Read gen Èhàwo 19 Bible Online

Èhàwo 19 - gen bible

Èhàwo 19

¹David be Èhà kè wo ɖè lè hàsìnɔ̀ gã be xoma mèa.

²Jiŋùkusi le ɖè Mawu be gogo fiɔ, wètriviwo kpata le ɖè yebe àlɔ̀nudɔawo fiɔ.

³Ŋùkèkè le kã yebe àseŋu na ŋùkèkè kè jè e yomè a, èzã cã le gblɔ̃ ɛ̀ na èzã kè gbãnàa.

⁴Wo mu le sè ègbè dodo ɖe àlo nupo pòpo ɖe ò.

⁵Vɔ̀, woabe àŋɛ̀a gbã kpe ànyigbã ji, eye e yì xixea be nukpòpewo keŋu. Mawu ɖo nɔ̀pe na èwè lè jiŋùkusi.

⁶Ŋùdekɛ̃nyɛ mèa, e tona sìgbè nyɔ̃nùkpetɔ kè to so yebe nɔ̀pea[2] nène. E lè sìgbè èdùputɔ kè pu dù kaka ɖùji eye be gbà le ja pu dù bua nène.

⁷E tona so xixea be àgo ɖèka, zɔ̃nà kaka yì wuna yebe àzɔ̃lìa nu lè àgo ɖèa. Yebe zòzo a mu hùenà do ènu ɖekpe ò.

⁸Tɔhonɔ̀ be èsea lè gàji, e nana àgbè. Tɔhonɔ̀ be ɖoɖowo mè kɔ̀ peŋu-peŋu, wo nana ènunya àmè kèwo mu nya ènu òa.

⁹Tɔhonɔ̀ be kɔ̀dowo sɔ̀gbè tututu, wo hayana èjìwo. Tɔhonɔ̀ be èsea nyi ènu kɔ̀kɔ̀ɛ, e nana àmè kpɔna ènu nyuɛ̃ ɖe.

¹⁰Bùbu dodo Tɔhonɔ̀ ŋuti nyi ènu mà-ɖoɖi, e nɔ̀nà ànyi kaka sɔ yì. Tɔhonɔ̀ be ènyà sòsowo sɔ̀gbè, gbà lè jɔ̀jɔɛ tɛ̀gbɛ̀.

¹¹Wo xɔ̀asì sɔ wu sìka, dodo, sɔ wu sìka kɔ̃ nyuɛ̃wo. Wo gbà vivi wu ànyisì, wu ànyisì kè le sràa.

¹²Nyàwo, àpo ènyà sòsowo ɖona àfɔ̀ àfɔ̀ ji na mù, àpo sumɔ̃via. Àjɔ̀ tɔ̀xɛ ɖe lè woa ji kpɔkpɔ mè na mù.

¹³Àmè kɛ teŋu ŋɔjè ye ŋutɔ be àgɔ̀jèjewo mè ò? Sɔ kè mù jro, àgɔ̀ kèwo nyè mu le kpɔ òa.

¹⁴Ɖè mù jo lè ègòyitɔwo dòmè, ne wo mu gbà ɖo ŋusɛ̃ ɖe ɖo ji nyè ò! Nène a, nyè mu gbà la ɖo xìxa ɖe ò, eye wo mu la gbà dohùɛ ɖe do mù ò.

¹⁵Tɔhonɔ̀, àkpã sɛ̃sɛ̃ kudo xɔ̀namètɔ nyè, na àpe ènumè nyàwo kudo àpe èjìmè be susuwo ne jè ŋùmè na wò.