Read gen Èhàwo 17 Bible Online

Èhàwo 17 - gen bible

Èhàwo 17

¹David be kuefã. Tɔhonɔ̀, sè àpe biɔbiɔ jɔ̀jɔɛ, ɖo èto àpe àvigbea! Ɖoto sè àpe kuefã: ènu nyè mu blènà àmè ò.

²Èwò ye la sò jɔ̀jɔɛ na mù, ɖo ŋùkuvi wòwo kpɔna ènu kè sɔ̀gbèa.

³Wò jrò àpe èjì mè kpɔ. Lè èzã kè wò le ɖia àpe àmètia, wò jrò mù kpɔ nyuɛ̃ ɖe, eye wò mu kpɔ ènu bàɖà ɖe lè ètù mè na mù ò.

⁴Nyè mu ɖè ènu kè mù susu so àmèwo ŋutia, gblɔ̃ ò. Mù wɔ̀ ènu kè wò biɔa, mù le ŋùku ɖo èmɔ̃ kè wò fiɔ mù a ŋuti kpò.

⁵Mù ɖo àfɔ̀ àpo àfɔ̀do mè, nyè mu ɖiɖi ò.

⁶Vɔ̀ fifìa, mù la yɔ wò, aò Mawu, ɖo wò la ɖoto mù. Bɔ̀bɔ̀ èto wòa, ne wòa sè àpe ègbè.

⁷Ɖè àpo lɔ̃lɔ̃ fiɔ mù. Ɛ̃ɛ, wò hlùɛ̃nà àmè kè le ji ètabèpe lè gbɔ wòa gã, lè àmè kèwo sitè ɖo e ŋutiawo si.

⁸Cɔ̃ ji nyè sìgbè àdɔ̀kùnɔ̀ àdodoe ɖe nène. Wla mù ɖo àpo àwà be vɔ̃vɔ̃lì gɔ̃mè.

⁹Ne ma nɔ̀ àzɔ̀ge boo na àmè bàɖà kèwo le ji èvuɛ̃ na mù a, na kɛ̃tɔ vuɛ̃ɖì kèwo trɔ do mù a.

¹⁰Woabe èjì mu kuna ŋuzĩzĩ ò, eye woabe ènumè ɖɔ ku gòyigbewo.

¹¹Wo kplɔ̀ mù do kaka va xa mù gòdò. Wo le ji èmɔ̃nu ne woa na mia jè ànyi.

¹²Wo lè sìgbè jãŋùta kè doxa nène, sìgbè jãŋùtavi kè le ji ènu la trɛ̃a nène.

¹³Tɔhonɔ̀ sitè! Yì dogò wo, ne wòa sɔ wo pu ànyi, sɔ èwui wòa sɔ hlùɛ̃ mù lè àmè bàɖàwo simè.

¹⁴Tɔhonɔ̀, sɔ àpo àlɔ̀ ɖè àmè kèawo jo boo lè àpo àmèwo dòmè, lè ànyigbã ji! Ènu kè kpò jè na woa yeŋu. Na be woabe èjìwo ne ɖɔ kudo ènu bàɖà veve kèwo wò jràɖo na woa. Ne woabe èviwo ne kpɔ ègomè lè gbledo kèawo mè, eye woabe ɖùkpɔ̀tɛawo ne kɔ̀ ɖo woabe viwo be viwo ji.

¹⁵Vɔ̀, na ne nyè ya ma kpɔ àpo ŋùkumè lè ànùkua mè, ne mù fɔ̃a, ma ɖɔpò lè àpo ŋùkɔ̀.