Read gen Èhàwo 140 Bible Online

Èhàwo 140 - gen bible

Èhàwo 140

¹David be Èhà kè wo ɖè lè hàsìnɔ̀ gã be xoma mè.

²Tɔhonɔ̀, xɔ̀ mù lè àmènyrãkuwo si mè, kpɔ ji nyè lè ènudrãwɔ̀tɔwo si mè.

³Ènu bàɖà be sùsuwo kpò wo ɖènà, eye wo hɛ̃nà tùkaɖa va àmèwo dòmè gbè sia gbè.

⁴Woabe àɖe ɖa sìgbè èdã-tɔ̀ nène, eye flìbo be àɖi lè woabe ènu mè. Ènu bɔ̀ kpoo

⁵Tɔhonɔ̀, mù gbà na ma jè àmè bàɖàwo si mè ò. Kpɔ ji nyè lè ènudrãwɔ̀tɔ kèwo le ji àpe ànyi jèje a si mè.

⁶Àmè kèwo jranawo tre èmɔ̃ ɖo ŋùkɔ̀ na mù lè èwùi mè. Wo ɖo èkà ku èglɛ ne woa sɔ le mù. Wo tre èmɔ̃ ɖo èmɔ̃ to. Ènu bɔ̀ kpoo

⁷Mù gblɔ̃ na Tɔhonɔ̀ be: “Èwò ye nyi Mawu nyè. Tɔhonɔ̀, ɖo èto mù ne mù le fã yɔ wòa.

⁸Mawu Àtaa, àpo ŋusɛ̃ ye hlùɛ̃ mù gã. Wò kpɔ ji nyè lè àhùawɔ̀wɔ zãgbè.

⁹Tɔhonɔ̀, mù gbà ɖo èto àmè bàɖàwo be biɔbiɔ ò, mù gbà na woabe sùsuwo ne nɔ kpɔ eji jèje ò.” Ènu bɔ̀ kpoo

¹⁰Àmè kèwo xa mù trɔ do a, le gblɔ̃ ènyà dakàwo. Na woabe àhovì-nyawo ne trɔ cɔ̃ woa ŋutɔ!

¹¹Na ne èzò-ka zòzowo ne hlɛ̃ kɔ̀ ɖo woa ji! Na ne woa kɔ̀ wo ɖo èzò hɛ̀hɛ̀ mè, lè ègũ titowo mè. Eye wo mu gbà kpɔ èmɔ̃ to gbèɖe ke ò.

¹²Àmè kèwo gblɔ̃nà àmè be ènyà bàɖàwo mu kpɔ èmɔ̃ la nɔ̀ ànyigbã ji ò. Ɛ̃ɛ, gbledo ne nyà àmè nyrãku kèawo ɖonu ŋùklɛ̃-ŋùklɛ̃.

¹³Mù nya be Tɔhonɔ̀ la sò jɔ̀jɔɛ na ŋuzĩzĩmewo, la gbà sò jɔ̀jɔɛ na wɔ̀amènɔ̀wo.

¹⁴Ɛ̃ɛ Tɔhonɔ̀, àmè kèwo ɖo èjì mè kɔ̀kɔ̀ɛa, la ɖo tèpe ɖo gbɔ wò.