Read gen Èhàwo 139 Bible Online

Èhàwo 139 - gen bible

Èhàwo 139

¹David be Èhà kè wo ɖè lè hàsìnɔ̀ gã be xoma mè. Tɔhonɔ̀, wò jrò àpe èjì be gòglòpe kpɔ eye wò nya mù.

²Wò nya àpe ànyi nɔ̀nɔ be gàmè, eye wò gbà nya gà kè mè ye mù la sitèa cã jè ŋùkɔ̀. Wò jèsi àpe ètamè susuwo kpata klua.

³Wò nya wàlɛbɛ kè mù la zɔ̃a kudo hùe kè nu mù la mlɔ̃ ànyi a. Eye wò jèsi àpe wɔ̀wɔwo kpata.

⁴Kakakè mù la kè ènua, wò nya ènu kè mù la gblɔ̃a xoxo ke!

⁵Wò jã mù lè ŋùgbe kudo ŋùkɔ̀, eye wò sɔ àpo àlɔ̀ dà ɖo ji nyè.

⁶Wò nya mù nyuɛ̃ ɖe. Lè tɔ̀ nyè gomèa, e nyɔ ŋutɔ. Ekèa to àpe ènugɔ̃mè sèse ŋuti.

⁷Fikɛ mù la teŋu si yì boo lè gbɔ wò ò? Àlo fikɛ mù la si yì lè àpo ŋùmè ò?

⁸Ne mù lia ji yì jiŋùkusia, wò lè funu. Ne mù yì mlɔ̃ àmè kukuwo dòmèa, kpɔɖa, wò lè funu cã.

⁹Ne mù zrò, fɔ̃fɔ̃mè, yì wla ɖo àpù be nukpòpewo cã,

¹⁰funua ŋutɔ gɔ̃ ye àpo àlɔ̀a, la kplɔ̀ mù so. Eye wò la le mù sùsuiɖe.

¹¹Mù la teŋu gblɔ̃ be: “Mù jro la yì wla ɖo vìvìti cicri mè. Eye ne ŋùkèkè ne trɔ èzã pòhla mù gòdò!”

¹²Vɔ̀, lè gbɔ wòa, vìvìti ŋutɔ cã kɔ̀nà, eye èzã kɔ̀nà sìgbè ŋùkèkè nène. Vìvìti kudo kɔ̀kɔ̀ɛ wo nyi ènu ɖèka ŋùkumè lè gbɔ wò.

¹³Èwò ye wɔ̀ àpe jìjigbè, eye wò wɔ̀ mù lè ènɔ̀ nyè be àdɔ̀mè ke.

¹⁴Tɔhonɔ̀, mù la doàkpe na wò ɖo, wò ɖo mù. Ɛ̃ɛ, àpe àmètia wɔ̀ ŋùdã gbà nya kpɔkpɔ. Mù do è jèsi be àpo dɔwɔ̀wɔwo nyi ŋùdãnu.

¹⁵Èpu nyèwo mu bè do wò ò, wàlɛbɛ kè ne wò ɖo mù lè wawla mè, eye wò wɔ̀ àɖàŋù lè ŋuti nyè, lè ànyigbã be gòglòpea.

¹⁶Kè mù kpɔ̀tɔ̀ nyi hũkɔ̃ɛ̃a, àpo ŋùkuviwo le kpɔ mù xoxo! So gà ŋuã mè ke ye wò ŋlɔ̃ ŋùkèkè kèwo wò la na mù ɖo xoma wòa mè, co, wò mu kpɔ tɔ wo hɛ̃hlɛ̃ na mù ò.

¹⁷Aò Mawu, àpo tamèsusuwo sùgbɔ ŋutɔ eye wo gòglò.

¹⁸Àmè kɛ ye la teŋu hlɛ̃ wo ò? Wo sùgbɔ wu èkɔkuiwo Vɔ̀ ne mù gbà teŋu hlɛ̃ wo cã, nyè mu la teŋu sè wò gɔ̃mè kpɔ ò.

¹⁹Aò Mawu, ne àmènyrãkuwo kpò ye wò wùnàa, eŋuã nyà hlɔ̃dãtɔwo ɖoɖa boo lè gbɔ nyè.

²⁰Ɖo wo zãna àpo nyikɔ sɔ flùnà àmè kpɔ̀tɛawo, e ye ke wo sɔ wɔ̀nà èvuɛ̃.

²¹Tɔhonɔ̀ mù la dokɛ̃ àmè kèwo crì wòa. Mù dona àdɔ̀mèze ɖo àmè kèwo sitè ɖo ŋuti wòawo ŋuti.

²²Mù crì wo klua, wo trɔ zũ àpe kɛ̃tɔwo.

²³Aò Mawu, jrò mù kpɔ, ne wòa nya àpe èjì. Do mù kpɔ ne wòa nya àpe tamèsusuwo.

²⁴Kpɔ ne mù le zɔ̃ lè èmɔ̃ bàɖà ɖe jia, kplɔ̀ mù va to èmɔ̃ wòa ji kpò. Ɖo èmɔ̃ wòa ye nyi èmɔ̃ àdodoe, kè lè tɛ̀gbɛ̀.