Read gen Èhàwo 18 Bible Online

Èhàwo 18 - gen bible

Èhàwo 18

¹Èhà kè wo ɖè lè hàsìnɔ̀ gã be xoma mèa. Tɔhonɔ̀ be sumɔ̃vi David jì ì na Tɔhonɔ̀ wàlɛbɛ kè e hlùɛ̃ ɛ̀ gã lè yebe kɛ̃tɔwo kudo Saolò si mèa. E gblɔ̃ be:

²“Mù lɔ̃ wò Tɔhonɔ̀, èwò ye nyi àpe ŋusɛ̃!

³Tɔhonɔ̀ nyi àkpã kè wla mù a, àgbògbò kè tɔ̃ èkpa trɔ do mù a. Eye e na mù vòvo. Mawu nyè mè ye mù kpɔ nɔ̀pe lè. E hlùɛ̃nà mù lè kɛ̃tɔ nyèwo si.

⁴Mù do àpa yɔ Tɔhonɔ̀ eye e hlùɛ̃ mù lè kɛ̃tɔ nyèwo si. Mì kafu Tɔhonɔ̀!

⁵Èku le pò àlì do mù xoxo, e le do vɔ̃vɔ̃ na mù sìgbè ètɔ̀ jèagla ɖe nène.

⁶Èkuwode be èkàwo pòxla mù, eye èku tre èmɔ̃ na mù.

⁷Lè gbledo nyèa mèa, mù do àpa yɔ Tɔhonɔ̀, mù fã yɔ Mawu nyè. So yebe nɔ̀pea, e ɖo èto àpe ègbè. Àpadodo nyèa, yì jè èto mè ke na ɛ̀.

⁸Wàlɛbɛ ŋua, ànyigbã hũhũ, ètowo be dodoewo hùã. Wo hũhũ lè Mawu be àdɔ̀mèzea be ŋùkɔ̀.

⁹Àzìzɔ tù so yebe ŋɔ̀tiwo mè, èzò sɛ̃ŋu ɖe to so yebe ènu mè kudo èzòkawo.

¹⁰E ɖiɖi jiŋùkusi eye e ɖì va ànyigbã ji. Yebe àfɔ̀wo gɔ̃mè do vìvìti cicri.

¹¹E lia yebe ènu ɖoɖo Kèrubim ɖèka ji zrò, eye e zrò lè àya be àwàdawo ji.

¹²E sɔ vìvìti wɔ̀ àvɔ sɔ cɔ̃, èsì do vìvìti kudo lilikpo klìkowo ye trɔ do è gòdò.

¹³Èzò tɔ̀hɛ kè kɔ̀a, jè ŋùkɔ̀ na ɛ̀, èzò be kɛ̃klɛ̃ kudo èzòkpe le to lè yebe lilikpowo mè.

¹⁴So èjia, Tɔhonɔ̀ na èji ɖè ègbè. Èjihũitɔa na wo sè yebe ègbè. Èzò kɛ̃klɛ̃ kudo èzòka bìzòwo ze lè jiŋùkusi.

¹⁵Tɔhonɔ̀ dà yebe àŋùtiwo sɔ kãkã yebe kɛ̃tɔwo ɖo xixea mè. E dà yebe bìɖàwo eye àmè sia àmè kãhlɛ̃.

¹⁶Àpù be gɔ̃mè ze peŋu eye xixea be dodoewo ci àma lè àpo ènyà gbe na àmè nu; lè àpo àdɔ̀mèze be àdã nu.

¹⁷Tɔhonɔ̀ drɛ̃ àlɔ̀ so jiŋùkusi le mù, e dɔ̃ mù to lè ètɔ̀ jèaglawo mè.

¹⁸E hlùɛ̃ mù lè kɛ̃tɔ sɛ̃ŋu nyèa si, lè àmè kèwo crì mù a si, àmè kèwo wugã mù a.

¹⁹Wo xa mù lè àpe gbledo be gàmè, vɔ̀ Tɔhonɔ̀ va xɔ̀ na mù.

²⁰E ɖè mù to lè bàɖà mè, na mù vòvo. E hlùɛ̃ mù ɖo yebe lɔ̃lɔ̃ a ŋuti.

²¹Mù wɔ̀ ɖo Tɔhonɔ̀ be èsea ji, mù wɔ̀ nyuɛ̃ eye e kɔ̀ àdɔ̀mè ɖo ŋuti nyè.

²²Mù zɔ̃ lè Tɔhonɔ̀ be èmɔ̃a ji, nyè mu trɔ ŋùgbe do yebe ènyà kɔ̀kɔ̀ɛa ò.

²³Tɔhonɔ̀ be ɖoɖowo kpata lè ŋùkɔ̀ na mù, nyè mu ɖèkɔ̀ lè yebe èjro ɖe ŋuti kpɔ ò.

²⁴Ɖo, mù lè ègbèji lè e gbɔ eye mù na àsà èvuɛ̃.

²⁵Mù wɔ̀ ɖo Tɔhonɔ̀ be èsea ji, e kpɔ ènu kè mù wɔ̀a eye e na mù yebe àjɔ̀.

²⁶Oò Tɔhonɔ̀! Wò wɔ̀nà ànùkua kudo àmè kè lè ègbèji na wòa. Eye wò ɖènà àpo àdɔ̀mè nyuɛ̃ fiɔna àmè kè wɔ̀nà nyuɛ̃a.

