Read gen Èhàwo 144 Bible Online

Èhàwo 144 - gen bible

Èhàwo 144

¹David tɔ̀. Àkpe na wò Tɔhonɔ̀, àpe àkpã sɛ̃sɛ̃a. E fiɔ mù àvũwɔ̀wɔ, jrà mù ɖo na àhùa.

²Tɔhonɔ̀ ye nyi àpe àgbògbò ku hlùɛ̃tɔ. E cɔ̃ àsi ji nyè ku ŋusɛ̃ eye e na mù vòvo. E ye nyi àkpoxɔ̀nu na mù. E bɔ̀bɔ̀ dùkɔ̃wo ɖo gɔ̃mè na mù.

³Tɔhonɔ̀, nukɛ ye àgbètɔ nyi, ne wòa le ŋùku ɖo e ŋuti, àlo àgbètɔ be vi, ne wòa kãma na ɛ̀ ò?

⁴Àgbètɔ lè sìgbè àya pòpo nène, yebe àgbè lè sìgbè vɔ̃vɔ̃lì kè va le yìa nène.

⁵Oò Tɔhonɔ̀, zã jiŋùkusi, ne wòa ɖì va ànyigbã; tɔ àsi ètowo ne woa tù àzìzɔ lìlìlì.

⁶Dà bìɖàwo ne kɛ̃tɔwo woa kãhlɛ̃. Dà àŋùti wòawo ne woa kãkã gbɛ̀ɛ.

⁷Sɔ̀ àpo àlɔ̀ ɖoɖa so jiŋùkusi ne wòa ɖè mù to, gbà hlùɛ̃ mù lè ètɔ̀ gãgãwo mè kudo àmèjroviwo si mè.

⁸Àmè kèwo ɖànà àjè eye wo gbà tànà ènu ɖo àjè e jia.

⁹O Mawu, mù la jì èhà yeye na wò, mù la pò èkà ŋùkuvi èwo be sãŋùgu sɔ jì kafu be èhà na wò.

¹⁰Èwò ye nana jiɖùɖu èfìɔwo. Èwò ye hlùɛ̃ àpo sumɔ̃vi David gã lè èwi vuɛ̃ a nu.

¹¹Ɖè mù to, hlùɛ̃ mù lè àmèjroviwo si mè. Àmè kèwo ɖànà àjè eye wo gbà tànànu ɖo àjè e jia.

¹²Na miabe èvi ŋusùwo ne sĩ lè woabe vifɛ̃ mè sìgbè àti kèwo mìɔ̃ gbãnà nène. Miabe èvi nyɔ̃nùwo la nɔ̀ sìgbè koŋùjikpe kèwo ŋuti wo jràɖo lè fìɔsa mèa nène.

¹³Miabe àvàwo ji ne ɖɔ gbãgo ku nyɔnawo. Miabe àlɛ̃wo ne jì ɖo ji kpe è, sìgbè kàwìvɔàtɔ̃ ku eji vɔwo nène lè miabe èlãkpawo mè.

¹⁴Miabe ènyìwo ne kpɔ lãmè. Ne èhɔ̃ gbãgbã àlo sisi to lè èdù mè ɖe mu gbà nɔ̀ ànyi ò. Wo mu gbà sè àlenana ɖekpe lè mia dòmè ò.

¹⁵Ènu sia ènu la nyɔ na dùkɔ̃ kè lè lekea. Ɛ̃ɛ, sìtuɖèɖe na dùkɔ̃ kè Tɔhonɔ̀ nyi Mawu na.