Read gen Èhàwo 132 Bible Online

Èhàwo 132 - gen bible

Èhàwo 132

¹Èmɔzɔ̃zɔ̃ be Èhà Tɔhonɔ̀, ɖo ŋùku David ji kudo yebe àyàɖùɖuwo kpata.

²David kã àtãŋu na Tɔhonɔ̀. Ŋùgbè kè be do na Yakɔb be Mawu a ye nyi be:

³“Nyàwo, nyè mu la ɖota àpe àxuea be gòxɔa mè ò. Nyè mu la mlɔ̃ àpe dɔ̃ba cã ji ò.

⁴Nyè mu la na àpe ŋùkuviwo la dɔ̃ àlɔ̃ ò, àɖàbà nyèwo mu la dɔ̃ kɔ̀lɔ̃ɛ̃ ò.

⁵Ɛ̃ɛ, mù ɖo la kpɔ tèpe ɖe la sɔ wɔ̀ nɔ̀pe na Tɔhonɔ̀, àxue na Yakɔb be Mawu ŋusɛ̃tɔa.”

⁶Kpɔɖa, mi sè kpò be: Zòɖùɖu-Ɖakà a lè Efratà. Mi yì kpɔ ɛ̀ lè zògbè nukã mè lè Yaarò.

⁷Mi yì Tɔhonɔ̀ be àxuea mè. Mi jè èklò lè yebe fìɔzìkpea be àfɔ̀ gbɔ sɔ jèɖɛ̀ na ɛ̀.

⁸Tɔhonɔ̀! Va gbɔ̃jɛ̃ lè fikèa, va kudo zòɖùɖu ɖakà a kè le ɖè ŋusɛ̃ wòa fiɔa.

⁹Na ne àpo hlùɛ̃gã be ŋusɛ̃ ne cɔ̃ àpo hũbonɔwo sìgbè àwù nène, ne àpo ànùkuamèwo ne nɔ do jìjɔɛ be àpa.

¹⁰Hà ɖo àpo sumɔ̃vi David ŋuti ne mù gbà gbe èfìɔ kè wò ɖoa ò.

¹¹Tɔhonɔ̀ kã àtãŋu na David lè ànùkua mè. Ɛ̃ɛ, mu la trɔ lè e ji ò. E gblɔ̃ be: “Èvi wò jìji ɖèka ye mù la sɔ ɖo àpo fìɔzìkpea ji.

¹²Ne èvi wòwo le zòɖùɖu nyèa ɖo àsi eye wo le kpɔ ègbè do àsi nyèwo jia, woabe jìjimèviwo la nɔ̀ fìɔzìkpe wòa ji tɛ̀gbɛ̀.”

¹³Ɛ̃ɛ, Tɔhonɔ̀ cã Yèruzàlɛm, funu ye be ji be yèa sò nɔ̀pe ɖo.

¹⁴E gblɔ̃ be: “Àpe ɖìɖomè nɔ̀pe ye nyi ekèa kaka sɔ yì. Mù la nɔ̀ èdù kèa mè, e ye jro mù.

¹⁵Mù la na nuɖùɖu la ɖɔ Yèruzàlɛm be àvàwo. Mù la na nuɖùɖu yebe wɔ̀amènɔ̀wo.

¹⁶Mù la sɔ hlùɛ̃gã be ŋusɛ̃ do na woabe hũbonɔwo, eye yebe ànùkuamèwo la nɔ do jìjɔɛ be àpa.

¹⁷Lè Yèruzàlɛm ye mù la na èfìɔ sɛ̃ŋu ɖe la to lè David be xòmè lè. Nène a ye mù la sũ kãligbɛ̃ ɖotè, sɔ ji àmè kè la ɖɔ̀lì èfìɔ kè mù cã a.

¹⁸Mù la na yebe kɛ̃tɔwo la ɖɔ kudo ŋùkpɛ̃, vɔ̀ èfìɔkuku dàzò ŋàŋlà ye la nɔ̀ èta na ɛ̀.”