyà ò.

¹⁷Àpo sumɔ̃vi ye mù nyi, kplɔ̀ mù nyuɛ̃ ɖe ne ma nɔ̀ àgbè eye mù la kpɔ àpo ènyà ji.

¹⁸Hũ ŋùkuwo na mù ne ma kpɔ ènujɔ̀asu kèwo lè àpo èsea mèa.

¹⁹Mù nyi àmèjro lè ànyigbã kèa ji, mù gbà wla àpo gbè do àsiwo do mù ò.

²⁰Mù le ji ku vevedonu la nya àpo ɖoɖo gà sia gàmè tɔ̀awo.

²¹Wo kã ŋùmè na gòyitɔwo kpɛ̃sɛ̃me kèwo trã jo lè àpo kɔ̀dowo gbɔa.

²²Ɖè èzũ ku cìcrìwo lè ènyè mè ɖo mù lenabè na àpo ɖoɖoawo.

²³Ne èfìɔviwo gbà bɔ̀ sɔ sitè ɖo ŋuti nyè ŋutɔ cã, àpo sumɔ̃via ya kpɔ̀tɔ̀ le bùtamè so àpo kɔ̀doawo ŋuti.

²⁴Àpo ɖoɖoawo dona jìjɔɛ na mù ɖexòmèku. Woawo ye nyi àpe ètopòɖotɔ.

²⁵Kpɔ mù lè ànyi lè ɖiɖɔɛ mè, na ne ma nɔ̀ àgbè sìgbè àlekè wò fìã àjɔ̀gbèa nène.

²⁶Mù ɖè àpe àzɔ̃lìawo fiɔ wò eye wò ɖoto mù; fiɔ mù àpo èjrowo.

²⁷Na ne ma jèsi àpo èseawo be èmɔ̃, ne ma wɔ̀ susu so àpo ŋùdãnuwo ŋuti.

²⁸Kɔ̀bɛ na àɖàsì le lolo lè àpe ŋùkumè, do mù ŋusɛ̃ sìgbè àlekè wò fìã àjɔ̀gbèa nène.

²⁹Ɖè àjèɖàɖa lè àpe èdɛ̃ mè, eye na mù àpo èsea to màje ji.

³⁰Nyàwo be èmɔ̃a ye mù cã, mù sɔ ɖokoe nyè dà ɖo àpo èkpeɖoji-nyawo gɔ̃mè.

³¹Àpo ɖaseawo ŋuti mù tɛɖo. Aò! Tɔhonɔ̀, mù gbà do mù ŋùkpɛ̃ ò.

³²Mù le pu dù lè àpo èseawo be èmɔ̃a ji ɖo wò na èjì nyèa kpɔ vũvlũ.

³³Tɔhonɔ̀, fiɔ mù àpo kɔ̀dowo be èmɔ̃a, eye mù la lebè na ɛ̀ kaka sɔ yì vɔ̀vɔnu.

³⁴Na mù ènu mè ŋɔjè ne ma kpɔ èse wòa ji. Ɛ̃ɛ, mù la kpɔ ɛ̀ ji ku àpe èjì bliboa.

³⁵Na ne ma to àpo èseawo be èmɔ̃a ji ɖo e dona jìjɔɛ na mù.

³⁶Bɔ̀bɔ̀ àpe èjì na àpo ɖoɖowo kpò eye mu gbà nyi na ɖokoe nyè tɔ̀ jiji ò.

³⁷Ɖè àpe ŋùkuwo jo lè yàkànuwo kpɔkpɔ ji, eye na mù àgbè lè àpo èmɔ̃a ji.

³⁸Ɖokpe ègbè kè wò ɖo na àpo sumɔvia ji, ne woa si wò.

³⁹Ɖè èzũ kèwo mù le vɔ̃a jo, àpo èkpeɖoji-nyàwo nyɔ.

⁴⁰Ɛ̃ɛ, mù lɔ̃ àpo èseawo, na ma nɔ̀ àgbè to ànùkua mè.

⁴¹Tɔhonɔ̀ kɔ̀ àdɔ̀mè ɖo ŋuti nyè, hlùɛ̃ mù gã sìgbè àlekè wò fìã àjɔ̀gbèa nène.