²⁷Wò ɖènà kɔ̀kɔ̀ɛnyinyi wòa fiɔ àmè kè kɔ̀a. Vɔ̀ wò nɔ̀nà àyèji na àmè kè drãa.

²⁸Èwò ye hlùɛ̃nà àmè bɔ̀bɔɛa gã, vɔ̀, wò ɖiɖina ègòyitɔ.

²⁹Tɔhonɔ̀, kɔ̀ àgbè nyèa ŋuti ne wòa nyà vìvìti kè lè ètù mè na mù a jo.

³⁰Mù sinatè ɖo kɛ̃tɔwo ŋuti lè àpo nyikɔ mè. Mawu nyè be ŋusɛ̃ ye mù sɔ mùnà àgbògbòwo.

³¹Mawu nyi kplɔ̀tɔ àdodoe eye yebe ènyà mè kɔ̀ peŋu. Tɔhonɔ̀ nyi àkpoxɔ̀nu na àmè kèwo ji nɔ̀pe lè e gbɔa.

³²Tɔhonɔ̀ ye nyi miabe Mawu, Mawu kè mi le sumɔa ye nyi miabe àkpã.

³³Mawu kèa ye ɖɔ̀go na mù ku ŋusɛ̃. E fiɔna mù èmɔ̃ kè zìɔ̃ a.

³⁴E na àfɔ̀ gɔ̃mè bi na mù sìgbè èse tɔ̀ nène. E li mù ɖo ètokɔ̃ɛwo ji.

³⁵E tù mù ɖo na àhùa wɔ̀wɔ, e fiɔ mù àlekè wo zãna gàjɛ̃ be àŋùdàti ɖoa.

³⁶Àkpoxɔ̀nu wòa ye nana mù èjiɖùɖu, àpo ɖùsilɔ sɛ̃ŋua ye le mù ɖotè eye àpo àdɔ̀mè nyuɛ̃ wɔ̀wɔ na mù le sĩ kpe è.

³⁷Ku àpo àlɔ̀doa, mù ɖènàbla eye àfɔ̀kɔ̃ nyèwo likè goŋu.

³⁸Mù tĩ kɛ̃tɔ nyèwo yomè kaka yì xe wo, mù crɔ̃ wo gbɔ̀xue trɔ gbɔ̀.

³⁹Mù gbã wo xãnya xãnya kaka be wo mu gbà teŋu sitè ò, wo ci ànyigbã lè àpe àfɔ̀wo gɔ̃mè.

⁴⁰Wò dona mù ŋusɛ̃ lè àvũwɔ̀wɔ nyèwo mè. Wò nana àmè kèwo sitè ɖo ŋuti nyèwo jènà ànyi lè ŋùkɔ̀ na mù.

⁴¹Wò do mù àlɔ̀ ye mù ɖo àfɔ̀ èhlò ji na kɛ̃tɔ nyèawo eye mù crɔ̃ àmè kèwo sitè ɖo ŋuti nyèa.

⁴²Wo do àpa co àmè ɖe mu lè, la va xɔ̀ na wo ò. Wo do àpa yɔ Tɔhonɔ̀ ŋutɔ cã, vɔ̀, e ɖè èkɔ̀ lè woa ŋuti.

⁴³Mù nyàmà wo. Wo trɔ sìgbè hũhũ kè àya kplɔ̀ le yìa nène. Mù kplɔ̀ wo sìgbè ɖiɖɔɛ lè èmɔ̃wo ji.

⁴⁴Wò cɔ̃ àsi ji nyè lè àgbètɔwo be àvũwɔ̀wɔ kudo mù mè; eye wò sɔ mù ɖo èga ɖo dùkɔ̃wo nu. Nène a, èdù kèwo nyè mu jèsi sã òa, ye va sumɔ mù.

⁴⁵Wo wɔ̀nà ɖo ènu kè mù gblɔ̃a ji trolo, àmèjroviwo kanafu mù.

⁴⁶Wo bu woabe jìdo eye àdìka sò wo eye wo to lè woabe àgbògbò sɛ̃sɛ̃wo mè, le pò tìtìtì.

⁴⁷Tɔhonɔ̀ lè àgbè! Gogo na àpe àkpã sɛ̃ŋu! Gogo na Mawu kè hlùɛ̃ mù gãa!

⁴⁸Mawu ye biɔ èhlɔ̃ na mù, e na dùkɔ̃wo lè àpe ŋusɛ̃ gɔ̃mè.

⁴⁹Wò xɔ̀ mù lè kɛ̃tɔ nyèwo simè. Wò na mù ɖù àmè kèwo sɔ àhùa ɖo ŋuti nyèwo ji, eye wò hlùɛ̃ mù lè ènyà sɛ̃sɛ̃ hɛ̃tɔwo si.

⁵⁰Ekèa ŋuti Tɔhonɔ̀, mù le do àkpe na wò lè dùkɔ̃wo dòmè eye mù gbà le lòlò àpo nyikɔ.

⁵¹Jiɖùɖu àkòŋùka ye Tɔhonɔ̀ na yebe èfìɔa. E ɖènà yebe lɔ̃lɔ̃ a fiɔ àmè kè ye ŋutɔ cã a, fiɔ David kudo yebe ènukuawo, kaka sɔ yì.