Read gen Èhàwo 2 Bible Online

Èhàwo 2 - gen bible

Èhàwo 2

¹Nukɛŋuti ye hũnyà-hũnyà lè dùkɔ̃a mè ò? Wo le wɔ̀ ɖoɖo kèwo mu la na ènu ɖekpe ò.

²Nukɛŋuti ye ànyigbã ji be èfìɔwo sitè eye èfìɔviwo le bla èse ɖo Tɔhonɔ̀ kudo yebe àmè ɖè ɖovòa ŋuti ò?

³Wo le gblɔ̃ be: “Mi sò woabe èkàa, ne mia ɖè woabe kɔ̀sɔ̀kɔsɔ kè bla mia ɖɛ!”

⁴Vɔ̀ àmè kè ɖo nɔ̀pe ɖo jiŋùkusia, le kò wo. E lè yebe fìɔzìkpea ji le ɖù fɛwu lè woa ŋuti.

⁵E yomè a, e le pò nupo na wo ku àdɔ̀mèze. Eye yebe èjìbibia na be wo le hũhũ.

⁶Tɔhonɔ̀ gblɔ̃ be: “Mù ɖo èfìɔ nyèa ɖo Ziɔ̀n, lè èto kɔ̀kɔ̀ɛa ji.”

⁷Ènyà kè Tɔhonɔ̀ gblɔ̃a ye kè. E gblɔ̃ na mù be: “Èwò ye nyi èvi nyè, so egbèa ke ye mù trɔ zũ ètɔ na wò.

⁸Biɔ mù kpò eye mù la sɔ dùkɔ̃wo sɔ na wò fàa. Ànyigbãwo la trɔ zũ tɔ̀ wò kaka sɔ yì woabe nukpòpewo keŋu.

⁹Wò la ɖo àsi woa ji kudo ŋusɛ̃ tɔ̀xɛ ɖe, la kplɔ̀ wo. Wò la teŋu gbã wo sìgbè èkɔgbãwo nène.”

¹⁰Fifìa, mìa èfìɔwo mì ɖè ènunya fiɔ! Mìa kòjoɖotɔ ku èdùkplɔ̀tɔwo, mì xɔ̀ ètopòɖowo.

¹¹Mì sumɔ Tɔhonɔ̀ kudo bùbu. Mì nya yebe hɔ̃hlɔ̃a lè àmè sisi mè.

¹²Mì kebe è ne mu gbà bijì ò. Mu nyi nène òa, mì la crɔ̃. Ɛ̃ɛ, yebe èjìbibia sinatè kaba. Sìtuɖèɖe ye la nyi na àmè kèwo sɔ woabe èjìdo dà ɖo Tɔhonɔ̀ jia!