Read gen Èhàwo 145 Bible Online

Èhàwo 145 - gen bible

Èhàwo 145

¹David be kafu-ha. Aò Èfìɔ nyè, Mawu nyè, mù la nɔ jìhà mlã wò, gbà nɔ doàkpe na wò tɛ̀gbɛ̀ kaka sɔ yì.

²Mù la nɔ doàkpe na wò gbè sia gbè gbà nɔ jì kafu-ha na wò tɛ̀gbɛ̀ kaka sɔ yì.

³Tɔhonɔ̀ lòlò, e ye jè na kafu-ha, àmè ɖekpe mu la teŋu nya yebe lòlo mè ò.

⁴Wo la kafu àpo èdɔwɔ̀wɔwo so àkɔ ɖe na èbu, eye wo la ɖè àpo kãlì nuwɔ̀wɔwo fiɔ.

⁵Mù la nɔ dèŋùgblè so àpo nyiɖìɖi be gogo gãa ŋuti eye mù la nɔ gblɔ̃ àpo ŋùdãnu wɔ̀wɔwo tɛ̀gbɛ̀.

⁶Wo la nɔ pò nupo so àpo kãlìnu wɔ̀wɔwo be ŋusɛ̃a ŋuti. Eye mù la ɖè àpo ènu jɔ̀ àsuwo fiɔ.

⁷Wo la ɖoŋùku àpo àdɔ̀mè nyuɛ̃ mà-vɔ mà-vɔa eye wo la do jìjɔɛ be àpa na àpo ànùkua wɔ̀wɔ.

⁸Tɔhonɔ̀ ɖɔ kudo màje ku ŋuzĩzĩkuku, e hɛ̃nà àdòdò gbà ɖɔ kudo lɔ̃lɔ̃.

⁹Tɔhonɔ̀ nyɔ na àmè sia àmè. E lɔ̃nà yebe ènu ɖoɖowo kpata ku hòmèfà.

¹⁰Tɔhonɔ̀, àpo ènu ɖoɖowo kpata la kpli ègbè ɖodu la jì kafu-ha na wò eye àpo àmè kɔ̀kɔ̀ɛwo la doàkpe na wò.

¹¹Wo la gblɔ̃ àpo fìɔdua be gogo, wo la ɖègbèfã àpo ènujɔ̀asuwo.

¹²Nène a ye wo la ɖè àpo kãlì nuwɔ̀wɔwo kudo àpo fìɔdua be nyiɖìɖi gãa fiɔ àmèwo.

¹³Àpo fìɔdua nyi fìɔdu kè mu la gbã kpɔ ò eye àpo fìɔɖùɖua la nɔ̀ ànyi kaka sɔ yì. Mawu wɔ̀ ànùkua lè yebe ɖoɖɛwo kpata mè, e ɖènà yebe lɔ̃lɔ̃ fiɔ lè yebe wɔ̀wɔwo mè.

¹⁴Tɔhonɔ̀ fɔ̃na àmè kèwo kpata jè ànyi a ɖotè eye e dona ŋusɛ̃ àmè kèwo gbɔjɔa.

¹⁵Àmè sia àmè le kpɔ wò kudo èjì ɖèɖe. Eye wò nana wo ènuɖùɖu ɖo àmèhùenu.

¹⁶Wò kè àpo àlɔ̀, eye wò nana àgbèagbèawo ènu kè wo jro a.

¹⁷Tɔhonɔ̀ wɔ̀nà ànùkua lè yebe wɔ̀wɔwo mè. E ɖènà yebe lɔ̃lɔ̃ fiɔ lè yebe wɔ̀wɔwo mè.

¹⁸E tètènà gogo àmè kèwo kpata do àpa yɔ ɛ̀a, 1 àmè kèwo le ji ì lè ànùkua mèa.

¹⁹Na àmè kèwo ɖona bùbu na ɛ̀a, e wɔ̀nà ɖo woabe jijiwo ji. E ɖona èto woabe àpadodo eye e hlùɛ̃nà wo gã.

²⁰Tɔhonɔ̀ kpɔna àmè kèwo ɖo lɔ̃lɔ̃ na ɛ̀awo ji, vɔ̀ e crɔ̃na àmè vuɛ̃wo kpata.

²¹Mù la jì kafu-ha na Tɔhonɔ̀, eye ènu kè gbe lè àgbè kpòa la doàkpe na Mawu kɔ̀kɔ̀ɛa, tɛ̀gbɛ̀ kaka sɔ yì.