Read gen Èhàwo 24 Bible Online

Èhàwo 24 - gen bible

Èhàwo 24

¹David be Èhà. Tɔhonɔ̀ tɔ̀ ye nyi xixea kudo yemè-nuwo, ànyigbã kudo àmè kèwo lè e jiawo.

²Ɖo e ye ɖo wo ɖo àpùwo ji, gbà likè wo ɖo ètɔ̀ sàsrawo ji.

³Àmè kɛ ye la teŋu lia Tɔhonɔ̀ be ètoa yì e ji ò? Àmè kɛ ye la teŋu tɔtè lè yebe Nɔ̀pe Kɔ̀kɔ̀ɛ ò?

⁴Àmè kè be àlɔ̀ mè kɔ̀, gbà ɖo èjì mè kɔ̀kɔ̀ɛa ye. Àmè kè trɔna lè yàkànuwo yomè, eye mu tànà ènu ɖo àjè e ji òa ye.

⁵E la xɔ̀ sìtu so Tɔhonɔ̀ gbɔ, eye Mawu kè nyi yebe hlùɛ̃gãa, la sò jɔ̀jɔɛ na ɛ̀.

⁶Nène ye àmè kèwo le jia, la nɔ̀ yeŋu; àmè kèwo le ji Mawu be ŋùmèa ye nyi Yakɔb be kɔ̀ta ŋutɔ-ŋutɔa.

⁷Mìa àgbowo, mì hũ gbàa! Mìa gbèɖegbè be hɔ̃truwo, mì hũ, ne gogo be èfìɔa ne gɛ̃ ɖo e mè.

⁸Àmè kɛ ye nyi gogo be èfìɔ kèa kò? Tɔhonɔ̀a ye, e nyi ŋusɛ̃tɔ, kãlìsu. E nyi àhùawɔ̀tɔ sɛ̃ŋu.

⁹Mia àgbowo, mì hũ gbàa; mìa gbèɖegbè be hɔ̃truwo, mì hũ ŋutɔ-ŋutɔ, ne gogo be èfìɔ bèa gɛ̃ ɖo e mè.

¹⁰Àmè kɛ ŋutɔ ye nyi gogo be èfìɔ kèa kò? Tɔhonɔ̀ ŋusɛ̃kpatatɔa ye nyi gogo be èfìɔa.