Read gen Èhàwo 148 Bible Online

Èhàwo 148 - gen bible

Èhàwo 148

¹Mì jì kafu-ha na Tɔhonɔ̀! Mì jì kafu-ha na Tɔhonɔ̀ so kaka jiŋùkusi. Mì jì kafu-ha na ɛ̀ so èji hũi.

²Mìa yebe àtikplɔtɔwo, mì jì kafu-ha. Mìa yebe àhùakɔ̃wo, mì jì kafu-ha na ɛ̀.

³Èwè kudo wètri ne nɔ jì kafu-ha na ɛ̀. Wètrivi kɔ̀kɔ̀ɛwo kpata ne nɔ jì kafu-ha na ɛ̀.

⁴Mìa jiŋùkusi be jiŋùkusiwo, mì jì kafu-ha eye èsì kèwo lè funua cã ne nɔ jì kafu-ha na ɛ̀.

⁵Eye ènuɖoɖowo kpata ne nɔ jì kafu-ha na Tɔhonɔ̀. Ɛ̃ɛ, do e ye ɖè ègbè ye wo jɔ̀.

⁶E ɖo tèpe na wo kaka sɔ yì. E ɖo èse ɖe ànyi kè ji wo mu la dà òa.

⁷Mì jì kafu-ha na Tɔhonɔ̀ so kaka ànyigbã ji, mìa àpù gãgãwo kudo èlã ɖo vɔ̃vɔ̃ kèwo kpata lè woabe ègũwo mèa.

⁸Mìa èzò kudo èsìkpeji, àhũ fàfa kudo èyezo, àya sɛ̃sɛ̃ kè sènà ègbè na ɛ̀a, mì jì kafu-ha na Tɔhonɔ̀.

⁹Mìa ètowo kudo ètokɔ̃ɛwo kpata, àti sɛ̃nakuwo kudo sedàtiwo kpata,

¹⁰ègbemèlã kudo èlãhawo, èdãwo kudo àyamè xèviwo, mì jì kafu-ha na Tɔhonɔ̀.

¹¹Mìa ànyigbã ji be èfìɔwo kudo dùkɔ̃wo, cãmìwo kudo xixea be kplɔ̀tɔwo, mì jì kafu-ha na ɛ̀.

¹²Mìa ɖèkajɛwo kudo tùgbɛ̀jɛwo, àmègãwo kudo ɖèviwo, mì jì kafu-ha na ɛ̀.

¹³Mì jì kafu-ha na Tɔhonɔ̀, ɖo yebe nyikɔ ɖèka kpò ye lòlò, yebe gogoa gbã ɖo jiŋùkusi kudo ànyigbã ji.

¹⁴E na nyiɖìɖi kudo ŋusɛ̃ yebe dùkɔ̃a. Eye ŋuti wo le jì kafu-ha na ɛ̀, Izràɛlvi kèwo nyi yebe àmè kɔ̀kɔ̀ɛwo, dùkɔ̃ kè gogo èa. Mì jì kafu-ha na Tɔhonɔ̀!