⁴²Ne àmè ɖe dovlo mù a, ma teŋu ɖo e ŋuti na ɛ̀; ɖo mù dojì ɖo àpo ènyà ŋuti.

⁴³Do mù àlɔ̀ ne ma nɔ to nyàwo tɛ̀gbɛ̀, ɖo mù le nɔ̀tè kpɔ àpo ègbè do àsiwo, lè ŋùɖo mè.

⁴⁴Mù la nɔ kpɔ àpo èsea ji tɛ̀gbɛ̀ so fifì kaka sɔ yì.

⁴⁵Eye mù la nɔ vlũ sɔ ɖìsà ɖo mù lè àpo èseawo yomè.

⁴⁶Mù la gbà nɔ pò nupo so ɖase wòawo ŋuti lè èfìɔwo be ŋùkɔ̀, eye èŋù ɖe ma kpɛ̃ mù ò.

⁴⁷Mù la kpɔ àpo ègbè do àsiwo ji ɖo wo dona jìjɔɛ na mù.

⁴⁸Mù la kɔ àpe àlɔ̀wo yì ji na àpo èseawo. Mù lɔ̃ wo eye mù la nɔ bùtamè so àpo kɔ̀dowo ŋuti.

⁴⁹Ɖoŋùku ègbè kè wò ɖo na sumɔ̃vi wòa ji, e ya ye le na mù ŋùɖo.

⁵⁰Ekèa ye nyi àpe àkɔfa lè èfũ nyèa mè, ɖo àpo ènyà na mù lè àgbè.

⁵¹Hɛ̀wùlɔwo[18] le ŋɛ̃ àŋɔ̀nimè na mù, co nyè mu tètè jo lè àpo èsea ŋuti ò.

⁵²Tɔhonɔ̀, mù ɖoŋù àpo jɔ̀jɔɛsòso gbèɖegbè tɔ̀awo eye wo fa àkɔ na mù.

⁵³Àdɔ̀mè ve mù ŋutɔ ɖo àmèjèagla kèwo gbe àpo èsea ŋuti.

⁵⁴Àpo kɔ̀doawo trɔ zũ àpe èhàjìjiwo lè àxue kè mè mù nyi àmèjro lèa.

⁵⁵Aò Tɔhonɔ̀! Èzã mèa, mù ɖona ŋùku àpo nyikɔa, eye mù gbà lena àpo èsea ɖo àsi.

⁵⁶Ènu kè sù àsi nyè ŋutɔ-ŋutɔa ye nyi be ma lebè na àpo ègbèɖèɖewo.

⁵⁷Aò Tɔhonɔ̀! Ènu kè kã mù lè e mèa ye nyi be ma lebè na àpo èseawo.

⁵⁸Mù jro be ma jè àpo ŋùmè ku èjì nyè blibo. Ku ŋuzĩzĩ na mù sɔ zɔ̃ ɖo àpo ègbèɖèɖea ji.

⁵⁹Mù bùnà tamè so àpe wɔ̀na ŋuti, eye mù jro la trɔ va àpo ɖoɖowo gbɔ.

⁶⁰Mù kèɖì[19], ètèmàtɔ ne ma le àpo èseawo mè ɖo àsi.

⁶¹Àmènyrãkuwo le mù ɖo woabe àja mè, co nyè mu ŋlɔ̀be àpo èsea ò.

⁶²Mù fɔ̃na èzã dòmè, sɔ sɛ̃nà wò ɖo àpo jɔ̀jɔɛsòso ànùkuatɔ̀awo ŋuti.

⁶³Mù wɔ̀ ɖèka kudo àmè kèwo vɔ̃na wò eye wo kpɔna àpo èseawo jia.

⁶⁴Tɔhonɔ̀, ànyigbã ji ɖɔ ku àpo àdɔ̀mè nyuɛ̃a, fiɔ mù àpo kɔ̀dowo.

⁶⁵Aò Tɔhonɔ̀! Wò wɔ̀ nyuɛ̃ na àpo sumɔ̃via sɔ zɔ̃ ɖo àpo ènyà ji.

⁶⁶Fiɔ mù ènumè ŋɔjè àdodoe kudo nunya, ɖo mù xɔ̀ àpo ègbèawo ji sè.

