Read gen Èhàwo 21 Bible Online

Èhàwo 21 - gen bible

Èhàwo 21

¹David be Èhà lè hàsìnɔ̀ gã be xoma mè.

²Tɔhonɔ̀, èfìɔa le kpɔ jìjɔɛ so ŋusɛ̃ wòa ŋuti. E ɖuna jìjɔɛ be èwè lè àpo hlùɛ̃gã mè.

³Wò na ɖoŋuti na yebe èjì mè be èjro wo, wò mu ɖè èkɔ̀ lè yebe ènuyuwo be jro ŋuti ò.

⁴Ɛ̃ɛ, wò to va kpe è kudo sìtu wòa be nyɔna. Wò sɔ sìka be jègbà cɔ̃ èta na ɛ̀.

⁵E biɔ wò àgbè, eye wò na ɛ̀ àgbènɔ̀ zã dìdi àdodoe kaka sɔ yì.

⁶Èfìɔa be gogoa lòlò, ɖo wò hlùɛ̃nà ɛ̀ gã. Wò sɔ nyiɖìɖi kudo bùbu cɔ̃ na ɛ̀.

⁷Wò sɔ ɛ̀ wɔ̀ sìtu ɖèɖe kaka sɔyì, ɖo wò ɖɔna ɛ̀ ku jìjɔɛ lè àpo ŋùmè.

⁸Ɛ̃ɛ, èfìɔa dona èjì ɖo Tɔhonɔ̀ ŋuti. Mawu èjihũitɔa be lɔ̃lɔ̃ na be, mu tènà kli ò.

⁹Èwò èfìɔ, àpo àsi la sù kɛ̃tɔ wòwo kpata ji. Àpo àsi sɛ̃sɛ̃a, la xe àmè kèwo crì wòa.

¹⁰Ne wò kpãŋùkɔ̀ woa, wò la fiɔ̃ wo lè èzò gã ɖe mè. Tɔhonɔ̀ la crɔ̃ wo lè yebe àdɔ̀mèze mè eye èzò la fiɔ̃ wo.

¹¹Wò la crɔ̃ woabe àdɔ̀mèviwo lè ànyigbã ji, wò la gbà crɔ̃ woabe èviwo be àdɔ̀mèviwo lè àgbètɔwo dòmè.

¹²Ne wo ɖo èvuɛ̃ ɖe, la wɔ̀ kudo wòa, ne wo ɖo sùsu vuɛ̃ ɖe a, wo mu la teŋu kpe ji wò ò.

¹³Ɛ̃ɛ, wò la ɖè àŋùdàti wòa ɖo woa ji eye wo la si àfɔsi-àfɔsi.

¹⁴Tɔhonɔ̀, ɖè àpo ŋusɛ̃a fiɔ. To àpo ènujɔ̀asuwo mèa, mi la jì èhà sɔ kafu àpo hɔ̃hlɔ̃a.