Read gen Èhàwo 31 Bible Online

Èhàwo 31 - gen bible

Èhàwo 31

¹David be Èhà. Wo ɖè è lè hàsìnɔ̀ gã be xoma mè.

²Tɔhonɔ̀, èwò ye nyi àpe ètabèpe. Èŋù mu la kpɛ̃ mù gbèɖe ò. Hlùɛ̃ mù ɖo àpo ànùkua wɔ̀wɔ ŋuti.

³Bɔ̀bɔ̀ èto wòa ɖo ji nyè ne wòa xɔ̀ na mù. Nyi àkpã sɛ̃sɛ̃ kè mè mù bè ɖoa, àgbògbò kè la hlùɛ̃ mù gãa.

⁴Ɛ̃ɛ, wò nyi àpe àkpã kudo àpe àgbògbò. Nɔ̀ ŋùkɔ̀ na mù, ɖo àpo gogoa ŋuti ne wòa fiɔ mù èmɔ̃.

⁵Ɖè mù to lè èmɔ̃ kè wo tre na mù a mè, ɖo èwò ye nyi àpe àgbògbò sɛ̃sɛ̃.

⁶Mù sɔ àgbè nyèa do àsi wò mè. Wò hlùɛ̃ mù gã, Tɔhonɔ̀, ànùkua Mawu.

⁷Mù crì àmè kèwo le sɛ̃ àjè mawuwo. Nyè ya, mù dojì ɖo Tɔhonɔ̀ ŋuti.

⁸Mù la haya, gbà jɔ̀jì lè àpo lɔ̃lɔ̃ mè. Ɖo wò kpɔ àpe èfũ, wò sè àyàɖùɖu gã nyèa gɔ̃mè.

⁹Wò mu ɖè mù do àsi na kɛ̃tɔ nyèa ò. Wò le mù sitè eye wò na mù vòvo fɛ̀ɖɛ̀.

¹⁰Tɔhonɔ̀, ku ŋuzĩzĩ na mù, ɖo mù lè èfũ mè. Ŋùkuvi nyèwo fiɔ̃ ku ènuhàha, ŋusɛ̃ nyèa ɖè kpɔ̀tɔ̀ keŋu-keŋu.

¹¹Mù le zã àgbè nyèa ku àyàɖùɖu kudo èpè nyèawo ku àlenanawo. Èvuɛ̃ nyèwo ɖè ŋusɛ̃ nyèa jo eye mù gbɔjɔ keŋu-keŋu.

¹²Mù trɔ zũ ènu kòkoe lè kɛ̃tɔ nyèwo dòmè, vevetɔa, àmè kèwo lè àpe àhàdamè. Àmè kèwo jèsi mùawo le vɔ̃ mù. Ne wo kpɔ mù lè èmɔ̃ jia, wo sina.

¹³Mù lè sìgbè àmèkuku kè wo ŋlɔ̀bea nène, mù ɖì èze gbãgbã.

¹⁴Mù sè àjèɖàɖa fuu kè wo le ɖà ɖo àsi nyèa. Vɔ̃vɔ̃ lè àfi ɖekpekpe pòhla. Wo bɔ̀ le blase ɖo ŋuti nyè, ɖo wo le ji àpe èku.

¹⁵Vɔ̀, mù dojì ɖo ŋuti wò, Tɔhonɔ̀. Mù gblɔ̃ be: “Èwò ye nyi àpe Mawu.”

¹⁶Ŋùkèkè nyèwo lè àsi wò mè; hlùɛ̃ mù lè kɛ̃tɔ nyèwo si, lè àmè kèwo le tĩ yo nyè mèawo si.

¹⁷Mù nyi àpo sumɔ̃vi, na àpo ŋùmè ne klɛ̃ ɖo ji nyè. Hlùɛ̃ mù to àpo lɔ̃lɔ̃ mè.

¹⁸Tɔhonɔ̀, mù gbà na mà-ɖù ŋùkpɛ̃, ne mù fã yɔ wò ò. Vɔ̀, na àmè bàɖàwo ne ɖù ŋùkpɛ̃. Èɖa ne ɖo lè woa nu lè èkuwode gbidi.

¹⁹Le ènuyu bɔ̀ na àjèɖàtɔ ŋuawo. Ɛ̃ɛ wo mu ɖona bùbu na àmè kè le wɔ̀ ɖo àpo ènyà ji ò. Wo pònà nupo ku ègòyiyi ku jajra àmè màbùtɔ̀.

²⁰Tɔhonɔ̀, ɖàgbè kèwo wò jràɖo ɖɛ na àmè kèwo vɔ̃na wòawo lòlò. Lè àgũ dòmè ye wò mana wo na àmè kèwo kpɔ nɔ̀pe lè èwò mèa.

²¹Wò wlana wo ɖo àpo ŋùmè be bèbèpe, do àmè kèwo le tĩ woa yomè a. Wò wlana wo do àgbètɔ be ènyà gbegblewo gbɔ̃gblɔ̃.

²²Àkpe na wò Tɔhonɔ̀! Mù lè sìgbè èdù kè wo xaa[7] nène, vɔ̀a, àpo lɔ̃lɔ̃ wɔ̀ ènu jɔ̀ àsuwo na mù.

²³Ŋùɖo bu na mù eye mù le bù èta mè be: “Wò nyà mù lè àpo ŋùku ta!” Vɔ̀a, wò ɖo èto mù kè mù fã yɔ wòa.

²⁴Mì lɔ̃ Tɔhonɔ̀, mìa yebe àmè kɔ̀kɔ̀ɛwo. Tɔhonɔ̀ nyi àkpoxɔ̀nu na àmè kèwo xɔ̀ e ji sèa, vɔ̀, e dɔ̃nà èto na ègòyitɔwo.

²⁵Mì sɛ̃ŋu ne mìa likè goŋu-goŋu, mìa àmè kèwo keŋu xɔ̀ Tɔhonɔ̀ ji sèa.