⁶⁷Mù bu gbɔ̀xue wò do mù ŋùkpɛ̃. Vɔ̀ fifìa, mù le àpo ègbèɖèɖeawo ɖo àsi.

⁶⁸Àdɔ̀mè fàfatɔ ye wò nyi eye wò gbà wɔ̀nà nyuɛ̃, fiɔ mù àpo kɔ̀doawo.

⁶⁹Ègòyitɔwo kpà àjè, ɖà ɖo àsi nyè àcì ji; vɔ̀a mù la kpɔ àpo èseawo ji ku àpe èjì blibo.

⁷⁰Woabe èjì kuàtrì sìgbè àmìkpe nène, vɔ̀a nyè ya, mù ɖo jìjɔɛ ɖo àpo èsea ŋuti

⁷¹E nyɔ na mù be wo ɖì mù gbɔ ne ma kpla àpo kɔ̀doawo.

⁷²Èse kè to so àpo ènu mèa, nyɔ wu sìka ku klòsalò àkpe àkpewo.

⁷³Àpo àlɔ̀wo ye ɖo mù gbà jɔ̀ mù. Na mù nunya ne ma teŋu kpla àpo ègbè do àsiwo.

⁷⁴Ne wo kpɔ mù a, àmè kèwo vɔ̃na wòa, wo kpɔna jìjɔɛ, ɖo mù donajì ɖo èse wòa ŋuti.

⁷⁵Aò Tɔhonɔ̀, mù nya be kòjo jɔ̀jɔɛ ye wò sònà eye e sɔ̀gbè tutu be wòa do mù ŋùkpɛ̃.

⁷⁶Na ne àpo hòmèfà ne fakɔ na mù sɔ zɔ̃ ɖo ègbè kè wò do àsi na sumɔ̃vi wòa ji.

⁷⁷Na ne àpo ŋuzĩzĩkukua ne sùtè gbɔ nyè eye ma nɔ̀ àgbè; ɖo àpo èsea dona jìjɔɛ na mù.

⁷⁸Èŋù ne kpɛ̃ ègòyitɔ kèwo wɔ̀ ènu bàɖà bàɖàwo kudo mù, àgɔ̀ ɖe màjè. Vɔ̀a nyè ya, mù le bùtamè so àpo èseawo ŋuti.

⁷⁹Wo ne trɔ va gbɔ nyè, àmè kèwo vɔ̃na wòa, wo la nya àpo ɖoɖowo.

⁸⁰Na ne ma nɔ̀ ègbèji na àpo èkɔ̀doawo, ne èŋù mu gbà kpɛ̃ mù ò.

⁸¹Ènu tìkɔ̀ na èkla nyè, le ji àpo àlɔ̀doa mù lè ŋùɖo mè na ènyà kè wò la gblɔ̃a.

⁸²Ènu tìkɔ̀ na àpe ŋùkuvi kèwo lè ŋùɖo mè na àpo àjɔ̀gbè fìãfiã ŋuti. Mù biɔna sè be: “Wàlɛbɛ kɛ ye wò la va fakɔ na mù ò?”

⁸³Mù lè sìgbè èlãgbàzegò pupu lè èzò nu nène, vɔ̀ nyè mu la ŋlɔ̀be àpo kɔ̀doawo ò.

⁸⁴Wò la tàsi mù ne ma nɔ̀ àgbè èpè sùgbɔa? Gbè kɛ gbè ye wò la ɖokòjo na àmè kèwo le ɖè ŋùtafui na mù a ò?

⁸⁵Ègòyitɔwo tre èmɔ̃ na mù, ekèa sitè ɖo àpo èsea ŋuti.

⁸⁶Àpo ègbèɖèɖewo ɖɔ kudo nyàwo. Wo le do àyà na mù gbalo, do mù àlɔ̀ jro!

⁸⁷Kpɔ̀tɔ̀ viɖe ne woa crɔ̃ mù lè ànyigbã ji kloe. Sĩ vɔ̀a, nyè mu ɖèkɔ̀ lè àpo ègbè do àsiwo ŋuti ò.

⁸⁸Na ne ma nɔ̀ àgbè sɔ zɔ̃ ɖo àpo hòmèfà lɔ̃lɔ̃ a ji; eŋuã, mù la wɔ̀ ɖo àpo ènumè-nya ji.

