Read gen Èhàwo 33 Bible Online

Èhàwo 33 - gen bible

Èhàwo 33

¹Mìa ànùkuamèwo, mì do jìjɔɛ be àpa na Tɔhonɔ̀. E nyɔ be àmè kèwo ɖo èjìmè kɔ̀kɔ̀ɛa, woa nɔ jì kafu-hawo na ɛ̀.

²Mì kafu Tɔhonɔ̀a ku èhɛ, mì pò èkà èwo be sãŋùgu na ɛ̀.

³Mì jì èhà yeye na ɛ̀, mì pò èhũ àɖàŋùtɔ̀ kudo ègbè liloe liloe.

⁴Ɛ̃ɛ, Tɔhonɔ̀ be ènyàwo sɔ̀gbè. Wo la teŋu kã ɖo yebe wɔ̀wɔwo keŋu ji.

⁵Tɔhonɔ̀ lɔ̃nà ànùkua kudo jɔ̀jɔɛsòso. Ànyigbã ɖɔ ku yebe lɔ̃lɔ̃.

⁶Tɔhonɔ̀ be ènyà ye e sɔ ɖo jiŋùkusi. Yebe ènumègbe ye e sɔ wɔ̀ wètriviwo.

⁷E bɔ̀ àpùsiwo geglegle, e bɔ̀ ètɔ̀ gãgãwo ɖo tèpe ɖèka.

⁸Ànyigbã a kpata ne do bùbu Tɔhonɔ̀ ŋuti. Xixedùwo kpata ne nɔ hũhũ lè ŋùkɔ̀ na ɛ̀.

⁹Ɖo e pò nupo e ye xixea jɔ̀; Ègbè kpò be ɖè ye ekèa va e mè.

¹⁰Tɔhonɔ̀ gblena dùkɔ̃wo be ɖoɖowo. E titɔna woabe èta mè susuwo.

¹¹Tɔhonɔ̀ be àɖàŋùɖoɖo nɔ̀nà ànyi tɛ̀gbɛ̀. Yebe èjìmè be susuwo, lè na jìjimèwo kpata kpata.

¹²Ɖàgbè e la nyi na èdù kè Tɔhonɔ̀ nyi Mawu na a. Ɖàgbè e la nyi na dùkɔ̃ kè Tɔhonɔ̀ cã sɔ wɔ̀ ye ŋutɔ tɔ̀a.

¹³So jiŋùkusi ke Tɔhonɔ̀ le kpɔ èdò. E le kpɔ ènu àgbèagbèwo kpata.

¹⁴So fìɔzìkpe kè ji e lèa, e le kpɔ ànyigbã jitɔwo kpata.

¹⁵Yeŋutɔ ye ɖo woabe èjìwo ɖèka-ɖèka. E nya woabe wɔ̀wɔwo keŋu.

¹⁶Àhùakɔ̃ sɛ̃ŋu ɖe mu hlùɛ̃nà èfìɔ ɖekpe gã lè àhùagbe ji ò; Kãlìsu ɖe be ŋusɛ̃ gã cã mu la teŋu hlùɛ̃ ɛ̀ gã ò.

¹⁷Èsɔ mu nyi ènu ɖekpe na jiɖùɖu ò; Yebe ŋusɛ̃ gãa mu la teŋu hlùɛ̃ èsɔdotɔa ò.

¹⁸Vɔ̀, Tɔhonɔ̀ be ŋùku lè àmè kè sina ɛ̀a ji, àmè kè ɖonaŋù yebe lɔ̃lɔ̃ a.

¹⁹E ɖènà wo to lè èku mè eye e xɔ̀nà wo ɖo àgbè lè àdɔ̀toto mè.

²⁰Eye miawo cã, mi le kpɔ Tɔhonɔ̀ sinu, e ye nyi miabe àkpoxɔ̀nu ku miabe àlɔ̀do.

²¹Miabe èjìmè be jìjɔɛ so e gbɔ. Mi kã ɖo Mawu kɔ̀kɔ̀ɛa ji.

²²Tɔhonɔ̀, na àpo lɔ̃lɔ̃ ne kpɔ èmɔ̃ lè mia mè sìgbè àlekè mi ɖoŋù ɖo ŋuti wòa nène.