Read gen Èhàwo 3 Bible Online

Èhàwo 3 - gen bible

Èhàwo 3

¹David be Èhà, wàlɛbɛ kè e si lè èvia Àbsàlɔm be ŋùkɔ̀a.

²Tɔhonɔ̀, kɛ̃tɔ nyèwo sùgbɔ ŋutɔ, àmè sùgbɔ sitè ɖo ŋuti nyè.

³Wo le gblɔ̃ so ŋuti nyè be: “Àlɔ̀do ɖe mu lè Mawu gbɔ na ɛ̀ ò!”

⁴Vɔ̀ èwò Tɔhonɔ̀ ye nyi àpe àkpoxɔ̀nu. Èwò ye nyi àpe gogo, wò le kɔ àpe èta yì ji.

⁵Mù le yɔ Tɔhonɔ̀ ku ègbè lelele eye e tɔ̀ na mù so yebe èto kɔ̀kɔ̀ɛa ji.

⁶Eye lè èzã mèa, mù mlɔ̃ ànyi dɔ̃ àlɔ̃. Kè mù fɔ̃a, Tɔhonɔ̀ va do mù àlɔ̀.

⁷Nyè mu gbà le vɔ̃ àmèha gbogbo kèwo pòhla do mù gòdòa ò.

⁸Sitè Tɔhonɔ̀! Hlùɛ̃ mù gã Mawu nyè! Ɛ̃ɛ wò le pò ŋùkumè gbɔ na kɛ̃tɔ nyèwo. Wò ŋɛ̃ àɖu na àmè bàɖàwo.

⁹Tɔhonɔ̀, èwò ye hlùɛ̃nà àmè gã. Ɖùɖù àpo sìtu kɔ̀ ɖo tɔ̀ wòwo ji!