⁸⁹Oò Tɔhonɔ̀, wò likè àpo ènyà ɖo jiŋùkusi kaka sɔ yì.

⁹⁰Àpo ànùkua wɔ̀wɔ lè so jìjimè yì jìjimè. Wò li ànyigbã ɖo dodoe ji goŋu-goŋu.

⁹¹Àpo ènyàwo ji ènu sia ènu to lè egbè, ɛ̃ɛ xixea kpata lè àpo ŋusɛ̃ gɔ̃mè.

⁹²Ne àpo èsea mu kè le do jìjɔɛ na mù òa, mù kè crɔ̃ xoxo lè èfũ nyè mè.

⁹³Nyè mu la ŋlɔ̀be àpo ègbè do àsiwo gbèɖe ò, ɖo, to woa ji ye wò na mù lè àgbè.

⁹⁴Tɔ̀ wò mù nyi, hlùɛ̃ mù gã; ɖo mù biɔna àpo ɖoɖoawo ta sè.

⁹⁵Àmè bàɖàwo doxa na mù; sĩ vɔ̀a, nyè ya mù le ɖo èto àpo ègbèɖèɖewo.

⁹⁶Mù do è jèsi be ènu kè nyɔ gloa cã a, ɖo vɔ̀vɔnu; vɔ̀a, sɛ̃pe ɖe mu lè na àpo èsea ò.

⁹⁷Aò kpɔ àlekè mù lɔ̃nà àpo èsea ɖa! Mù bùnà tamè so e ŋuti gbè sia gbè.

⁹⁸Àpo ègbèɖèɖewo na mù zũ ènunyatɔ sɔ wu àpe kɛ̃tɔwo. Ɖo mù sɔ wo wɔ̀ tɔ̀ nyè kaka yì.

⁹⁹Mù nyanu sɔ wu àpe nufiɔtɔwo kpata, ɖo mù bùnà tamè dìdiɖe so àpo ègbèɖèɖewo ŋuti.

¹⁰⁰Mù sènà ènu gɔ̃mè wu àmèsĩsĩwo, ɖo mù wɔ̀nà ɖo àpo ɖoɖowo ji.

¹⁰¹Mù le àfɔ̀ nyèwo ne wo mu gbà pu dù jè èmɔ̃ vuɛ̃wo ji ò, ne ma kpɔ ènyà wòa ji.

¹⁰²Nyè mu ɖènàkɔ̀ lè àpo èsewo ŋuti ò, ɖo èwò ye le kpla mù.

¹⁰³Àpo ènyàwo vivina lè ènu mè na mù wu ànyisì ŋutɔ cã.

¹⁰⁴Àpo kɔ̀dowo nana mù nyananu, ekèa na be mù crì àjèɖàɖa.

¹⁰⁵Àpo ènyà ye nyi kãligbɛ̃ lè àpe àfɔ̀wo nu, gbà le nyi kɔ̀kɔ̀ɛ lè àpe èmɔ̃wo ji.

¹⁰⁶Mù le kã àtãŋu na wò eye mù la wɔ̀ ɖo e ji sɔ kpɔ àpo èsewo ji.

¹⁰⁷Wo ɖì mù ègbɔ ŋutɔ, Oò Tɔhonɔ̀! Na mù àgbè sɔ zɔ̃ ɖo àpo ènyà ji.

¹⁰⁸Oò Tɔhonɔ̀! Lɔ̃ xɔ̀ àpe kuefãwo, ne wòa fiɔ mù àpo ɖoɖowo.

¹⁰⁹Àgbè nyèa lè àfɔ̀ku mè tɛ̀gbɛ̀ co, nyè mu ŋlɔ̀be àpo èsea ò.

¹¹⁰Àmènyrãkuwo tremɔ̀ ɖɛ na mù, co, nyè mu trã jo lè àpo ègbèɖèɖewo gbɔ ò.

¹¹¹Mù sɔ àpo ègbèɖèɖewo wɔ̀ tɔ̀ nyè kaka yì. Wo dona jìjɔɛ na àpe èjì.

