Read gen Èhàwo 28 Bible Online

Èhàwo 28 - gen bible

Èhàwo 28

¹David tɔ̀. Tɔhonɔ̀, àpe àkpã likè, èwò mù le fã yɔ. Mù gbà ku èto do àpa nyè ò. Ne wò mu tɔ̀ na mù òa, mù la ɖì àmè kè le ɖiɖi yì èyɔ̀mèa.

²Ɖo èto àpe blìbɔ̀-blìbɔ̀ be ègbèwo ne mù fã yɔ wòa; ne mù kɔ àlɔ̀ nyèwo yì ji ɖoɖa àpo mawuxɔa be tèpe kɔ̀kɔ̀ɛa.

³Mù gbà hɛ̃ mù sìgbè àmè bàɖà àlo ènu màɣe wɔ̀tɔwo nène ò. Wo pònà fàfa kudo woa xaviwo, vɔ̀, èvuɛ̃ ye lè woabe èjì mè.

⁴Tu èfɛ̃ na wo sɔ zɔ̃ ɖo woabe wɔ̀wɔwo kudo woabe èhlɔ̃ dãdãwo ji. Tu woabe àlɔ̀nu dɔwo be èfɛ̃ na wo, ne wòa na wo woabe ètodɔ̃awo.

⁵Ɖo wo mu kpɔna Tɔhonɔ̀ be wɔ̀wɔwo kudo yebe àlɔ̀nudɔwo ɖo ènu ɖe ji ò. Tɔhonɔ̀ ne crɔ̃ wo, ne wo mu gbà fɔ̃ gbèɖe kpɔ ò.

⁶Àkpe na Tɔhonɔ̀! E ɖo èto sè àpe blìbɔ̀ gbèa.

⁷Tɔhonɔ̀ ye nyi àpe ŋusɛ̃ kudo àpe àkpoxɔ̀nu. Èjì nyè li ɖo e ji, eye mù kpɔ yebe àlɔ̀do. Èjì nyè le mlã ŋutɔ eye mù le kafu Tɔhonɔ̀ kudo àpe èhà.

⁸Tɔhonɔ̀ ye nyi yebe dùkɔ̃a be ŋusɛ̃, e kpɔna èfìɔ kè e cã a ji kudo ŋusɛ̃. E hlùɛ̃nà ɛ̀ gã.

⁹Hlùɛ̃ àpo dùkɔ̃a gã, tu èsì na àmè kèwo nyi tɔ̀wòawo. Nyi kplɔ̀tɔ na wo, ne wòa kpɔ woa ji kaka sɔyì.