Read gen Èhàwo 147 Bible Online

Èhàwo 147 - gen bible

Èhàwo 147

¹Mì jì kafu-ha na Tɔhonɔ̀! Ènu nyuɛ̃ ɖe be nyi be woa jìhà na miabe Mawu. Ɛ̃ɛ, e nyɔ be woa jì kafu-ha na ɛ̀.

²Tɔhonɔ̀ gbìgbɔ̀ tù Yèruzàlɛm, e trɔ bɔ̀ Izràɛl be àmè kèwo kã ɖo ègbea.

³E dànà èdɔ̀ na èjì gbãgbãnɔ̀wo gbà blana woabe àbìwo.

⁴E nya hɛ̃hlɛ̃mè na wètriviwo kpata, e ɖo nyikɔ na wo àmètɔ̀ àmètɔ̀.

⁵Miabe Tɔhonɔ̀ lòlò, e gbà nyi ŋusɛ̃tɔ gã ɖe. Yebe nunya mu ɖo lipò ò.

⁶Tɔhonɔ̀ lena hòmèfanɔ̀wo ɖotè. Vɔ̀ e sɔna àmèvuɛ̃wo pònà gbɛ̀lɛ lè ànyigbã ji

⁷Mì jìhà sɔ doàkpe na Tɔhonɔ̀. Mì pò èhɛ sɔ jìhà na miabe Mawu.

⁸E ye na ye lilikpowo lè jiŋùkusi, e ye jrànà èjijàja ɖo na ànyigbã, gbà nana ègbewo mìɔ̃ nà ɖo ètowo ji.

⁹E nana ènuɖùɖu èlãhawo kudo àkpàfiɔ̃vi kèwo le ji ènu la ɖù a.

¹⁰Mu nyi èsɔ be ŋusɛ̃a ye dona jìjɔɛ na na ɛ̀, kaka jè èdùputɔa be àgbàgba jèjewo ji ò.

¹¹Vɔ̀ àmè kèwo le do bùbu e ŋuti eye wo kãɖo yebe lɔ̃lɔ̃ jia, be ènu ye dona jìjɔɛ nana ɛ̀.

¹²Yèruzàlɛm ne jì gogo-ha na Tɔhonɔ̀. Ziɔ̀n be èdùa ne jì kafu-ha na yebe Mawu a.

¹³Ɖo e na àpo àgboglatiwo sɛ̃ŋu, e tu sì na èviwòwo lè àpo àgbowo mè.

¹⁴E na àpo lipòwo ŋuti fa ne wòa nɔ̀ àgbè lè ŋuti fàfa mè. E la na wò àgblèmènuku nyuɛ̃wo.

¹⁵Tɔhonɔ̀ sɔ yebe ègbè do àsiwo ɖoɖa ànyigbã ji eye yebe ènyà le ɖè zɔ̃ zè ɖèka.

¹⁶Nène a, e nana èsìkpeji jànà kãkã sìgbè ɖètifu nène lè ènukuyàya hùenu, e kãkãnà àhũ[25] sìgbè àfi nène.

¹⁷E nana èsìkpewo jànà. Àmè kɛ ye la teŋu nɔ̀tè lè yebe àvìvɔ nu ò?

¹⁸Kè Tɔhonɔ̀ ɖè ègbèa, wo srè trolo. Wàlɛbɛ kè be ɖo àya pòpo ɖoɖa, ètɔ̀wo srànà

¹⁹E ɖè yebe ènyàwo fiɔ yebe dùkɔ̃a, yebe ègbè do àsi kudo ɖoɖowo na Izràɛl.

²⁰Mu wɔ̀ ekèa na dùkɔ̃ ɖewo kpɔ ò, wo mu nya yebe ɖoɖowo cã ò. Mì jì kafu-ha na Tɔhonɔ̀!