¹¹²Mù bɔ̀bɔ̀ ɖokoe nyè la sɔ wɔ̀ ɖo àpo kɔ̀dowo ji tɛ̀gbɛ̀ kaka yì vɔ̀vɔnu.

¹¹³Mù crì àyègɛdɛtɔwo, vɔ̀ mù lɔ̃nà àpo èsea.

¹¹⁴Èwò ye nyi àpe àkpɔxɔ̀nu kudo àpe bèbèpe. Mù lè ŋùɖo mè na àpo ènyàa.

¹¹⁵Mì tètè lè gbɔ nyè, mìa ènu bàɖàwɔ̀tɔwo. Eŋuã mù la kpɔ Mawu nyè be èseawo ji.

¹¹⁶Do mù ŋusɛ̃, zɔ̃ ɖo àpo àjɔ̀gbèfìãfiã ji, eye mù la nɔ̀ àgbè. Mù gbà na ne èŋù ne kpɛ̃ mù lè àpe ŋùɖoa mè ò.

¹¹⁷Le mù ɖotè ne ma gã eye mù la kãma na àpo kɔ̀dowo wè sia wè.

¹¹⁸Wò ɖo àmè kè mu wɔ̀nà ɖo àpo kɔ̀dowo ji òa, ɖoɖa puplu; ɖo woabe wɔ̀wɔwo kpata nyi àjè ɖèɖe.

¹¹⁹Wò lɔna àmènyrãkuwo kɔ̀ ŋùgbe lè ànyigbã ji sìgbè ègbe ɖiɖɔɛ nène. Ekèa ŋuti ye mù lɔ̃nà àpo ègbè do àsiwo ɖo.

¹²⁰Èha lɔ ŋutilã nyèa ɖo àpo vɔ̃vɔ̃ ŋuti, àpo jɔ̀jɔɛsòso do àdìkasoe na mù.

¹²¹Mù wɔ̀nà ɖo àpo ègbè do àsiwo ji eye mù wɔ̀nà ènujɔ̀jɔɛ: Mù gbà tàsi mù ɖo èfũɖènamètɔ nyèwo si mè ò.

¹²²Xɔ̀ ènyà ɖo sumɔ̃via wòa nu na ènyuɛ̃; mù gbà na ègòyitɔwo ne zĩ mù ɖo ànyi ò.

¹²³Ŋùkuvi nyèwo le kpɔ èmɔ̃ na àpo àmèhlùɛ̃gã kudo jɔ̀jɔɛ be àjɔ̀gbèfìãfiã kaka e glo.

¹²⁴Wɔ̀ kudo sumɔ̃vi wòa sɔ zɔ̃ ɖo àpo àdɔ̀mè nyuɛ̃a ji eye wòa fiɔ mù àpo jro.

¹²⁵Àpo sumɔ̃vi mù nyi, na mù ènunya sɔ jèsi àpo ègbè do àsiwo.

¹²⁶Tɔhonɔ̀, gàmè sù ne wòa ɖè ɖokoe wò fiɔ, ɖo wo mu kpɔ èse wòa ɖo ènu[20] ɖe ji ò.

¹²⁷Ekèa ŋuti mù lɔ̃nà àpo èsea sɔ wu sìka, ɛ̃ɛ sɔ wu sìka ceŋu-ceŋu.

¹²⁸Nène a, mù kpɔna àpo ɖoɖowo kpata be wo jè gbà sɔ̀gbè. Eye mù crì àjè be àyèmɔ̃nu gɛdɛ gɛdɛwo.

¹²⁹Àpo ègbè do àsiwo nyi ŋùdãnu, nènea ye mù ɖona èto wò tɛ̀gbɛ̀.

¹³⁰Ne wo kè ɖo àpo ènyà ŋutia, wo kpɔna ènu mè kɔ̀kɔ. Eye àmè kɔ̀kɔ̀ɛ xɔ̀nà ènunya sɔ sònà ènyà.

¹³¹Mù le nù àpo ènyàa tèmàtɔ ɖo mù lɔ̃ àpo ègbèɖèɖewo ŋutɔ.

¹³²Trɔ kpɔ mù ne wòa ku ŋuzĩzĩ na mù sìgbè àlekè wò wɔ̀nà na àmè kèwo lɔ̃nà wòa nène.

