Read gen Èhàwo 146 Bible Online

Èhàwo 146 - gen bible

Èhàwo 146

¹Mì jì kafu-ha na Tɔhonɔ̀. Mù jro la jì Tɔhonɔ̀ be kafu-ha!

²Mù jro la jì yebe kafu-ha lè àpe àgbèzãwo kpata mè. Mù la jì kafu-hawo na Mawu nyè kaka kè mù gbe lè kpòa.

³Mì mu gbà dojì ɖo xixe kèa be àmègãwo ŋuti ò. Àgbètɔ kpò wo nyi, wo mu la teŋu hlùɛ̃ àmè gã ò.

⁴Ne wo kua, ànyigbã mè kpò wo trɔ yìnà. Gbè ŋua gbè ke ye woabe tamèsusuwo buna kudo wo.

⁵Jɛ̀jrɛ̀ na àmè kè ye Yakɔb be Mawu a nyi hlùɛ̃gã na, àmè kè sɔ yebe ŋùɖo dà ɖo Tɔhonɔ̀ yebe Mawu jia.

⁶Tɔhonɔ̀ ye ɖo jiŋùkusi kudo ànyigbã, àpù kudo ènu kèwo lè e mèa. Àmè kè mu ɖènà ɖèka lè nyàwototo ji ò.

⁷E sònà jɔ̀jɔɛ na àmè kèwo àyà le ɖikia. E nana nuɖùɖu àmè kèwo àdɔ̀ le wùa. Tɔhonɔ̀ ɖènàgà àmè kèwo lè ègà mèa.

⁸Tɔhonɔ̀ hũnà ŋùku na ŋùkugbãgbãnɔ̀wo, Tɔhonɔ̀ fɔ̃na àmè kèwo gbɔjɔa ɖotè, Tɔhonɔ̀ lɔ̃nà àmè kèwo sènà ègbè na ɛ̀a.

⁹Tɔhonɔ̀ kpɔna àmèjrowo ji. E lenabè na àhòsì ku cɔɛviwo eye e glina àmè vuɛ̃ a be ɖoɖo.

¹⁰Tɔhonɔ̀ nyi Èfìɔ kaka sɔ yì. Yèruzàlɛm, Tɔhonɔ̀ ye nyi àpo Mawu, so mà-vɔ yì mà-vɔ mè. Mì jì kafu-ha na Tɔhonɔ̀.