Read gen Èhàwo 34 Bible Online

Èhàwo 34 - gen bible

Èhàwo 34

¹David tɔ̀. Lè èfìɔ Abimèlɛk be ŋùku mè ye David wɔ̀ sìgbè àmè kè ŋùmè le gble na a nène, eye èfìɔa nyà ɛ̀ jo. Ekè David jo le yìa, e gblɔ̃ be:

²Mù la nɔ do àkpe na Tɔhonɔ̀ wè sia wè, àpe ènu la nɔ kafu ì tɛ̀gbɛ̀.

³Mù le go lè Tɔhonɔ̀ mè. Àkuitɔnɔ̀wo ne sè, gbà jɔ̀jì.

⁴Mì gblɔ̃ ku mù be: “Tɔhonɔ̀ lòlò!” Mì na mia pòmlã yebe nyikɔ.

⁵Mù ji èmɔ̃ lè Tɔhonɔ̀ ŋuti eye mù kè ɖo e ŋuti. Nyè mu gbà le vɔ̃ ènu ɖekpe ò.

⁶Àmè kèwo le kpɔ ɛ̀a, kɔ̀ kudo jìjɔɛ eye wo mu la ɖù ŋùkpɛ̃ ò.

⁷Ne ènuwɔ̀donɔ̀ ɖe do àpa yɔ Tɔhonɔ̀a, e sènà yebe ègbè. E hlùɛ̃nà ɛ̀ lè yebe vɔ̃vɔ̃wo kpata mè.

⁸Tɔhonɔ̀ be àtikplɔtɔ ɖiana àmè kèwo dona bùbu Mawu ŋutia, eye e ɖènà wo lè èvuɛ̃ mè.

⁹Mì ɖɔ ɛ̀ kpɔ, ne mìa kpɔ àlekè Tɔhonɔ̀ nyɔ ɖoa. Sìtume ye nyi àmè kè dojì ɖo e ŋutia.

¹⁰Mìa àmè kèwo nyi Tɔhonɔ̀ tɔ̀a, mì do bùbu e ŋuti. Ènu ɖekpe mu dɛ̃na nènemeawo ò.

¹¹Ènu teŋu dɛ̃ ècitɔwo eye àdɔ̀ cã teŋu va wù wo. Vɔ̀a, ènu ɖekpe mu dɛ̃na àmè kèwo le ji èmɔ̃ lè Tɔhonɔ̀ ŋutia ò.

¹²Nɔ̀vi nyèwo, mì va ne mìa ɖoto mù. Mù la fiɔ mì Tɔhonɔ̀ bùbua.

¹³Wò ɖo lɔ̃lɔ̃ na àgbèa? Wò le ji ɖàgbè be ŋùkèkèa?

¹⁴Nène a, mù gbà gblɔ̃ àmè ɖe be ènyà bàɖà ò; Na àsà àjèɖàɖa.

¹⁵Si lè èvuɛ̃ gbɔ eye wòa wɔ̀ ènyuɛ̃; Nɔ ji ŋuti fàfa wè sia wè eye wòa nɔ̀ e yomè kpò.

¹⁶Tɔhonɔ̀ trɔ kpɔna àmè kèwo le sè ègbè na ɛ̀a, e ɖona èto woabe àpa dodowo.

¹⁷Vɔ̀a, e sinatè ɖo ènu bàɖàwɔ̀tɔwo ŋuti. E jina ŋutɔ la ɖè wo jo lè ànyigbã ji.

¹⁸Tɔhonɔ̀ sènà àmè kèwo le sè ètonu na ɛ̀a be ègbè, ne wo do àpa le yɔ ɛ̀a. Eye e ɖènà wo to lè àhovì ɖekpekpe kè la do vɔ̃vɔ̃ na woa mè.

¹⁹Tɔhonɔ̀ mu dìdìnà lè àmè kèwo be èjì le gbãa gbɔ ò; E hlùɛ̃nà àmè kèwo gbɔjɔawo gã.

²⁰Mawu be ànùkuamè a ɖùnà àyà sùgbɔ, vɔ̀a, Tɔhonɔ̀ ɖènà ɛ̀ lè yebe àyàɖùɖuwo kpata mè.

²¹E lena yebe èpuwo ɖotè, ne ɖekpe ŋutɔ mu gbà ŋɛ̃ lè woa dòmè ò.

²²Àmè bàɖà la ku ɖo yebe èkunyànyrã ŋuti. Ètodɔ̃ la va Mawu be ànùkuamèwo be kɛ̃tɔwo kpata ji.

²³Tɔhonɔ̀ hlùɛ̃nà yebe sumɔ̃viwo be àgbè. Eye, lè àmè kèwo dojì ɖo e ŋutiawo dòmèa, àmè ɖekpe mu la kpɔ ètodɔ̃ ò.