Read gen Èhàwo 25 Bible Online

Èhàwo 25 - gen bible

Èhàwo 25

¹David tɔ̀. Tɔhonɔ̀ Mawu nyè, gbɔ wò ye mù trɔ ɖoɖa[3]

²Ŋuti wò mù dojì ɖo, mù gbà na mà-ɖù ŋùkpɛ̃ ò. Mù gbà na ne kɛ̃tɔ nyèwo ne gla ɖo ji nyè ò.

³Ŋùkpɛ̃ ɖe mu lè na àmè kèwo dojì ɖo ŋuti wò ò. Vɔ̀, ŋùkpɛ̃ ye nyi na àmè kèwo sà wò ŋùgbemàkpɔtɔ̀a. Na ne woa ci àgba.

⁴Tɔhonɔ̀, na ne ma nya àpo èmɔ̃wo. Na ne ma nɔ̀ àgbè sɔ zɔ̃ ɖo àpo èjro ji.

⁵Kplɔ̀ mù lè àpo nyàwo be èmɔ̃a ji eye wòa kpla mù ènu. Ɖo èwò ye nyi àpe gãgã be Mawu. Mù lè yo wò mè tɛ̀gbɛ̀.

⁶Tɔhonɔ̀, ɖoŋù àpo ŋuzĩzĩ kudo hòmèfà lɔ̃lɔ̃ ŋùvòsijèjètɔ̀awo ɖo blèmàtɔ̀a ji kpò, wo lè kòɖòo.

⁷Ŋlɔ̀be àpe ɖèkajɛ mè be vuɛ̃wo, kaka jè àpe dàdawo ji. Vɔ̀ zɔ̃ ɖo àpo àdɔ̀mè nyuɛ̃ jia, Tɔhonɔ̀, ɖoŋù mù, ɖo àpo ɖàgbè wɔ̀wɔ ŋuti.

⁸Ɛ̃ɛ Tɔhonɔ̀ nyɔ gbà lè ànùkuawɔ̀wɔ ji. Nène a, e la fiɔ èmɔ̃ nuvuɛ̃wɔ̀tɔwo[4].

⁹E la fiɔ àfɔ̀tope hòmèfanɔ̀wo lè jɔ̀jɔɛ sòso mè eye e la gbà fiɔ wo yebe èmɔ̃a.

¹⁰Tɔhonɔ̀ be ènufiɔfiɔwo ɖènà yebe ànùkua lɔ̃lɔ̃ a fiɔ àmè kèwo le kpɔ yebe zòɖùɖu be èseawo jia.

¹¹Sɔ dàda nyè kè kpɛ̃ ŋutɔa sɔ kè mù, sɔ ɖè àpo gogoa fiɔ, Tɔhonɔ̀.

¹²Àmè kɛ ye la nyi àmè kè vɔ̃na Tɔhonɔ̀a kò? E la fiɔ àmè kèa èmɔ̃ kè jèa.

¹³E la nɔ̀ àgbè lè vòvo fɛ̀ɖɛ̀ mè eye yebe jìjimèviwo tɔ̀ ye la nyi ànyigbã.

¹⁴Tɔhonɔ̀ ɖènà ye ɖokoe fiɔna àmè kèwo ɖo bùbu na ɛ̀a, e ɖènà yebe zòɖùɖua fiɔ wo.

¹⁵Ŋùkuvi nyèwo nɔ̀nà Tɔhonɔ̀ ji tɛ̀gbɛ̀, ɖo e la ɖè àpe àfɔ̀wo to lè èdoa mè.

¹⁶Trɔkɔ̀ va kpɔ mù jro, ne wòa ku ŋuzĩzĩ na mù. Ɖo mù ci àkòŋùgò, gbà nyi àyàtɔnɔ̀.

¹⁷Àpe èjì ci jojojoe ŋutɔ, ɖè mù to lè àpe èfũwo mè.

¹⁸Ɖè ŋùku kpɔ àpe èfũ kudo àyà, ne wòa sɔ àpe èvuɛ̃wo kpata kè mù.

¹⁹Dè ŋùgblè so àpe kɛ̃tɔwo ŋuti, ɖo wo sùgbɔ, eye wo crì mù kakaka.

²⁰Le mù ɖo àgbè, ne wòa hlùɛ̃ mù. Wò nyi àpe tabèpe, mù gbà na mà-ɖù ŋùkpɛ̃ ò.

²¹Mù le kpɔ àsi wò nu. Na mà-ɖù blibo, gbà nyi ànùkuawɔ̀tɔ.

²²Oò Mawu, hlùɛ̃ Izràɛl lè yebe èfũwo keŋu-keŋu mè.