Read gen Èhàwo 27 Bible Online

Èhàwo 27 - gen bible

Èhàwo 27

¹David be Èhà. Tɔhonɔ̀ nyi àpe kɛ̃klɛ̃ kudo hlùɛ̃gã. Nyè mu la vɔ̃ àmè ɖekpe ò. Tɔhonɔ̀ le kpɔ àgbè nyèa ji kudo ŋusɛ̃. Nyè mu la hũhũ lè àmè ɖekpe be ŋùkɔ̀ ò.

²Wàlɛbɛ kè àmè bàɖà kèwo nyi kɛ̃tɔ nyèawo zɔ̃ gbãnà la va crɔ̃ mù a, woawo ŋutɔ ye klɛ̃ àfɔ̀ jè ànyi.

³Ne àhùakɔ̃ ɖe gbà lè àjòha mè ɖo ŋuti nyèa, nyè mu la vɔ̃ ò. Ne wo gbà sɔ àhùa ɖo ŋuti nyè cã, ekèa mè mù la dojì lè.

⁴Ènu ɖèka mù la biɔ so Tɔhonɔ̀ si. E ŋuti kpò mù le ji èmɔ̃ lè: Be ma nɔ̀ Tɔhonɔ̀ be àxomè àpe àgbèzãwo keŋu. Funu ye mù la nɔ kpɔ Tɔhonɔ̀ be ènu jè àmè ŋùmèwo, gbà nɔ glò yebe àdoa kpɔ.

⁵Ɛ̃ɛ, lè èfũ be hùenua, e la wla mù ɖo yebe nɔ̀pe. Yebe nɔ̀pe be gòglòpe ke be la wla mù ɖo. E la dà mù ɖo yebe àkpã be èta mè, lè èjìɖèɖe mè.

⁶Fifì ye mù la kɔ èta yì ji, sɔ kpɔ kɛ̃tɔ nyè kèwo trɔ do mù gòdòa. Eye mù la teŋu wɔ̀ vɔ̀sawo lè Tɔhonɔ̀ be àxuea mè kudo jìjɔɛ. Mù jro la jì èhà, mù jro la jì èhà na Tɔhonɔ̀.

⁷Ɖo èto mù, Tɔhonɔ̀, èwò mù le yɔ! Ku ŋuzĩzĩ na mù, ne wòa tɔ̀ na mù!

⁸Mù le dèŋùgblè so ènyà kè wò gblɔ̃a ŋuti be: “Woa ji àpe ŋùmè!” Tɔhonɔ̀, àpo ŋùmè ye mù le ji.

⁹Mù gbà wla àpo ŋùmè do mù boo ò. Mù gbà ɖè èkɔ̀ lè ŋuti nyè ɖo àdɔ̀mèze ŋuti ò! Èwò ye nyi àpe àlɔ̀do, mù gbà tàsi mù ò; Nène a ke mù gbà ɖèkɔ̀ lè ŋuti nyè ò. Mawu, àpe hlùɛ̃gã!

¹⁰Nène a kea, ne àjìtɔ ku àjìnɔ̀ nyèwo gbà gbe mù cã a, Tɔhonɔ̀ lè, la xɔ̀ mù.

¹¹Tɔhonɔ̀, fiɔ mù àpo èmɔ̃a, kplɔ̀ mù lè èmɔ̃ tututua ji, ɖo àmè kèwo lè àjòha mè na mùawo ŋuti.

¹²Mù gbà sɔ mù do àsi na kɛ̃tɔ nyèwo be jojro vuɛ̃wo ò. Ɛ̃ɛ, àjè be ɖàsèfowo sitè ɖo ŋuti nyè. Ènudrã wɔ̀wɔ ɖɔ èjì mè na wo.

¹³Vɔ̀, mù kã ɖo e ji be mù la kpɔ Tɔhonɔ̀ be àdɔ̀mè nyuɛ̃ lè ànyigbã kèa ji, àfi kè mi lè àgbè lèa.

¹⁴Kã ɖo Tɔhonɔ̀ ji, sɛ̃ŋu, èjì wòa ne likè. Dodo, kã ɖo Tɔhonɔ̀ ji.