Read gen Èhàwo 136 Bible Online

Èhàwo 136 - gen bible

Èhàwo 136

¹Mì doàkpe na Tɔhonɔ̀, ɖo e nyɔ! Ɛ̃ɛ, yebe lɔ̃lɔ̃ a lè tɛ̀gbɛ̀.

²Mì doàkpe na Mawu, kè wugã vòduwo kpata! Ɛ̃ɛ, yebe lɔ̃lɔ̃ a lè tɛ̀gbɛ̀.

³Mì doàkpe na tɔhonɔ̀wo be Tɔhonɔ̀! Ɛ̃ɛ, yebe lɔ̃lɔ̃ a lè tɛ̀gbɛ̀.

⁴E ye ɖèka ye wɔ̀ ŋùdãnu gãgãwo! Ɛ̃ɛ, yebe lɔ̃lɔ̃ a lè tɛ̀gbɛ̀.

⁵E ɖo jiŋùkusi to nunya ɖèɖe mè! Ɛ̃ɛ, yebe lɔ̃lɔ̃ a lè tɛ̀gbɛ̀.

⁶E vlũ ànyigbã ɖo èsìwo ji! Ɛ̃ɛ, yebe lɔ̃lɔ̃ a lè tɛ̀gbɛ̀.

⁷E ɖo kɛ̃klɛ̃ gãgãwo! Ɛ̃ɛ, yebe lɔ̃lɔ̃ a lè tɛ̀gbɛ̀.

⁸Èwè ne ɖù ŋùkèkè ji! Ɛ̃ɛ, yebe lɔ̃lɔ̃ a lè tɛ̀gbɛ̀.

⁹Wètri kudo wètriviwo ne nɔ ɖù èzã ji! Ɛ̃ɛ, yebe lɔ̃lɔ̃ a lè tɛ̀gbɛ̀.

¹⁰E do èku Ejiptè be ŋùkɔ̀gbeviwo, Ɛ̃ɛ, yebe lɔ̃lɔ̃ a lè tɛ̀gbɛ̀.

¹¹E ɖè Izràɛl, yebe dùkɔ̃a to lè Ejiptè! Ɛ̃ɛ, yebe lɔ̃lɔ̃ a lè tɛ̀gbɛ̀.

¹²E wɔ̀ ekèa to yebe ŋusɛ̃ gã mè! Ɛ̃ɛ, yebe lɔ̃lɔ̃ a lè tɛ̀gbɛ̀.

¹³E ma plãŋùpòfɛ̃ be àpùa mè ɖo àkpa èvè! Ɛ̃ɛ, yebe lɔ̃lɔ̃ a lè tɛ̀gbɛ̀.

¹⁴E na Izràɛlviwo to e mè yì! Ɛ̃ɛ, yebe lɔ̃lɔ̃ a lè tɛ̀gbɛ̀.

¹⁵Vɔ̀, e zĩ Faraɔ̀n kudo yebe àhùakɔ̃a ɖo plãŋùpòfɛ̃ be àpùa mè, Ɛ̃ɛ, yebe lɔ̃lɔ̃ a lè tɛ̀gbɛ̀.

¹⁶E kplɔ̀ yebe dùkɔ̃a lè zògbèa ji! Ɛ̃ɛ, yebe lɔ̃lɔ̃ a lè tɛ̀gbɛ̀.

¹⁷E pò èfìɔ gãgãwo wù! Ɛ̃ɛ, yebe lɔ̃lɔ̃ a lè tɛ̀gbɛ̀.

¹⁸E crɔ̃ èfìɔ ɖìnyiwo, Ɛ̃ɛ, yebe lɔ̃lɔ̃ a lè tɛ̀gbɛ̀.

¹⁹Àmorì be èfìɔ, Sihɔ̀n Ɛ̃ɛ, yebe lɔ̃lɔ̃ a lè tɛ̀gbɛ̀.

²⁰Kudo Bacàn be èfìɔ, Ɔg Ɛ̃ɛ, yebe lɔ̃lɔ̃ a lè tɛ̀gbɛ̀.

²¹E sɔ woabe ànyigbã sɔ wɔ̀ ècrɔ̃nu na yebe dùkɔ̃a! Ɛ̃ɛ, yebe lɔ̃lɔ̃ a lè tɛ̀gbɛ̀.

²²E sɔ ɛ̀ wɔ̀ ècrɔ̃nu na Izràɛl, yebe sumɔ̃via! Ɛ̃ɛ, yebe lɔ̃lɔ̃ a lè tɛ̀gbɛ̀.

²³Lè miabe àyàɖùɖu mèa, e ɖoŋùku mia ji. Ɛ̃ɛ, yebe lɔ̃lɔ̃ a lè tɛ̀gbɛ̀.

²⁴E hlùɛ̃ mi lè miabe kɛ̃tɔwo si mè, Ɛ̃ɛ, yebe lɔ̃lɔ̃ a lè tɛ̀gbɛ̀.

²⁵E nana nuɖùɖu yebe ènuɖoɖowo kpata, Ɛ̃ɛ, yebe lɔ̃lɔ̃ a lè tɛ̀gbɛ̀.

²⁶Mì doàkpe na Mawu kè lè jiŋùkusia! Ɛ̃ɛ, yebe lɔ̃lɔ̃ a lè tɛ̀gbɛ̀.