Read gen Èhàwo 16 Bible Online

Èhàwo 16 - gen bible

Èhàwo 16

¹David be èhàlo. Oò Mawu, èwò kè nyi àpe ètabèpea, hlùɛ̃ mù gã.

²Mù gblɔ̃ na Tɔhonɔ̀ be: “Èwò ɖèka ye nyi Àpetɔ nyè. Èwò si mè kpò nyɔna nyèa lè.”

³Mù kpɔna jìjɔɛ ɖo Mawu be àmè kɔ̀kɔ̀ɛwo ŋuti lè èdò. Ɖo wo nyi àmè ɖìnyiwo.

⁴Àmè kè va yì jina àlɔ̀do lè vòdu gbɔa be àyà la sùgbɔ. Nyè mu la wɔ̀ woabe èhũ vɔsa kpɔ gbèɖe ò. Nyè mu la yɔ woabe nyikɔ sɔ kafu wo gbèɖe ò.

⁵Tɔhonɔ̀, èwò ye nyi àpe àgbèa be nyɔna, àkpa kè nyi tɔ̀ nyèa. Àgbè nyèa lè àsi wò mè.

⁶Àkpa kè wò na mù a, jè ŋùmè na mù. E nyi ècrɔ̃nu àdodoea.

⁷Mù le do àkpe na Tɔhonɔ̀ kè le pò èto ɖo na mù a. Èjì nyè cã le pòfiɔ mù lè èzã be ŋùgblè dèdewo mè.

⁸Àpe sùsu lè Tɔhonɔ̀ ji wè sia wè. Kaka kè e lè àpe àhàdamèa, nyè mu la jè ànyi kpɔ ò.

⁹Ɖo eŋuã ŋutia, èjì nyè le haya eye mù le kpɔ jìjɔɛ. Àmèti nyè cã lè kãkã ɖo e ji blibo mè.

¹⁰Gbèɖe, wò mu la tàsi mù ɖo èkuwode ò, nènea ke ye wò mu na èvi wò ɖèvea la nyìnyɔ̀ lè èyɔ̀ mè ò.

¹¹Wò la ɖè àgbè be èmɔ̃a fiɔ mù. Jìjɔɛ nɔ̀nà fikè wò lèa gbãgo, lè gbɔ wòa, nyɔna be èsìvudo ye lè tɛ̀gbɛ̀.