Read gen Èhàwo 141 Bible Online

Èhàwo 141 - gen bible

Èhàwo 141

¹David be Èhà. Tɔhonɔ̀, mù le yɔ wò, ɖèbla va gbɔ nyè. Ɖo èto mù ne mù le yɔ wòa.

²Na ne àpe kuefã ne va gbɔ wò sìgbè lifi be àzìzɔ nène. Eye àpe àlɔ̀wo be kɔkɔ yì èji ne nɔ̀ sìgbè fìɛ̃si nunana-vɔsa nène.

³Tɔhonɔ̀, nɔ ɖia àpe ènu ne wòa kpɔ àɖe nyèa cã ji.

⁴Mù gbà na àpe èjì ne susu ènu bàɖà ɖe àlo bèa do èha kudo ènu bàɖàwɔ̀tɔ ɖe ò. Nyè mu jro la kpɔ jìjɔɛ ɖekpe kudo wo ò.

⁵Àmè kè le sè ègbè na Mawu a, teŋu pò mù fà gbà gbe ènyà na mù lè lɔ̃lɔ̃ mè. Vɔ̀, nyè mu le ji àmè nyrãkuwo be àdɔ̀mè nyuɛ̃ ɖe ò. Co nyè mu la dokpò kuefãfã lè woabe gbledowo mè ò.

⁶Ne wo tùtù woabe kòjoɖotɔwo pu èkpe jia, kɛ̃tɔ nyèwo la nya be mù le to nyàwo.

⁷Sìgbè àlekè ye ànyigbã mè kènà ye e fɛ̃naa, nène ye èkuwode la hũ sɔ mì woabe èpu kèwo kãkã ɖo àfi sia àfia.

⁸Mù trɔ ŋùku nyèwo ɖoɖa gbɔ wò Tɔhonɔ̀ Mawu. Ŋuti wò mù dojì ɖo: kpɔ àgbè nyèa ji.

⁹Hlùɛ̃ mù lè èmɔ̃ kè wo tre na mù kudo àfɔ̀klɛ̃nu kèwo ènumàɣewɔ̀tɔwo sɔ ɖo ŋùkɔ̀ na mù a si.

¹⁰Na àmè nyrãkuwo ŋutɔ ne jè woabe èmɔ̃ tetrewo mè, ne nyèa ma to funu va yì kpoo.