¹³³Li àpe àfɔ̀wo ɖo àpo ènyàa ji. Mù gbà na ne èvuɛ̃ ɖe ne ɖù gaglasu ɖo èji nyè ò.

¹³⁴Hlùɛ̃ mù lè àmè kèwo le ɖiki mù a si, eye mù la kpɔ àpo èseawo ji.

¹³⁵Na ne àpo ŋùmè ne klɛ̃ ɖo àpo sumɔ̃via ji. Fiɔ mù àpo ɖoɖowo.

¹³⁶Àpe ŋùkuviwo le fã àɖàsì ɖo wo mu le lebè na àpo èsea ò.

¹³⁷Tɔhonɔ̀, ànùkuawɔ̀tɔ ye wò nyi. Àpo ènyàmèsòsowo lè jɔ̀jɔɛ.

¹³⁸Wò ɖo àpo ègbèɖèɖewo jɔ̀jɔɛɖe kudo ànùkuawɔ̀wɔ gã ɖe.

¹³⁹Àpe kɛ̃tɔwo ŋlɔ̀be àpo èsea. Eye lɔ̃lɔ̃ kè mù ɖo na àpo ènyàa, le fiɔ̃ mù.

¹⁴⁰Àpo ènyà mè kɔ̀ peŋu, eye àpo sumɔ̃via mu lɔ̃nà ènu lè e ŋuti ò.

¹⁴¹Àmèkpò kudo vlodonu ye mù nyi, gãke nyè mu ŋlɔ̀be àpo kɔ̀dowo ò.

¹⁴²Àpo ànùkuawɔ̀wɔ lè ègbè ji kòkòkò eye àpo èsea nyi ènu àdodoe.

¹⁴³Mù ci jojojoe kudo ènuxàxa, vɔ̀a, àpo ègbè do àsiwo ye dona jìjɔɛ na mù.

¹⁴⁴Àpo ègbèɖèɖewo lè jɔ̀jɔɛ tɛ̀gbɛ̀, na ne ma ŋɔjè woa mè; ne ma nɔ̀ àgbè.

¹⁴⁵Tɔhonɔ̀, mù le yɔ wò so kaka àpe èjì mè, tɔ̀ na mù. Mù la lebè na àpo kɔ̀dowo.

¹⁴⁶Mù le yɔ wò, hlùɛ̃ mù gã ne ma kpɔ àpo ègbè do àsiwo ji.

¹⁴⁷Mù fɔ̃ le do àpa yɔ wò gbɔ̀xue èŋù kè. Mù dojì ɖo àpo àjɔ̀gbèfìãfiãwo ŋuti.

¹⁴⁸Gbɔ̀xue èzã la sĩa, mù gbà nɔ̀nà ŋùzɔ̃ sɔ bùnà tamè so àpo ègbè do àsiwo ŋuti.

¹⁴⁹Ɖo èto àpe ègbè, sɔ zɔ̃ ɖo àpo lɔ̃lɔ̃ a ji. Na mù àgbè zɔ̃ ɖo àpo jɔ̀jɔɛsòsoa ji.

¹⁵⁰Ènukpòtoe wɔ̀tɔwo le dɔ̃ gogo ku sùsu dakàwo. Co wo lè àzɔ̀ge boo na àpo èsea.

¹⁵¹Tɔhonɔ̀, wò sɔ̀ lè kpòepe na mù. Àpo ègbè do àsiwo kpata lè ègàji tututu.

¹⁵²Mù nya sɔ so àpo kɔ̀dowo ŋuti be wò ɖo wo ànyi so blèmà na hùenuwo keŋu.

¹⁵³Kpɔ àpe èfũkpekpe eye wòa hlùɛ̃ mù, ɖo nyè mu ŋlɔ̀be àpo èsea ò.

¹⁵⁴Wɔ̀ àvũ ɖo èta nyè ne wòa hlùɛ̃ mù gã. Na mù àgbè sɔ zɔ̃ ɖo àpo àjɔ̀gbèfìãfiã ji.

¹⁵⁵Hlùɛ̃gã lè boo na àmènyrãkuwo, ɖo wo mu le jro la wɔ̀ ɖo àpo kɔ̀dowo ji ò.

