Read gen Èhàwo 22 Bible Online

Èhàwo 22 - gen bible

Èhàwo 22

¹David be Èhà kè wo ɖè lè hàsìnɔ̀ gã be xoma mèa. Wo jì ì ɖo 'Fɔ̃fɔ̃mè be èzĩ be ègbè ɖìɖi' ji.

²Mawu nyè Mawu nyè, nukɛ jɔ̀ ye wò gble mù ɖɛ ɖo ò? Mù na àle kaka, co, àpo àlɔ̀do dɛ̃ mù.

³Mawu nyè, mù do àpa yɔ wò lè ŋùkèkè mè, vɔ̀, wò mu kè ènu ò. Lè èzã mèa, mù gbà yɔ wò eye nyè mu na vòvo ɖokoe nyè ò.

⁴Co, wò nyi kɔ̀kɔ̀ɛ: Wò nɔ̀ ànyi lè èfìɔzìkpea ji, eye Izràɛl le kafu wò ètèmàtɔ.

⁵Mia tɔgbewo dojì ɖo ŋuti wò. Èwò ji ye wo kãɖo eye wò hlùɛ̃ wo gã.

⁶Wo do àpa yɔ wò, eye wò hlùɛ̃ wo. Wo dojì ɖo ŋuti wò, eye wò na be wo mu ɖù ŋùkpɛ̃ ò.

⁷Vɔ̀, mù lè sìgbè àvlɔkui nène, eye nyè mu gbà ɖì àgbètɔ ò. Àmèwo le zũ mù eye dùkɔ̃a gbe mù.

⁸Àmè kèwo kè ɖo ŋuti nyèa, wo le kò mù; Wo hũhũ èta, kè ènu gblɔ̃ be:

⁹“Tɔhonɔ̀ ŋuti e dojì ɖo. Ne tu ì èkà, ne bèa hlùɛ̃ ɛ̀ gã, ɖo Mawu lɔ̃ ɛ̀!”

¹⁰Ɛ̃ɛ, èwò ye na mù to lè ènɔ̀ nyè be àdɔ̀ mè. Eye wò kpɔ ji nyè gãgã ɖe, wàlɛbɛ kè ne mù nɔ̀ yebe àkɔ nua.

¹¹Wo do mù àsi na wò, so kaka àpe jìjìgbè ke. Wò nyi àpe Mawu, so ènɔ̀ nyè be àdɔ̀mè ke.

¹²Mù gbà nɔ̀ àzɔ̀ge na mù ò, ɖo gbledo lili, eye àlɔ̀do ɖekpe mu lè ò.

¹³Kɛ̃tɔ fuwo pòxla mù sìgbè ènyì-suwo nène, sìgbè Bacàn be ènyì-suwo nène.

¹⁴Wo lè sìgbè jãŋùtawo nène. Wo le gbo, wo kè ènu mè hãa, le ji la trɛ̃ ènu.

¹⁵Mù lè sìgbè èsì kè le sràa nène. Àpe cape capewo keŋu dudu. Àpe èjì le srè sìgbè vɛlɛ̀ nène lè àpe ètù mè.

¹⁶Àpe èhlò mè pu sìgbè àgbɛklɛ nène. Àɖe nyè tɛ lè ènu mè na mù, eye wò sɔ mù dà ɖo èku be ɖiɖɔɛ mè ke.

¹⁷Àmè nyrãkuwo bɔ̀ do mù, wo pòxla do mù sìgbè àvũwo nène. Wo ŋɔ ènu àpe àlɔ̀ kudo àfɔ̀wo.

¹⁸Mù ɖì èkũ kaka wo la teŋu hlɛ̃ àpe èpuwo kpata. Kɛ̃tɔ nyèwo le kpɔ mù, gbà le fɔ̀ ŋùkuvi ɖo ji nyè.

¹⁹Wo ma àvɔ nyèwo lè woa nɔ̀nɔwo dòmè, eye wo dà àkɔ̀ sɔ ma àwù nyèwo.

²⁰Vɔ̀ èwò Tɔhonɔ̀, mù gbà nɔ̀ àzɔ̀ge boo na mù ò. Wò nyi àpe ŋusɛ̃. Va do mù àlɔ̀ kaba!

²¹Hlùɛ̃ mù lè èku zòzo si eye wòa ɖè àmèti nyèa lè àvũwo be fèsuwo nu.

²²Ɖè mù lè jãŋùtawo be ènu mè, ku ètòwo be àzòwo nu! Aà, wò ɖo e ŋuti na mù!

²³Mù la gbà jra nyikɔ wò na nɔ̀vi nyèwo eye mù la kafu wò lè àgũ dòmè be:

²⁴“Mì, àmè kèwo dona bùbu Tɔhonɔ̀ ŋutia, mì kafu ì! Mìa, Yakɔb be viwo, mì na ɛ̀ gogo! Mìa Izràɛl be kɔ̀tawo, mì vɔ̃ ɛ̀!

²⁵Mu ɖèkɔ̀ kaka ne àyàtɔnɔ̀a be ènuxàxa la gbeŋɔ na ɛ̀ ò. Mu wla ye ɖokoe do è ò. Kè e fã yɔ ɛ̀a, e tɔ̀ na ɛ̀.”

²⁶Kafu la so gbɔ wò va na mù. Lè àmèha gã dòmèa, mù la tu àjɔ̀gbè fìãfiã nyèwo be èfɛ̃ lè àmè kèwo bùnà wòawo be ŋùkɔ̀.

²⁷Hòmèfanɔ̀wo la ɖùnu ɖɔpò; wo la kafu Tɔhonɔ̀, àmè kèwo le ji Tɔhonɔ̀a: “Mìa tɔ̀ ye nyi àgbè nyuɛ̃ kaka sɔyì!”

²⁸Ànyigbã kpata la ɖoŋù, gbà trɔkɔ̀ va Tɔhonɔ̀ gbɔ; dùkɔ̃wo be xòmèwo kpata la sumɔ lè ŋùkɔ̀ na ɛ̀.

²⁹Ɛ̃ɛ Tɔhonɔ̀ ye nyi èfìɔ, e ye le kplɔ̀ dùkɔ̃wo.

³⁰Àmè kèwo keŋu ɖù nyɔna lè ànyigbã jia, la jèɖɛ̀. Àmè kèwo keŋu ɖì jè ɖiɖɔɛ mèa, la jèklò na ɛ̀, eye àmè ɖekpe mu la hlùɛ̃ ye ŋutɔ be èkla ɖo àgbè ò.

³¹Woabe èviwo la sumɔ ɛ̀; wo la sɔ Tɔhonɔ̀ sɔ tùxo na jìjimè yeyeawo.

³²Wo la ɖè yebe ànùkua wɔ̀wɔa fiɔ dùkɔ̃ kè gbãnàa, wo la gblɔ̃ àlekè e hlùɛ̃ yebe dùkɔ̃a ɖoa.