Read gen Èhàwo 35 Bible Online

Èhàwo 35 - gen bible

Èhàwo 35

¹David tɔ̀. Tɔhonɔ̀, dohùɛ do àmè kèwo le dohùɛ do mù a, sitè ɖo àmè kèwo le sitè ɖo ŋuti nyèawo ŋuti.

²Sɔ àpo àkpoxɔ̀nu ku àhùawɔ̀nuawo. Sitè kplà, ne wòa va xɔ̀ na mù.

³Gbà dɔ̃ èhuã ku àhùafiɔvia, ne wòa pò àmè kèwo tĩ yo nyè mèa. Gblɔ̃ na èjì nyè be: “Ènyè ye hlùɛ̃ wò gã!”

⁴Èŋù ne kpɛ̃ àmè kèwo ji la wù mù a, wo ne dã èta na woa ɖokoewo. Àmè kèwo jro la wɔ̀ ènu bàɖà kudo mù a, woa trɔ yì ŋùgbe-ŋùgbe ku ŋùkpɛ̃.

⁵Tɔhonɔ̀ be àtikplɔtɔa ne nyà wo ɖo ènu, eye woa trɔ èbèyɔɛ kè àya kplɔ̀ le yìa.

⁶Tɔhonɔ̀ be àtikplɔtɔa ne ɖè wo ɖo ènu kaka ne woa ɖiɖi lè èmɔ̃ kè do vìvìtia ji.

⁷Ɖo gbalo ye wo tre èmɔ̃ ɖo èdo nu ɖɛ na mù. Gbalo ye wo ɖè èdo ɖo ŋùkɔ̀ na mù, ne ma crɔ̃.

⁸Gbledo klìko ɖe ne gɛ̃ jè woa ji kplà! Èmɔ̀ kè wo tre na mù a, ne trɔ le wo, eye gbledo kèa ne crɔ̃ wo gbidi.

⁹Eye, mù la ɖu jìjɔɛ be èwè ɖo Tɔhonɔ̀ ŋuti. Mù la kpɔ jìjɔɛ, ɖo e hlùɛ̃ mù gã.

¹⁰Mù la gblɔ̃ so kaka èjì mè be: “Àmè kɛ ye lè sìgbè Tɔhonɔ̀ nène? Wò hlùɛ̃nà ènuwɔ̀donɔ̀ lè àmè kè sɛ̃ŋu wu ìa si. Wò hlùɛ̃nà wɔ̀amènɔ̀ ku ènuwɔ̀donɔ̀ lè àmè kèwo le gbidi woa si mè.”

¹¹Àjè ɖàsèfowo to va. Wo biɔ mù ènyà kèwo nyè mu nya òa.

¹²Wo wɔ̀ èvuɛ̃ ɖo ènyuɛ̃ tèpe na mù. Àmè sia àmè gble mù ɖɛ.

¹³Mù ci siayi wàlɛbɛ kè lãmè gble woa. Mù nyàmà àmèti nyèa ku ènubabla eye mù fãkue tèmàtɔ.

¹⁴Mù dãna jàjà sìgbè nɔ̀vi àlo èxlɔ̃ nyè wo nyi nène. Mù ci kpɔ̃ ku èfũlòlo sìgbè ènɔ̀ nyè ye ku nène.

¹⁵Vɔ̀a woawo ya, àpe ànyi jèje ŋutɔ cã dona jìjɔɛ na wo. Eye wo yì bɔ̀nà ɖo àpe èvuɛ̃ jiji ŋuti. Àmèjrowo, àmè kèwo nyè mu jèsi sã ŋutɔ cã òa, dona àpa ɖo èta nyè.

¹⁶Àjèɖàtɔ kèawo ɖènà àlɔmè lè ŋuti nyè eji-eji, eye wo ɖùnà àɖuklui.

¹⁷Tɔhonɔ̀, wò la nɔ kpɔ ekèa kaka va na gà kɛ mè ò? Ɖè mù lè àmè bàɖà kèawo si, ɖè mù lè jãŋùta kèawo si mè.

¹⁸Mù la do àkpe na wò lè àmèha gã ɖe be ŋùkɔ̀, mù la kafu wò lè habɔ̀bɔ gã mè.

¹⁹Ne àmè kèwo ɖè ŋùtafui na mù gɔ̃mè màsetɔ̀a, wo mu gbà kò mù ɖe ò. Ne àmè kèwo crì mù gbaloa, wo mu gbà klɛ̃ àzũ mè do mù ke ò.

²⁰Gbèɖe, wo mu jina ŋuti fàfa ò, vɔ̀a, wo ɖànà àjè àɖàŋùtɔ̀ ɖo àmè nyuɛ̃wo si.

²¹Wo dona àpa ɖo èta nyè lelele be: “Hoo! Hoo! Mi kpɔ ɛ̀ ku miabe ŋùkuwo!”

²²Tɔhonɔ̀, wò ya wò kpɔ ènu sia ènu, mù gbà bɔ̀ ènu ò, mù gbà nɔ̀ àzɔ̀ge boo lè ŋuti nyè ò.

²³Tɔhonɔ̀ Mawu nyè fɔ̃! Sitè ne wòa sò jɔ̀jɔɛ na mù, ne wòa xɔ̀ ènyà ɖo èta nyè.

²⁴Wò lè jɔ̀jɔɛ, Tɔhonɔ̀ Mawu nyè, sò jɔ̀jɔɛ na mù jro. Ne àmè kèawo mu gbà kpɔ jìjɔɛ ɖo ŋuti nyè ò.

²⁵Wo mu gbà gblɔ̃ kpɔ be: “Ɛ̃ɛ, mi kpɔ ènu kè mi le jia, mi mì ì àgbligbà!” O.

²⁶Èŋù ne kpɛ̃ àmè kèwo la jɔ̀jì ɖo àpe àfɔ̀ku ŋutia, wo ne bu woabe bùbuwo. Èŋù ne kpɛ̃ àmè kèwo susu be yèwo sɛ̃ŋu wu mù a. Wo ne trɔ zũ èvlodonu na àmèwo.

²⁷Vɔ̀a, àmè kèwo be ŋùmè àpe ànùkua wɔ̀wɔ jèawo ne nɔ do jìjɔɛ be àpa, ne woa nɔ gblɔ̃ tɛ̀gbɛ̀ be: “Tɔhonɔ̀ lòlò, e le ji yebe sumɔ̃via be ɖàgbè”.

²⁸Eye mù la nɔ gblɔ̃ eji-eji be wò nyi ànùkuamè. Mù la nɔ jì kafu-hawo na wò tɛ̀gbɛ̀.