¹⁵⁶Oò! Tɔhonɔ̀, àpo àdɔ̀mè nyuɛ̃a lòlò. Na mù àgbè sɔ zɔ̃ ɖo àpo jɔ̀jɔɛsòso ji.

¹⁵⁷Àpe kɛ̃tɔwo kudo àmè kèwo le do àyà na mù a, sùgbɔ. Vɔ̀ nyè mu gbe ènu lè àpo ɖoɖowo ŋuti ò.

¹⁵⁸Mù kpɔ èkpli xɔ̀ na àmètɔwo. Woabe ènu jiŋɔ na mù ɖo wo mu le zɔ̃ ɖo àpo nufiɔàmèwo ji ò.

¹⁵⁹Tɔhonɔ̀, kpɔ àlekè mù lɔ̃nà àpo ɖoɖowo ɖa! Na mù àgbè zɔ̃ ɖo àpo lɔ̃lɔ̃ a ji.

¹⁶⁰Wò li àpo ènyà ɖo nyàwo ji, àpo ɖoɖowo kpata sɔ̀gbè eye wo lè ègàji na hùenuwo kpata.

¹⁶¹Èfìɔviwo nyà mù ɖonu, àgɔ̀ ɖe màjè, vɔ̀ àpo ènyà kpò ye mù vɔ̃na.

¹⁶²Àpo ènyà dona jìjɔɛ na mù sìgbè àmè kè kèɖo sìkanu tɔ̀xɛ ɖe ŋuti nène.

¹⁶³Mù crì àjèɖàɖa, e jinaŋɔ na mù. Vɔ̀a, mù lɔ̃ àpo èsea.

¹⁶⁴Zè adrɛ̃ gbè ɖèka ye mù kafuna wò ɖo àpo jɔ̀jɔɛsòso ànùkuatɔ̀wo ŋuti.

¹⁶⁵Ŋuti fàfa tɔ̀xɛ ye nɔ̀nà àmè kèwo nya àpo èsea si. Ènu ɖe mu nyina àfɔ̀klɛ̃ na wo ò.

¹⁶⁶Tɔhonɔ̀, mù le ɖoŋù ɖo àpo àmèhlùɛ̃gã ŋuti. Mù le kpɔ àpo kɔ̀dowo ji sùsuiɖe.

¹⁶⁷Àpe àmètia kpɔna àpo ɖoɖowo, mù lɔ̃nà wo veku-veku ŋutɔ.

¹⁶⁸Mù lenabè na àpo ègbèɖèɖe kudo ègbè do àsiwo, ɖo àpe wɔ̀wɔwo kpata lèŋùkumè na wò.

¹⁶⁹Tɔhonɔ̀, na ne àpe àpadodo ne sùtè gbɔ wò. Na mù nunya sɔ zɔ̃ ɖo àpo àjɔ̀gbèfìãfiã ji.

¹⁷⁰Àpe blìbɔ̀-blìbɔ̀wo ne kè ɖo ŋuti wò. Ɖè mù ègà sɔ zɔ̃ ɖo àpo àjɔ̀gbèfìãfiã ji.

¹⁷¹Àpe ènu la ɖùɖù àpo kafu kɔ̀ɖɛ ɖo wò la fiɔ mù àpo èjroa.

¹⁷²Àpe àɖe la jì kafu-ha na àpo ènyàa. Ɖo àpo èsea kpata lè jɔ̀jɔɛ.

¹⁷³Mù jro la wɔ̀ ènu kè jènà ŋùmè na wòa. Drɛ̃ àpo àbɔ ne wòa do mù àlɔ̀.

¹⁷⁴Tɔhonɔ̀, àpo àmèhlùɛ̃gã le jro mù kaka, eye àpo èsea le do jìjɔɛ na mù.

¹⁷⁵Na ne ma nɔ̀ àgbè sɔ jì kafu-ha na wò. Eye àpo jɔ̀jɔɛsòsowo ne kpe ɖo ŋuti nyè.

¹⁷⁶Mù jo trã sìgbè àlɛ̃ bubu ɖe nène: Va ji sumɔ̃vi wòa. Ɖo nyè mu ŋlɔ̀be àpo ègbè do àsiawo ò.